قازاقستاندىق جۇكتەر كاراچي، كاسيم جانە گۆادار پورتتارى ارقىلى ءوتۋى مۇمكىن. پاكىستان بۇل ءۇشىن ءوزىنىڭ ينفراقۇرىلىمىن ۇسىنۋعا جانە ەركىن ەكونوميكالىق ايماقتارداعى بىرلەسكەن جوبالاردى تالقىلاۋعا دايىن.

بۇل ۇسىنىستى پاكىستاننىڭ تەڭىز ىستەرى ءمينيسترى مۋحامماد دجۋنايد انۆار چاۋدحري قازاقستان ەلشىسى ەرجان قىستافينمەن كەزدەسۋدە ءبىلدىردى.

«پاكىستاننىڭ تەڭىز پورتتارى قازاقستان ءۇشىن جانە بۇكىل ورتالىق ازيا ءوڭىرى ءۇشىن پارسى شىعاناعى، افريكا جانە وڭتۇستىك-شىعىس ازيا نارىقتارىنا جول اشاتىن ترانزيتتىك حابتارعا اينالا الادى»، — دەدى مينيستر.

تاراپتار قازاقستاندىق جۇكتەردى تاسىمالداۋدى جەڭىلدەتۋ جانە بەيىندى ۆەدومستۆولار اراسىنداعى ءوزارا ءىس-قيمىلدى جولعا قويۋ ماسەلەلەرىن تالقىلادى. دەگەنمەن، ءالى كەلىسىمدەر جاسالعان جوق.

قازىرگى ۋاقىتتا قازاقستان نەگىزگى ءۇمىتتى يرانعا ارتىپ وتىر. بەندەر-ابباس پورتىندا رەسپۋبليكا 15 گەكتار جەردى جالعا الىپ، جۇك تەرمينالىن سالۋدى جوسپارلاپ وتىر.

بۇل باعىت ەلگە پارسى شىعاناعىنا، ال ول ارقىلى ۇندىستانعا، شىعىس افريكاعا جانە وڭتۇستىك-شىعىس ازيا ەلدەرىنە شىعۋعا مۇمكىندىك بەرۋى ءتيىس.

قازاقستان بيلىگى بۇعان دەيىن پاكىستان باعىتىن قوسالقى نۇسقا رەتىندە اتاعان بولاتىن. ۆيتسە-پرەمەر سەرىك جۇمانعارين بۇل باعىت يران ارقىلى وتەتىن باعدار جۇمىس ىستەمەگەن جاعدايدا ىسكە قوسىلۋى مۇمكىن ەكەنىن ايتقان. ول جاعدايدا پاكىستاندىق پورتتارعا باراتىن جولدى اۋعانستان ارقىلى سالۋعا تۋرا كەلەدى.

Abai.kz