مەملەكەت باسشىسى قاسىم-جومارت توقاەۆ تەلەكوپىر ارقىلى «قىزىلوردا – سەكسەۋىل»، «ۇلعايسىن – سەكسەۋىل» جانە «بەينەۋ – سەكسەۋىل» اۆتوكولىك جولدارىنىڭ قۇرىلىسىن باستاپ بەردى.

پرەزيدەنت «قىزىلوردا – سەكسەۋىل»، «ۇلعايسىن – سەكسەۋىل» جانە «بەينەۋ – سەكسەۋىل» اۆتوكولىك جولدارى قۇرىلىسىنىڭ باستالۋىنا ارنالعان تەلەكوپىردە ءسوز سويلەدى.

قاسىم-جومارت توقاەۆ كولىك-لوگيستيكا سالاسى توعىز جولدىڭ تورابىندا تۇرعان قازاقستاننىڭ ءوسىپ-وركەندەۋىنە سەرپىن بەرەتىن ماڭىزدى باعىت ەكەنىنە توقتالىپ، بۇگىن ەلىمىز ءۇشىن ستراتەگيالىق ءمانى ايرىقشا اۋقىمدى جوبالاردىڭ قۇرىلىسى باستالاتىنىن مالىمدەدى.

– «جول – تىرشىلىكتىڭ كۇرەتامىرى». مەملەكەت وسى سالانى دامىتۋعا ءاردايىم باسا نازار اۋدارادى. ءبىزدىڭ ماقساتىمىز – قازاقستاندى ەۋرازياداعى نەگىزگى ترانزيت حابى رەتىندە دامىتۋ. مەن مۇنى ۇنەمى ايتىپ ءجۇرمىن. بارشاڭىزعا بەلگىلى، ەلىمىز ەۋروپا مەن ازيانى جالعايتىن نەگىزگى كوپىر سانالادى. باتىس پەن شىعىس اراسىندا قۇرلىقپەن تاسىمالداناتىن جۇكتىڭ باسىم بولىگى قازاقستان ارقىلى وتەدى. سوندىقتان وزىق جانە زاماناۋي كولىك جۇيەسىن قالىپتاستىرۋ – الدىمىزدا تۇرعان ستراتەگيالىق مىندەت. جالپى، ەلىمىزدە بۇل باعىتتا كوپتەگەن شارۋا اتقارىلىپ جاتىر. بىلتىر «دوستىق – مويىنتى» تەمىر جولىنىڭ ەكىنشى جەلىسى ىسكە قوسىلدى. سونىڭ ارقاسىندا جۇك تاسىمالى كولەمى 5 ەسە ارتتى. سونداي-اق الماتى بەكەتىن اينالىپ وتەتىن تەمىرجول جەلىسى جۇمىس ىستەي باستادى، ناتيجەسىندە جۇك جەتكىزۋ مەرزىمى ايتارلىقتاي قىسقاردى. ەڭ باستىسى، وسىنداي اۋقىمدى جوبالاردى ءوز ماماندارىمىز جۇزەگە اسىرىپ جاتىر، – دەدى مەملەكەت باسشىسى.

پرەزيدەنتتىڭ ايتۋىنشا، بۇل جۇمىستىڭ ءبارى قازاقستاننىڭ كولىك-لوگيستيكا سالاسىنداعى الەۋەتى زور ەكەنىن كورسەتەدى.

– وتكەن جىلى ەلىمىزدەگى جالپى تاسىمال كولەمى 6 پايىزعا ارتىپ، شامامەن 37 ميلليون توننا بولدى. بيىل «مويىنتى – قىزىلجار» جانە «داربازا – ماقتاارال»، ال كەلەسى جىلى «باقتى – اياگوز» تەمىرجول جەلىسىنىڭ قۇرىلىسى اياقتالادى. بۇدان بولەك، ءبىز اۆتوكولىك سالاسىنا ەرەكشە نازار اۋدارىپ وتىرمىز. سوڭعى جىلدارى قازاقستاندا تاس جولداردى تۇبەگەيلى جاڭعىرتۋ جۇمىسى قولعا الىندى. بىرقاتار ءىرى ينفراقۇرىلىمدىق جوبا تابىستى اياقتالدى. «باتىس ەۋروپا – باتىس قىتاي»، «قاراعاندى – الماتى»، «ورتالىق – وڭتۇستىك»، «اتىراۋ – استراحان»، «تالدىقورعان – وسكەمەن»، «قالباتاۋ – مايقاپشاعاي» باعىتىنداعى جولدار – سونىڭ ايقىن دالەلى. كەيىنگى 5 جىلدا اۆتوكولىكپەن جۇك تاسىمالداۋ كولەمى ەكى ەسە ارتتى. بىلتىر وسى قىزمەت تۇرىنەن تۇسەتىن تابىس 1,5 تريلليون تەڭگەگە جەتتى. وزدەرىڭىز بىلەسىزدەر، ەلىمىز ارقىلى 8 حالىقارالىق ءدالىز وتەدى. بۇل جولمەن كۇن سايىن 35 مىڭعا جۋىق اۆتوكولىك جۇرەدى. وتكەن جىلى 13 مىڭ شاقىرىم اۆتوكولىك جولىن سالۋ جانە جوندەۋ جۇمىسى جۇرگىزىلدى. سونىڭ 6 مىڭ شاقىرىمى حالىق يگىلىگىنە بەرىلدى. كەلەسى جىلى اۆتوكولىكتەردى وتكىزۋ بەكەتتەرى تولىق جاڭارتىلادى. مۇنداي اۋقىمدى جۇمىس تاۋەلسىزدىك تاريحىندا العاش رەت جۇزەگە اسىرىلىپ وتىر، – دەدى قاسىم-جومارت توقاەۆ.

مەملەكەت باسشىسى قازىر قازاقستاننىڭ ءار ايماعىندا اۆتوجولدار جوندەلىپ جاتقانىن اتاپ ءوتتى.

– جاقىندا سارىاعاش اينالما جولىنىڭ قۇرىلىسى مەن «جەزقازعان – قاراعاندى» اۆتوجولىن جوندەۋ جۇمىسى باستالدى. سونىمەن قاتار ەلىمىز بويىنشا كوپتەگەن تۇرعىن ءۇي، مەكتەپ، اۋرۋحانا، ينجەنەرلىك جەلى سالىنىپ جاتىر، باسقا دا الەۋمەتتىك نىساندار بوي كوتەرۋدە. ءبىر سوزبەن، قازاقستان ۇلكەن قۇرىلىس الاڭىنا اينالاتىن بولدى. بۇل مەملەكەتىمىزدىڭ ءوسىپ-وركەندەۋ جولىنا ءتۇسىپ، جاڭا دامۋ كەزەڭىنە قادام باسقانىن كورسەتەدى، – دەدى پرەزيدەنت.

قاسىم-جومارت توقاەۆ «بەينەۋ – سەكسەۋىل» باعىتىندا 800 شاقىرىمدىق تۇبەگەيلى جاڭا جولدىڭ قۇرىلىسى باستالعانىنا توقتالىپ، بۇل باعداردى حالىقارالىق اۋقىمداعى اۆتوجول دەپ اتادى.

– وسى جول ەل ايماقتارى اراسىنداعى بايلانىستى نىعايتا وتىرىپ، قىتاي مەن ەۋروپانى جالعايتىن «التىن كوپىر» رەتىندە قىزمەت ەتەدى. بۇل جوبا قىتاي شەكاراسىنداعى وتكىزۋ بەكەتتەرىن اقتاۋ، قۇرىق پورتتارىمەن تىكەلەي بايلانىستىرادى. سونىڭ ناتيجەسىندە قىتايدان ەۋروپاعا دەيىن جۇك تاسىمالداۋ ۇزاقتىعى 1 مىڭ شاقىرىمعا، ال جۇك جەتكىزۋ مەرزىمى 3 تاۋلىككە دەيىن قىسقارادى. حالقىمىزدىڭ تانىم-تۇسىنىگىندە قۇدىق قازۋ، كوپىر سالۋ ساۋاپتى ءىس سانالادى. وسى تۇرعىدان الىپ قاراساق، ءبىز يگىلىگى بارشاعا ورتاق، ياعني ءوزىمىز دە، وزگەلەر دە پايداسىن كورەتىن اسا جاۋاپتى جۇمىستى باستاپ وتىرمىز. «بەينەۋ – سەكسەۋىل» باعىتى رەسپۋبليكالىق، ايماقتىق، قۇرلىقتىق دەڭگەيدەگى ماڭىزدى جول بولارى انىق. سوندىقتان بۇل جولدى «ارال-كاسپي ماگيسترالى» دەپ اتاعان دۇرىس، – دەدى مەملەكەت باسشىسى.

سونىمەن قاتار پرەزيدەنت جالپى ۇزاقتىعى 774 شاقىرىمدى قۇرايتىن «قىزىلوردا – سەكسەۋىل»، «ۇلعايسىن – سەكسەۋىل» جولدارىن كەڭەيتۋ، تۇبەگەيلى جاڭعىرتۋ جۇمىستارى باستالعانىن مالىمدەدى.

– بۇل جولداردىڭ قۇرىلىسىمەن وتاندىق كومپانيالار اينالىسادى. قۇرىلىس جۇمىستارىنا 10 مىڭنان استام جۇمىسشى تارتىلادى. جولدار تولىق سالىنىپ بىتكەن سوڭ جۇك تاسىمالى 2,5 ەسە ارتىپ، جىلىنا 13,2 ميلليون تونناعا جەتەدى. بۇل جوبالار ەل ەكونوميكاسىن وركەندەتۋگە، ءتۋريزمدى دامىتۋعا تىڭ سەرپىن بەرىپ، حالىقتىڭ ءال-اۋقاتىن ارتتىرۋعا سەپتىگىن تيگىزەرى ءسوزسىز. وسىنداي جوبالاردىڭ ارقايسىسى تۇتاس قازاقستاننىڭ كولىك جۇيەسىمەن ۇيلەسەدى. بۇعان دەيىن نەگىزىنەن سولتۇستىكتەن وڭتۇستىككە تارتىلعان كولىك جەلىلەرى ەندى شىعىستان باتىسقا قاراي باعىتتالعان جاڭا تارماقتارمەن كەڭەيىپ جاتىر. باستى ماقسات – ەلىمىزدى ەۋروپا مەن ازيانى جالعاستىراتىن جەتەكشى لوگيستيكالىق جەلىنىڭ بىرىنە اينالدىرۋ. قازاقستانداعى اۆتوكولىك تاسىمالى سالاسى تابىسى جاعىنان تەمىرجول كولىگىمەن تەڭەستى. سوندىقتان جولدىڭ قۇرىلىسىن جۇرگىزۋمەن بىرگە زاماناۋي تسيفرلىق ەكوجۇيە قۇرۋ ماڭىزدى مىندەت سانالادى. جەرگىلىكتى ءاۆتووندىرىستى تارتا وتىرىپ، وتاندىق تاسىمالداۋشىلاردى قولداۋدىڭ ۇلتتىق باعدارلاماسىن قابىلداۋ الەۋەتتى ەسەلەيدى. مۇنىڭ ءبارى قازاقستاننىڭ ترانزيتتىك مۇمكىندىكتەرىن كەڭەيتە تۇسەدى. ارال ماڭىنداعى يەن دالامەن تارتىلىپ جاتقان جولدار بۇعان دەيىن تۇيىق نۇكتە سانالىپ كەلگەن باعىتتاردى ەۋرازيانىڭ نەگىزگى كولىك دالىزدەرىنىڭ توعىسىنا اينالدىرادى. بۇگىن باستاۋ الىپ جاتقان جۇمىستى ۋاقتىلى، ياعني 2029 جىلدان كەشىكتىرمەي اياقتاۋ وتە ماڭىزدى. قاجەتتى جاعدايدىڭ بارلىعى جاسالىپ جاتىر. ەندى بىلەك سىبانا جۇمىسقا كىرىسۋ كەرەك. ءبىز ءبىر ەل بولىپ، بۇل مىندەتتى ويداعىداي جۇزەگە اسىرامىز. مەن بۇعان كامىل سەنەمىن. بارشاڭىزعا اماندىق، ساتتىلىك جانە تابىس تىلەيمىن! – دەدى قاسىم-جومارت توقاەۆ.

تەلەكوپىر بارىسىندا پرەمەر-ءمينيستردىڭ ءبىرىنشى ورىنباسارى نۇرلىبەك نالىباەۆ، اقتوبە وبلىسىنىڭ اكىمى اسحات شاحاروۆ، ماڭعىستاۋ وبلىسىنىڭ اكىمى نۇرداۋلەت قيلىباي جوبانى باستاۋعا ازىرلىك جونىندە باياندادى. بۇدان بولەك قىزىلوردا وبلىسى ارداگەرلەر كەڭەسىنىڭ توراعاسى سەرىك دۇيسەنباەۆ ءسوز سويلەپ، پرەزيدەنتكە ءوڭىر تۇرعىندارىنىڭ ريزاشىلىعىن جەتكىزدى.

Abai.kz