الماتىدا قالالىق ارداگەرلەر كەڭەسى پرەزيديۋمىنىڭ كەڭەيتىلگەن وتىرىسى ءوتتى. جيىنعا پرەزيديۋم مۇشەلەرى، اۋداندىق ارداگەرلەر كەڭەستەرىنىڭ توراعالارى جانە قالالىق ارداگەرلەر ۇيىمدارىنىڭ بەلسەندى وكىلدەرى قاتىسىپ، الداعى قۇرىلتاي سايلاۋىنا ارداگەرلەردىڭ قاتىسۋىن ۇيىمداستىرۋ ماسەلەسىن تالقىلادى.

الماتى قالالىق ارداگەرلەر كەڭەسىنىڭ توراعاسى اقان بيجانوۆ بايانداما جاساپ، كۇن تارتىبىندەگى ماسەلەلەرگە توقتالدى. ول قالالىق جانە اۋداندىق ارداگەرلەر كەڭەستەرىنىڭ الداعى كەزەڭدەگى نەگىزگى مىندەتتەرى مەن جۇمىس باعىتتارىن ايقىندادى.

«ارداگەرلەر - قوعامداعى بىرلىك پەن ساباقتاستىقتىڭ، ەلدىك قۇندىلىقتار مەن ومىرلىك تاجىريبەنىڭ التىن كوپىرى. ولار جاس ۇرپاققا باعىت-باعدار بەرىپ، قوعامدىق كەلىسىم مەن تۇراقتىلىقتى نىعايتۋعا ۇلەس قوسىپ كەلەدى. سوندىقتان الداعى قۇرىلتاي سايلاۋىندا ارداگەرلەردىڭ ازاماتتىق بەلسەندىلىگى ەرەكشە ماڭىزعا يە. ءبىز ءاربىر ارداگەردى جانە قالا تۇرعىندارىن سايلاۋعا بەلسەندى قاتىسىپ، ءوز تاڭداۋىن جاساۋعا شاقىرامىز. بۇل - ەلىمىزدىڭ بولاشاعىنا دەگەن جاۋاپكەرشىلىگىمىزدى كورسەتەتىن ماڭىزدى قادام»، - دەدى بيجانوۆ.

(سۋرەت:ۇيىمداستىرۋشىلاردان الىندى)

ءجارىسسوز بارىسىندا اۋداندىق ارداگەرلەر كەڭەستەرىنىڭ توراعالارى مەن وزگە دە قاتىسۋشىلار پىكىرلەرىن ءبىلدىردى.

كۇن تارتىبىندەگى ءبىرىنشى ماسەلە بويىنشا ارداگەرلەر مەن تۇرعىنداردىڭ الداعى سايلاۋعا بەلسەندى قاتىسۋىن قامتاماسىز ەتۋ، سونداي-اق ءتۇسىندىرۋ جۇمىستارىن جۇرگىزۋ ماقساتىندا الماتى قالالىق ارداگەرلەر كەڭەسىنىڭ شتابى قۇرىلدى.

وتىرىس قورىتىندىسىندا الماتى قالالىق جانە اۋداندىق ارداگەرلەر كەڭەستەرىنىڭ الداعى مىندەتتەرى مەن جۇمىس باعىتتارىن ايقىندايتىن ءتيىستى شەشىمدەر قابىلداندى.

Abai.kz