كاسپي قۇبىر كونسورتسيۋمى (كتك) — قازاقستاندىق مۇنايدىڭ باستى باعىتى — 21 شىلدەدە تانكەرلەرگە جاسالعان درون شابۋىلدارىنا بايلانىستى شيكىزات قابىلداۋدى توقتاتتى. بۇل تۋرالى Reuters اگەنتتىگىنە دەرەككوزدەر حابارلادى.

شىلدە ايىندا نوۆوروسسيسك ماڭىنداعى يۋجنايا وزەرەەۆكادا ورنالاسقان كتك تەڭىز تەرمينالىندا 5 تانكەر درون شابۋىلىنا ۇشىرادى.

كتك 20 شىلدەدە شيكىزات تيەۋدىڭ توقتاتىلعانى تۋرالى حابارلادى، بىراق ىقتيمال زاقىمدانۋلار نەمەسە تەرمينال جۇمىسىنىڭ قانداي دا ءبىر ىركىلىستەرى تۋرالى ناقتىلامادى.

كونسورتسيۋمداعى 15 پايىزدىق ۇلەسكە يە Chevron كومپانياسى جاعدايدى ءجىتى باقىلاپ وتىرعانىن مالىمدەدى:

«Chevron كتك توڭىرەگىندەگى جاعدايدى باقىلاۋدى جالعاستىرۋدا. قىزمەتكەرلەردىڭ قاۋىپسىزدىگى مەن دەنساۋلىعىن قورعاۋ — ءبىزدىڭ باستى باسىمدىعىمىز. كتك-عا قاتىستى قوسىمشا تۇسىنىكتەمەلەردى تىكەلەي وسى كومپانيادان العان ءجون»، — دەلىنگەن كومپانيانىڭ رەسمي تۇسىنىكتەمەسىندە.

Reuters كتك-نىڭ تۇسىنىكتەمە بەرۋدەن باس تارتقانىن العا تارتادى.

بۇعان دەيىن قر ەنەرگەتيكا مينيسترلىگى نوۆوروسسيسك ماڭىنداعى كتك تەڭىز تەرمينالىندا مۇناي تيەپ جاتقان NELSA تانكەرىنە ۇشقىشسىز ۇشۋ اپپاراتتارى شابۋىل جاساعانىن راستاعان ەدى. بۇل وقيعا قر سىرتقى ىستەر مينيسترلىگى مەن ەنەرگەتيكا مينيسترلىگى قارا تەڭىزدەگى تانكەرلەرگە جاسالعان بۇرىنعى شابۋىلداردى ايىپتاعاننان كەيىن ورىن الدى.

ۋكراينانىڭ قازاقستانداعى ەلشىسى ۆيكتور مايكو كتك تەڭىز تەرمينالىندا قازاقستاندىق مۇنايدى تيەپ جاتقان تانكەرلەرگە جاسالعان درون شابۋىلدارى كيەۆتىڭ «مۇددەسىنە ساي كەلمەيتىنىن» مالىمدەدى.

Abai.kz