تالدىقورعان قالاسىنداعى قاراتال جاعالاۋىندا ۇلتتىق دومبىرا كۇنىنە ارنالعان «دومبىرا – دالا جۇرەگى» اتتى مادەني ءىس-شارا ءوتتى. شاراعا 2000-عا جۋىق تۇرعىن مەن قالا قوناقتارى قاتىستى.

ءىس-شارا اياسىندا كورەرمەندەردىڭ قاتىسۋىمەن ۇلتتىق ونەردى ناسيحاتتاۋعا باعىتتالعان تانىمدىق-ينتەراكتيۆتى ويىن ۇيىمداستىرىلدى. قاتىسۋشىلار قازاقتىڭ ءداستۇرلى ونەرى، كۇيشىلىك مۇراسى، دومبىرا تاريحى مەن ۇلتتىق مادەنيەتكە قاتىستى سۇراقتارعا جاۋاپ بەرىپ، ءوز بىلىمدەرىن سىنادى.

ويىن قورىتىندىسى بويىنشا بەلسەندىلىك تانىتىپ، جوعارى ناتيجە كورسەتكەن 10 قاتىسۋشىعا ۇلتتىق ونەردى قولداۋ جانە ناسيحاتتاۋ ماقساتىندا دومبىرالار سالتاناتتى تۇردە تابىستالدى.

اتالعان ءىس-شارانىڭ نەگىزگى ماقساتى – قازاق حالقىنىڭ رۋحاني مۇراسى سانالاتىن قاسيەتتى دومبىرانى ۇلىقتاۋ، ۇلتتىق ونەردى كەڭىنەن ناسيحاتتاۋ، جاس ۇرپاقتىڭ ۇلتتىق قۇندىلىقتارعا دەگەن قىزىعۋشىلىعىن ارتتىرۋ جانە ۇلتتىق مادەنيەتتى دارىپتەۋ.

Abai.kz