بۇگىن قازاقستان رەسپۋبليكاسى ىشكى ىستەر مينيسترلىگى مەن “كىتاپ وقيتىن ۇلت – چيتايۋششايا ناتسيا” قوعامدىق قورى “كىتاپ وقيتىن ۇلت” رەسپۋبليكالىق جوباسىن بىرلەسىپ جۇزەگە اسىرۋعا باعىتتالعان ىنتىماقتاستىق تۋرالى مەموراندۋمعا قول قويدى، — دەپ حابارلايدى.

قۇجاتقا قازاقستان رەسپۋبليكاسى ىشكى ىستەر ءمينيسترىنىڭ ورىنباسارى ايدار سايتبەكوۆ پەن “كىتاپ وقيتىن ۇلت - چيتايۋششايا ناتسيا” قوعامدىق قورىنىڭ توراعاسى باقىتجان تۇرلىبەكوۆ قول قويدى.

جوبا مەملەكەت باسشىسىنىڭ كىتاپ وقۋ مادەنيەتىن دامىتۋ جونىندەگى جارلىعىن ىسكە اسىرۋ، سونداي-اق قوعامدا جوعارى قۇقىقتىق مادەنيەتتى قالىپتاستىرۋعا، زاڭدى قۇرمەتتەۋ جانە ونى ساقتاۋدىڭ ماڭىزىن ازاماتتاردىڭ سانالى تۇردە تۇسىنۋىنە باعىتتالعان “زاڭ مەن ءتارتىپ” تۇجىرىمداماسى اياسىندا جۇزەگە اسىرىلۋدا.

مەموراندۋمعا سايكەس ىشكى ىستەر ورگاندارىنىڭ قىزمەتكەرلەرى “كىتاپ وقيتىن مەملەكەتتىك قىزمەتشى” ارنايى باعىتى بويىنشا وتەتىن “كىتاپ وقيتىن ۇلت” رەسپۋبليكالىق كىتاپ وقۋ مارافونىنا قاتىسادى. التى اي ىشىندە قاتىسۋشىلار 15 كىتاپ وقىپ، وزدەرىنىڭ اسەرلەرىمەن ءبولىسىپ، جوبا اياسىنداعى زياتكەرلىك ءىس-شارالارعا قاتىسادى.

مارافوننىڭ باستى ماقساتى — تۇراقتى وقۋ مادەنيەتىن قالىپتاستىرۋ، كىتاپ وقۋدى كەڭىنەن ناسيحاتتاۋ جانە مەملەكەتتىك قىزمەتشىلەر اراسىندا ۇزدىكسىز ءوزىن-ءوزى دامىتۋ داعدىسىن ورنىقتىرۋ.

جوبا ءوزىنىڭ وزەكتىلىگى مەن تيىمدىلىگىن دالەلدەپ ۇلگەردى. 2025 جىلى مارافون پيلوتتىق رەجيمدە قاراعاندى، قوستاناي وبلىستارىندا جانە شىمكەنت قالاسىندا وتكىزىلىپ، ءتۇرلى جاس ساناتى مەن ماماندىقتاعى 189 مىڭنان استام قاتىسۋشىنى بىرىكتىردى. پيلوتتىق كەزەڭنىڭ قورىتىندىسى بويىنشا مەملەكەتتىك ورگانداردىڭ وكىلدەرى مارافون جەڭىمپازدارىنىڭ قاتارىنان كورىندى. قوستاناي وبلىسى پوليتسيا دەپارتامەنتى شتابىنىڭ تالداۋ، جوسپارلاۋ جانە باقىلاۋ ءبولىمىنىڭ باستىعى گۇلزات مۇستافينا II ورىندى يەلەنسە، تەمىرتاۋ قالاسى توتەنشە جاعدايلار باسقارماسى ءورت ءسوندىرۋ ءبولىمىنىڭ باستىعى ۆلاديمير كونەۆ III ورىنعا يە بولدى. ولاردىڭ جەتىستىگى بىلىمگە ۇمتىلۋ مەن ۇزدىكسىز دامۋ مەملەكەتتىك قىزمەتشىلەردىڭ كاسىبي مادەنيەتىنىڭ ماڭىزدى قۇرامداس بولىگى ەكەنىن ايقىن كورسەتتى.

پيلوتتىق كەزەڭنىڭ تابىستى ناتيجەلەرى باستامانى رەسپۋبليكالىق دەڭگەيدە كەڭەيتۋگە جانە وعان مەملەكەتتىك ورگاندار مەن ۇيىمداردى تارتۋعا بەرىك نەگىز قالادى.

— كىتاپ وقۋ — پوليتسيا قىزمەتكەرىنىڭ كاسىبي جانە رۋحاني دامۋىنىڭ ماڭىزدى نەگىزى. ول ءبىلىمدى جەتىلدىرىپ، وي-ءورىستى كەڭەيتەدى، پاتريوتتىق رۋح پەن جاۋاپكەرشىلىك سەزىمىن نىعايتادى. ىشكى ىستەر ءمينيسترىنىڭ تاپسىرماسىمەن 2024 جىلدان باستاپ بۇل باعىتتا جۇيەلى جۇمىس جۇرگىزىلۋدە. مينيسترلىكتە جانە وڭىرلىك دەپارتامەنتتەردە كىتاپحانالار اشىلدى. پوليتسيا قىزمەتكەرلەرى كىتاپ وقۋدا قىزىعۋشىلىق تانىتىپ، ءار اي سايىن جاڭا كىتاپ وقىپ ءجۇر. سونىمەن قاتار مينيسترلىكتە جىل سايىن دەتەكتيۆ جانىرىنداعى “سەرت” كونكۋرسى وتكىزىلەدى. ۇزدىك شىعارمالار كىتاپتا شىعارىلادى. مينيسترلىك شىعارعان كىتاپتار تسيفرلىق كىتاپحاناعا ەنگىزىلۋدە، — دەدى ىشكى ىستەر ءمينيسترىنىڭ ورىنباسارى ايدار سايتبەكوۆ.

— وقۋ مادەنيەتىن دامىتۋ – مەملەكەت باسشىسى ايقىنداعان جالپىۇلتتىق مىندەت. ءبىز ءۇشىن ىشكى ىستەر مينيسترلىگىنىڭ جوباعا قوسىلۋى ەرەكشە ماڭىزدى. پوليتسيا قىزمەتكەرلەرىنىڭ مارافونعا قاتىسۋى قازىرگى مەملەكەتتىك قىزمەتشىنىڭ تەك ءوز ءىسىنىڭ كاسىبي مامانى عانا ەمەس، سونىمەن قاتار بىلىمگە، دامۋعا جانە ءوزىن-ءوزى جەتىلدىرۋگە ۇدايى ۇمتىلاتىن تۇلعا ەكەنىن كورسەتەتىن جارقىن ۇلگى بولادى دەپ سەنەمىن، — دەپ اتاپ ءوتتى “كىتاپ وقيتىن ۇلت — چيتايۋششايا ناتسيا” قوعامدىق قورىنىڭ توراعاسى باقىتجان تۇرلىبەكوۆ. مەموراندۋمعا قول قويىلۋى تاراپتاردىڭ كىتاپ وقۋ مادەنيەتىن دامىتۋ، قوعامنىڭ زياتكەرلىك الەۋەتىن نىعايتۋ جانە قازاقستاندا جاڭا وقۋ مادەنيەتىن قالىپتاستىرۋ جولىنداعى كۇش-جىگەرىن بىرىكتىرۋگە دەگەن ۇمتىلىسىن ايعاقتايدى.

جوبا قازاقستان رەسپۋبليكاسى مادەنيەت جانە اقپارات مينيسترلىگىنىڭ قولداۋىمەن جۇزەگە اسىرىلۋدا.

Abai.kz