ساران قالاسىنىڭ جۇزگە جۋىق جاسى، ەرىكتىلەر مەن «جاسىل ەل» ەڭبەك جاساعىنىڭ ساربازدارى بوگەت ماڭىنداعى سۋ قويماسىنىڭ اۋماعىندا ەكولوگيالىق سەنبىلىك وتكىزدى. ولار جاعالاۋ بويىن قوقىستان تازارتىپ، تۇرعىنداردىڭ دەمالىس ايماعىن رەتكە كەلتىردى.

ەكولوگيالىق اكتسيانىڭ باستى ماقساتى – جاستار اراسىندا ەكولوگيالىق مادەنيەتتى قالىپتاستىرۋ، قورشاعان ورتانى قورعاۋ ماسەلەلەرىنە قوعام نازارىن اۋدارۋ جانە ەرىكتىلىك قىزمەتتى ناسيحاتتاۋ.

سۋرەت: gov.kz سايتىنان الىندى.

ساران قالالىق جاستار رەسۋرستىق ورتالىعىنىڭ باسشىسى ايىم قاناپيانوۆانىڭ ايتۋىنشا، تابيعاتتى قورعاۋ – ءاربىر ازاماتتىڭ ورتاق مىندەتى.

— قورشاعان ورتانىڭ تازالىعى مەن ەكولوگيالىق قاۋىپسىزدىك – بارشامىزعا ورتاق جاۋاپكەرشىلىك. مۇنداي ءىس-شارالار تابيعاتتى ساقتاۋعا عانا ەمەس، جاستاردىڭ ازاماتتىق بەلسەندىلىگىن ارتتىرىپ، تۋعان جەرگە دەگەن جاناشىرلىق پەن ۇقىپتى كوزقاراسىن قالىپتاستىرۋعا دا ىقپال ەتەدى، — دەدى ول.

اكتسياعا قاتىسۋشىلاردىڭ بىرلەسكەن ەڭبەگىنىڭ ناتيجەسىندە سۋ قويماسى جاعالاۋى ەداۋىر تازارىپ، دەمالىس ايماعىنىڭ كەلبەتى جاقساردى. وسىنداي يگى باستامالار جاستاردى ماڭىزدى قوعامدىق جوبالار توڭىرەگىنە توپتاستىرىپ، تابيعاتقا قامقورلىق ءار ادامنىڭ جەكە جاۋاپكەرشىلىگىنەن باستالاتىنىن تاعى ءبىر مارتە ەسكە سالادى.

مۇنداي شارالاردىڭ ماڭىزىن ارتتىرىپ وتىرعان باستامالاردىڭ ءبىرى – جالپىۇلتتىق «تازا قازاقستان» باعدارلاماسى.

باعدارلاما ەكولوگيالىق مادەنيەتتى دامىتۋعا، تۇرعىنداردى قوعامدىق پايدالى جۇمىستارعا كەڭىنەن تارتۋعا جانە قورشاعان ورتاعا دەگەن جاۋاپكەرشىلىكتى نىعايتۋعا باعىتتالعان.

Abai.kz