وڭتۇستىك كورەيانىڭ ۇلتتىق قۇراماسى الەم چەمپيوناتىنىڭ پلەي-وفف كەزەڭىنە وتە الماعاندىقتان، باس باپكەرى قىزمەتىنەن كەتتى.

كوماندا الدىنعى ۇشتىككە ەنۋگە دامەلى ەدى، بىراق بۇل ءۇمىت وتكەن سەنبىدە (27 ماۋسىم) ءبىر جولاتا ءۇزىلدى.

جارىستان كۇنى بۇرتىن شىعىپ قالۋ ەل ىشىندە قاتتى سىنعا ۇشىرادى، پرەزيدەنت لي چجە ميون كوماندانىڭ كوڭىل كونشىتپەيتىن ويىنىنا تەكسەرۋ جۇرگىزۋدى تالاپ ەتتى. باس باپكەر حون ميون بو وتكەن جەكسەنبىدە (28 ماۋسىم) جانكۇيەرلەردەن كەشىرىم سۇراپ، «جاۋاپكەرشىلىكتىڭ تولىعىمەن ءوزىنىڭ موينىندا» ەكەنىن مالىمدەدى.

جەرگىلىكتى باق-تىڭ حابارلاۋىنشا، الەۋمەتتىك جەلىدە باس باپكەرگە قارسى «كوزىڭدى قۇرتامىن» دەگەن جازبالار كوبەيگەن. وڭتۇستىك كورەيا پوليتسياسى حون ميون بوعا ءولىم قاۋپى تونگەندىكتەن، ينچحون اۋەجايىندا جانە باسقا جەرلەردە قاۋىپسىزدىك باقىلاۋىن كۇشەيتكەن.

فيفا ەرلەر فۋتبول رەيتينگىندە 32-ءشى ورىندا تۇرعان  وڭتۇستىك كورەيا قۇراماسى الەم چەمپيوناتىندا ەكى جەڭىلىس پەن ءبىر جەڭىسكە جەتىپ، اقىر اياعىندا مەكسيكادان (15-ءشى) جانە وڭتۇستىك افريكادان (60-شى) كەيىن قالدى.

وڭتۇستىك كورەيا وتكەن بەيسەنبىدەگى (25-ءشى) سوڭعى ماتچىندا وڭتۇستىك افريكادان 0-1 ەسەبىمەن جەڭىلىپ، سىنعا ۇشىرادى.

سوڭعى ەكى جىل بويى كوماندانى باسقارعان حون ميون بو جانكۇيەرلەردىڭ سىنىنا قالدى. دۇيسەنبىدە ۇلتتىق قۇرامانىڭ رەسمي جانكۇيەرلەر كلۋبى «قىزىل شايتاندار» حوننىڭ «ۇلت الدىندا تىزە بۇگىپ، فۋتبول الەمىنەن ماڭگىلىككە كەتۋىن» تالاپ ەتەتىن مالىمدەمە جاسادى.

جەكسەنبىدە مەكسيكادا وتكەن ءباسپاسوز ءماسليحاتىندا حون: «ءبىز جانكۇيەرلەر كۇتكەن ناتيجەلەردى كورسەتە المادىق»، - دەدى.

ول: «مەن ۇلتتىق قۇرامادان كەتسەم دە، فۋتبول سالاسىنان تولىعىمەن كەتپەيمىن. مەن ۇلتتىق قۇراماعا شىن جۇرەكتەن جانكۇيەر بولامىن جانە كوماندا تاعى دا حالىقتىڭ سەنىمى مەن سۇيىسپەنشىلىگىنە يە بولادى دەپ ۇمىتتەنەمىن»، - دەدى.

وعان دەيىن پرەزيدەنت لي چجە ميون بۇل كۇتپەگەن ناتيجەگە «تاڭ قالىپ قانا قويماي، سونىمەن قاتار ونى ابسۋرد دەپ تاپقانىن» مالىمدەگەن.

ول X الەۋمەتتىك مەديا پلاتفورماسىندا كوماندانىڭ ەرتە كەتۋى «ۇيىمداستىرۋشىلىق جانە كادرلىق كەمشىلىكتەرگە بايلانىستى سياقتى» دەپ جازدى.

حون ميون بونىڭ تاعايىندالۋى اۋەلدە-اق داۋ تۋدىرعان ەدى. بۇرىنعى قورعاۋشى 2002 جىلعى الەم چەمپيوناتىندا وڭتۇستىك كورەيانى جارتىلاي فينالعا الىپ شىعىپ، ۇلتتىق قاھارمانعا اينالعان ەدى. دەگەنمەن، ول 2014 جىلى باس باپكەر بولىپ تاعايىندالعان كەزدە، كوماندا پلەي-وفف كەزەڭىنە ءوتۋ بىلاي تۇرسىن، بىردە-ءبىر ويىندا جەڭىسكە جەتە المادى.

ونىڭ 2024 جىلى باس باپكەرلىككە قايتا ورالۋى قاتتى نارازىلىق تۋدىردى. كوپتەگەن جانكۇيەرلەر  كورەيا فۋتبول قاۋىمداستىعىنىڭ (كفا) شەشىمىن سىناپ،  قاتاڭ ىرىكتەۋ پروتسەستەرىنەن وتكەن بىرنەشە شەتەلدىك ۇمىتكەرلەردى قابىلداماعانىنا نارازىلىق ءبىلدىردى.

حون ميون بو جەكسەنبى كۇنگى مالىمدەمەسىندە: «مەن ءاربىر شەشىم دۇرىس بولدى دەپ ايتا المايمىن، بىراق مەنىڭ ءاربىر شەشىمىم كورەيا فۋتبولىنىڭ مۇددەلەرىنە نەگىزدەلگەنىن ايتا الامىن» دەپ اقتالدى.

Abai.kz