ەڭ تومەنگى جالاقى، اليمەنت، ەكولوگيا: جەتى پارتيا سايلاۋشىلارمەن نەنى تالقىلاپ جاتىر؟
سايلاۋالدى ناۋقان اياسىندا ساياسي پارتيالار ەلىمىزدىڭ ءار وڭىرىندە ءتۇرلى ءىس-شارا وتكىزىپ جاتىر. كەزدەسۋلەرگە ەڭبەك ۇجىمدارى، قوعامدىق ۇيىمداردىڭ وكىلدەرى، كاسىپكەرلەر، ساراپشىلار قاۋىمى مەن تۇرعىندار قاتىسادى. ءىس-شارا بارىسىندا الەۋمەتتىك قورعاۋ، ەكونوميكانى دامىتۋ، وتاندىق ءوندىرىستى قولداۋ، قۇقىقتىق مەملەكەتتى نىعايتۋ جانە مەملەكەتتىك ساياساتتىڭ وزگە دە باسىم باعىتتارى تالقىلانىپ ءجۇر.
«ادىلەت» پارتياسى اقتوبە وبلىسىندا بىرقاتار ءىس-شارا وتكىزدى. رەسپۋبليكالىق سايلاۋالدى شتاب وكىلدەرى ەڭبەك ۇجىمدارىمەن، كاسىپكەرلەرمەن، جاستارمەن جانە قوعام بەلسەندىلەرىمەن كەزدەستى. كەزدەسۋلەردە وتباسىنى قولداۋ، انا مەن بالا دەنساۋلىعىن قورعاۋ، ايەلدەر كاسىپكەرلىگىن دامىتۋ، ايەلدەر مەن بالالاردىڭ قۇقىعىن قورعاۋ، سونداي-اق ايەلدەردىڭ قوعامدىق جانە مەملەكەتتىك ىستەگى بەلسەندىلىگى تالقىلاندى. سونىمەن قاتار فورۋمعا قاتىسۋشىلار مۇمكىندىگى شەكتەۋلى جانداردى الەۋمەتتىك قولداۋ، قۇقىقتىق مەملەكەتتى دامىتۋ، سوت جۇيەسىنىڭ تاۋەلسىزدىگى، قۇقىقتىق مادەنيەتتى قالىپتاستىرۋ جانە زاڭعا قۇرمەتپەن قاراۋ ماسەلەسىن كوتەردى. كەزدەسۋ بارىسىندا قاتىسۋشىلار ۇسىنىس ءبىلدىرىپ، باستامالارىن ورتاعا سالدى.
جالپىۇلتتىق سوتسيال-دەموكراتيالىق پارتيا وسكەمەن قالاسىندا كاسىپوداق ۇيىمدارىنىڭ وكىلدەرى، ساراپشىلاردىڭ، قۇرىلتاي دەپۋتاتتىعىنا ۇمىتكەرلەردىڭ قاتىسۋىمەن رەسپۋبليكالىق كاسىپوداقتار كونگرەسىن وتكىزدى. ءىس-شارادا ەڭ تومەنگى جالاقى مولشەرى، تۇتىنۋ سەبەتى، وندىرىستە جاراقات العان قىزمەتكەرلەردى الەۋمەتتىك قولداۋ، زياندى ءوندىرىس ورىندارىندا جۇمىس ىستەيتىن قىزمەتكەرلەردىڭ زەينەتاقى الۋى جانە كاسىپورىنداردىڭ الەۋمەتتىك جاۋاپكەرشىلىگى ماسەلەسى تالقىلاندى. سونىمەن قاتار ينكليۋزيا مەن الەۋمەتتىك قورعاۋ ماسەلەلەرىنە ەرەكشە نازار اۋدارىلدى.
«بايتاق» جاسىلدار پارتياسى ەكولوگيا جانە حالىقپەن ءوزارا ءىس-قيمىل ماسەلەسىنە ارنالعان ءىس-شارالارىن جالعاستىردى. الماتى وبلىسىندا مەملەكەتتىك ورگانداردىڭ وكىلدەرى، عالىمدار مەن ەكولوگتاردىڭ قاتىسۋىمەن ىلە وزەنى مەن بالقاش كولىنىڭ ەكوجۇيەسىن ساقتاۋ ماسەلەلەرى بويىنشا دوڭگەلەك ۇستەل ءوتتى. كەزدەسۋ بارىسىندا سۋ رەسۋرستارىنىڭ قازىرگى جاي-كۇيى جانە الداعى بىرلەسكەن جۇمىستىڭ ىقتيمال باعىتتارى تالقىلاندى. سونىمەن قاتار پارتيا كانديداتتارى استاناداعى بەلسەندى ۇزاق ءومىر ءسۇرۋ ورتالىعىنىڭ مۇشەلەرىمەن جانە ۇلتتىق عىلىمي مەديتسينالىق ورتالىقتىڭ ۇجىمىمەن كەزدەسىپ، ەكولوگيالىق ماسەلەلەردى تالقىلادى. قىزىلوردا وبلىسىندا پارتيا وكىلدەرى قىزىلوردا – ارال باعىتى بويىندا تۇرعىندارمەن كەزدەسۋ وتكىزدى.
قازاقستاننىڭ حالىق پارتياسى الەۋمەتتىك قورعاۋ، ينكليۋزيا جانە وتباسىلاردى قولداۋ ماسەلەلەرىنە ارنالعان كەزدەسۋلەرىن جالعاستىردى. پارتيا وكىلدەرى «چۋۆستۆۋيا جيزن» زاعيپ جانە ناشار كورەتىن بالالار ورتالىعىندا بارىپ، قولجەتىمدى ورتا قالىپتاستىرۋ جانە مۇمكىندىگى شەكتەۋلى جانداردى قاجەتتى قولداۋمەن قامتاماسىز ەتۋ ماسەلەسىن تالقىلادى. سونداي-اق «قورعاۋ» داعدارىس ورتالىعىندا تۇرمىستىق زورلىق-زومبىلىقتىڭ الدىن الۋ، بالالاردى قورعاۋ جانە اليمەنت تولەۋ ماسەلەسىنە ارنالعان كەزدەسۋ ءوتتى.
«اۋىل» پارتياسى رەسپۋبليكالىق سايلاۋالدى شتاب وكىلدەرىنىڭ قۇرىلتاي دەپۋتاتتارىن سايلاۋدى باقىلاۋ ءۇشىن قازاقستانعا كەلگەن تمد-عا قاراستى مەملەكەتتەردىڭ پارلامەنتارالىق اسسامبلەياسى دەلەگاتسياسىمەن كەزدەسۋىن وتكىزدى. كەزدەسۋ بارىسىندا سايلاۋالدى ناۋقاننىڭ بارىسى، شتابتىڭ جۇمىسى، سايلاۋ ناۋقانى اياسىندا ۇيىمداستىرىلىپ جاتقان ءىس-شارالار، پارتيا باعدارلاماسىنىڭ نەگىزگى باعىتتارى، سونداي-اق سايلاۋشىلارمەن ءوزارا ءىس-قيمىل جانە سايلاۋالدى جۇمىستى قولدانىستاعى راسىمدەرگە سايكەس جۇرگىزۋ ماسەلەسى تالقىلاندى.
«اق جول» قازاقستان دەموكراتيالىق پارتياسى سايلاۋالدى ناۋقان اياسىنداعى ءىس-شارالارىن جالعاستىردى. قوستاناي قالاسىنداعى Kostanay Plaza ساۋدا-ويىن-ساۋىق ورتالىعىندا اقپاراتتىق-ءتۇسىندىرۋ اكتسياسى ءوتتى. سونىمەن قاتار مەركى قانت زاۋىتىنىڭ ەڭبەك ۇجىمىمەن كەزدەسۋ ۇيىمداستىرىلىپ، وندا ونەركاسىپتى دامىتۋ، ءوندىرىستى مەملەكەتتىك قولداۋ جانە الەۋمەتتىك ساياسات ماسەلەلەرى ءسوز بولدى.
Respublica پارتياسىنىڭ وكىلدەرى ەڭبەك ۇجىمدارىمەن كەزدەسۋلەرىن جالعاستىردى. «ۆەگا-پروم» جشس-دە وتكەن كەزدەسۋدە وتاندىق ءوندىرىستى قولداۋ، ونەركاسىپتى دامىتۋ، «ورلەۋ» مەملەكەتتىك باعدارلاماسى، كاسىپكەرلىككە قولايلى جاعداي جاساۋ، سونداي-اق ەكونوميكانى تسيفرلاندىرۋ جانە ءوندىرىس سەكتورىن دامىتۋ ماسەلەلەرى تالقىلاندى.
