«شىعىس» وڭىرلىك قولباسشىلىعىنا قاراستى 6699 اسكەري بولىمىندە اسكەري انت قابىلداۋ ءراسىمى ءوتتى.

وتان الدىنداعى قاسيەتتى بورىشىن ادال اتقارۋعا سەرت بەرگەن سالتاناتتى شاراعا ساربازداردىڭ اتا-انالارى، ارداگەرلەر، اسكەري ءبولىم باسشىلىعى جانە «شىعىس» وڭىرلىك قولباسشىلىعىنىڭ قولباسشىسى گەنەرال-مايور ارمان جۇماعاليەۆ قاتىستى. قولباسشى ەل قاۋىپسىزدىگىن قامتاماسىز ەتۋ ءۇشىن انت قابىلداعان جاۋىنگەرلەرگە جۇرەكجاردى جىلى لەبىزىن جولدادى. بيىلعى سالتاناتتى شارانىڭ ەرەكشەلىگى – وتان الدىنداعى بورىشىن وتەۋگە كەلگەن ەكى جۇزگە جۋىق جاس ساربازمەن بىرگە تانىمال ايتىسكەر، رەسپۋبليكالىق جانە حالىقارالىق ايتىستاردىڭ جەڭىمپازى جۇلدىزاي ماراتبەكوۆانىڭ دا اسكەري انت قابىلداۋى بولدى. جۇلدىزاي ماراتبەكوۆا اسكەري بولىمدە كادر جانە ساپتىق بولىمشەسىنىڭ اعا مامانى لاۋازىمىندا قىزمەت اتقارادى.

– بالا كەزىمنەن اسكەري قىزمەتشى بولۋدى ارماندادىم. كەيىن ءسوز ونەرىنە دەگەن قىزىعۋشىلىعىمنىڭ ارقاسىندا قازاق ءتىلى مەن ادەبيەتى ءپانىنىڭ مۇعالىمى ماماندىعىن مەڭگەرىپ، مەكتەپتە ۇستازدىق ەتتىم. دەگەنمەن اسكەري قىزمەتكە دەگەن قۇلشىنىسىم مەنى بۇگىن ۇلتتىق ۇلان قاتارىنا الىپ كەلدى. ەندى ەل قاۋىپسىزدىگى جولىندا ادال قىزمەت ەتۋگە بار كۇش-جىگەرىمدى سالامىن، – دەدى قاتارداعى جۇلدىزاي ماراتبەكوۆا.

سالتاناتتى ءراسىم بارىسىندا ايتىسكەر دومبىرامەن ارنايى ارناۋ ورىنداپ، اسكەري انت قابىلداعان جاس ساربازدارعا اق جول تىلەدى. ول ءوز جىرىندا وتانعا ادال قىزمەت ەتۋدىڭ ماڭىزىن دارىپتەپ، جاستاردى ەلجاندىلىق پەن پاتريوتتىق رۋحقا ۇندەدى.

ايتا كەتەيىك، وسكەمەن قالاسىنداعى 6699 اسكەري بولىمىندە اسكەري قىزمەتىن وتەيتىن جاس ساربازدار اباي، الماتى، تۇركىستان، جامبىل جانە سولتۇستىك قازاقستان وبلىستارىنان شاقىرىلعان.

«شىعىس» وڭىرلىك قولباسشىلىعىنىڭ ءباسپاسوز قىزمەتى

Abai.kz