2026 جىلعى 1 ماۋسىمداعى جاعداي بويىنشا مانساپ ورتالىقتارى ارقىلى 200,4 مىڭ ازامات جۇمىسپەن قامتىلدى. بۇل كورسەتكىشتىڭ ىشىندە 75 مىڭى – جاستار بولسا, 81 مىڭى – نازىك جاندىلار.

قازاقستاننىڭ ەڭبەك نارىعىندا وڭ ءۇردىس ساقتالۋدا. جۇمىسپەن قامتۋعا جاردەمدەسۋ شارالارى ەلىمىزدىڭ بارلىق وڭىرلەرىن قامتىپ، حالىق تابىسىنىڭ ارتۋىنا جانە ەڭبەك الەۋەتىنىڭ نىعايۋىنا ىقپال ەتۋدە. ۇلتتىق جوبالار مەن وڭىرلەردى دامىتۋ جوسپارلارى اياسىندا بيىل جالپى سانى 40,4 مىڭ جاڭا جۇمىس ورنىن قۇرۋ جوسپارلانسا، جىلدىڭ العاشقى جارتىسىندا-اق 8 مىڭعا جۋىعى اشىلىپ ۇلگەردى.

قر ەڭبەك جانە حالىقتى الەۋمەتتىك قورعاۋ مينيسترلىگى حالىقتىڭ الەۋمەتتىك وسال ساناتتارىن ەڭبەك نارىعىنا تارتۋ بويىنشا جۇيەلى جۇمىس جۇرگىزىپ، ءار ازاماتتىڭ قاجەتتىلىگىنە ساي جەكە قولداۋ تەتىكتەرىن ۇسىنۋدا. ماسەلەن، مانساپ ورتالىقتارىنىڭ قىزمەتىمەن 17,4 مىڭ مۇگەدەكتىگى بار ازامات قامتىلدى. ولاردىڭ 6,4 مىڭى جۇمىسقا ورنالاستىرىلسا، 3,8 مىڭنان استامى كاسىپكەرلىك نەگىزدەرىنە وقىتىلىپ، «Skills Enbek» ونلاين-پلاتفورماسى ارقىلى جاڭا داعدىلاردى مەڭگەردى.

كوپبالالى وتباسىلاردى قولداۋ ماسەلەسىنە دە ەرەكشە نازار اۋدارىلۋدا: مانساپ ورتالىقتارىنا جۇگىنگەن 17,2 مىڭ ازاماتتىڭ 6,1 مىڭى تۇراقتى جانە مەملەكەت سۋبسيديالايتىن ۋاقىتشا جۇمىس ورىندارىنا ورنالاستىرىلدى.

ەڭبەك نارىعىنا بەيىمدەۋدىڭ ماڭىزدى قۇرالدارىنىڭ ءبىرى – كاسىبي باعدارلاۋ. جىل باسىنان بەرى بۇل قىزمەتتى 170,6 مىڭ ازامات پايدالانسا، ولاردىڭ 138 مىڭى جۇمىس ىزدەۋشىلەر قاتارىنداعى ادامدار.

اتالعان جۇمىستىڭ نەگىزىن 2024–2029 جىلدارعا ارنالعان ەڭبەك نارىعىن دامىتۋ تۇجىرىمداماسى قۇرايدى. مينيسترلىكتىڭ ستراتەگيالىق ماقساتى – 2029 جىلعا قاراي ساپالى جۇمىس ورىندارىنىڭ ۇلەسىن 45%-عا دەيىن جەتكىزۋ.

بۇل باعىتتاعى وڭ وزگەرىستەر ناقتى كورسەتكىشتەردەن دە كورىنەدى. ەگەر 2024 جىلى ساپالى جۇمىس ورىندارىمەن 2,47 ملن ادام قامتىلسا، 2026 جىلى بۇل كورسەتكىشتى 3,08 ملن ادامعا دەيىن جەتكىزۋ جوسپارلانىپ وتىر.

تۇراقتى جالاقىنى، قاۋىپسىز ەڭبەك جاعدايلارىن جانە الەۋمەتتىك قورعالۋدى قامتيتىن وسى تاسىلدەردى ىسكە اسىرۋ ەلدەگى الەۋمەتتىك تۇراقتىلىقتى نىعايتۋدىڭ ماڭىزدى فاكتورى بولىپ تابىلادى.

Abai.kz