قازاقستان: باعانىڭ ماۋسىمدىق تومەندەۋى بايقالۋدا
2026 جىلعى 29 شىلدەدەگى جاعداي بويىنشا قازاقستاندا ەسەپتى اپتا ىشىندە الەۋمەتتىك ماڭىزى بار ازىق-تۇلىك تاۋارلارىنىڭ بىرقاتارىنىڭ باعاسى تومەندەدى.
اپتا ىشىندە كارتوپتىڭ باعاسى - 2,8%، قىزاناق - 2,4%، الما - 1,9%، قيار - 1,2%، ءسابىز، قايماق جانە قارا شاي – 0,2%، سونداي-اق تاۋىق ەتى، قاتتى جانە جارتىلاي قاتتى ىرىمشىك، مايلىلىعى 2-3% ايران - 0,1% ارزاندادى.
ەسەپتى اپتادا ۇن، ءبىرىنشى سۇرىپتى ۇننان پىسىرىلگەن بيداي نانى، جىلقى ەتى، سۇيەكتى سيىر ەتى، سونداي-اق مايلىلىعى 2,2%-دان 6%-عا دەيىنگى پاستەرلەنگەن، ۋلتراپاستەرلەنگەن جانە ستەريلدەنگەن ءسۇت باعاسى وزگەرىسسىز قالدى.
وڭىرلىك بولىنىستە ەلىمىزدىڭ بىرقاتار قالالارىندا دەفلياتسيالىق ءۇردىس بايقالدى. الەۋمەتتىك ماڭىزى بار ازىق-تۇلىك تاۋارلارىنىڭ جالپى باعاسى پاۆلوداردا – 0,4%، الماتى، شىمكەنت جانە اقتاۋدا – 0,2%، قوناەۆ پەن قوستانايدا – 0,1%-عا تومەندەدى. استانا، اقتوبە، جەزقازعان، كوكشەتاۋ، قاراعاندى، قىزىلوردا، تاراز جانە تۇركىستان قالالارىندا باعالار وتكەن اپتانىڭ دەڭگەيىندە ساقتالدى.
رەسپۋبليكا بويىنشا قياردىڭ ورتاشا باعاسى ءبىر كيلوگرامىنا 495 تەڭگەنى قۇرادى. ەڭ تومەن باعا تاراز قالاسىندا تىركەلدى - بىر كيلوگرامى 339 تەڭگە.
ەل بويىنشا كارتوپتىڭ ورتاشا باعاسى ءبىر كيلوگرامىنا 275 تەڭگەنى قۇرادى. ەڭ تومەن باعا تۇركىستاندا تىركەلدى – ءبىر كيلوگرامى 219 تەڭگە.
رەسپۋبليكا بويىنشا ءى ساناتتاعى جۇمىرتقانىڭ ورتاشا باعاسى (10 دانا) 567 تەڭگەنى قۇرادى. ەڭ قولجەتىمدى باعالار ورالدا (475 تەڭگە) جانە قىزىلوردادا (477 تەڭگە) تىركەلدى.
الەۋمەتتىك ماڭىزى بار ازىق-تۇلىك تاۋارلارى باعالارى يندەكسىنىڭ كورسەتكىشى اپتا سايىن ەسەپتەلەدى. باعالاردى باقىلاۋ بارلىق وبلىس ورتالىقتارىندا، رەسپۋبليكالىق ماڭىزى بار قالالاردا جانە استانادا جۇرگىزىلەدى. الەۋمەتتىك ماڭىزى بار ازىق-تۇلىك تاۋارلارى باعاسىنىڭ ديناميكاداعى وزگەرىستەرىن قازاقستان رەسپۋبليكاسى ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنىڭ سايتىنان جانە «تالداۋ» اقپاراتتىق-تالداۋ جۇيەسىنەن كورۋگە بولادى.
*الەۋمەتتىك ماڭىزى بار ازىق-تۇلىك تاۋارلارىنىڭ تىزبەسى قازاقستان رەسپۋبليكاسى ساۋدا جانە ينتەگراتسيا ءمينيسترىنىڭ 2025 جىلعى 23 جەلتوقسانداعى №362-نق بۇيرىعىمەن بەكىتىلگەن جانە 31 اتاۋداعى ازىق-تۇلىك ونىمدەرىن قامتيدى.
Abai.kz
