جالعىز ءۇي قيان قىستاۋدا وتىرامىز. اينالا اسپان تاۋلار. يەن، ەلسىز مەكەن. جىم-جىرت. سول جىم-جىرتتىقتى بىرەۋ كەلىپ بۇزسا ەكەن دەپ تىلەيسىڭ. كۇندەردىڭ ءبىر كۇنىندە الگى تىلەگىڭ ورىندالادى-ەي!..

ەكى بەتىنە قىنا جاققانداي بوپ جۇرەتىندىكتەن «قىزىل ەستاي» اتانىپ كەتكەن ءبىر كىسى بار ەدى. قىزىل ماتامەن قاپتاعان قىزىل جاشىگىن الدىنا وڭگەرىپ سول قىزىل ەستاي كەلەتىن قىستاۋلىعىمىزعا. قىزىل ەستاي كەلسە، ۇيىمىزگە قىزىر كەلگەندەي قۋاناتىنبىز. قازان كوتەرىلەدى، ەت اسىلادى. شەشەم كەروسين شامنىڭ بىلتەسىن دە كوتەرىپ قويادى. جەڭدى بىلەكتەي قازىنى كومەيلەتە وتىرىپ اكەم مەن ەستاي ەكەۋى قىزۋ اڭگىمەنى «قىزىلمەن» جۇرگىزە تۇسەدى.

–  قىزىل ەستاي نەگە كەلىپتى؟ – دەپ سۇرايمىن تاتەمنەن قاعا بەرىستە.

–  ەرتەڭ – سايلاۋ. انا قىزىل جاشىكتى كوردىڭ بە؟ سوعان داۋىس بەرەمىز.  داۋىسىمىزدى الۋعا كەلىپتى، –  دەيدى تاتەم. – مەن قىزىل جاشىككە قىزىعا ءارى  تاڭقالا قارايمىن. «قىزىل جاشىككە قالاي داۋىس بەرۋگە بولادى؟ باسىڭدى جاشىكتىڭ ىشىنە تىعىپ داۋىس بەرەسىڭ بە، قايتەسىڭ؟» –  وسى سۇراقتىڭ جاۋابىن  ويلاپ جاتىپ ۇيىقتاپ كەتەمىن. ەرتەڭىندە ويانسام، ۇلكەندەر «داۋىستارىن بەرىپ» تاستاپ، تاڭعى شاي ۇستىندە وتىرادى.

بۇل – قىزىل ۋرنولى قىزىل وكىمەتتىڭ كەزى-تۇعىن. سوۆەتتىڭ سايلاۋى ىلعي قىستا بولاتىن با ەدى، ايتەۋىر، جىل ارالاتىپ قىزىل ەستاي ءبىزدىڭ قىستاۋعا سوعىپ تۇراتىن. ەسىمدە قالىپتى...

ال، قازىر جايناعان جاز. ەندى از كۇندەردەن سوڭ قۇرىلتاي سايلاۋى بولماقشى. «سايلاۋعا بارساڭ دا – باراسىڭ، بارماساڭ دا – باراسىڭ» دەپ جەلكەلەيتىن سوۆەت وكىمەتى جوق. قىزىل جاشىگىن الدىنا وڭگەرىپ مالشى اۋىلدارىن ارالايتىن قىزىل ەستايلار دا جوق. اركىمنىڭ ءوز ەرىكى – وزىندە. بىراق ەرىك –  ەرىككەنىڭ ەرمەگى بولماۋى كەرەك. سايلاۋ – حالىقتىڭ ساياسي ەركىن (كوزقاراسىن، پىكىرىن) بىلدىرەتىن ناۋقان. سوندىقتان بۇل ناۋقانعا قاتىسقان ءجون. اسىرەسە، الماتى قالاسىنىڭ تۇرعىندارى بەلسەندىلىك تانىتسا دەپ تىلەيمىن. ويتكەنى، استانا ساياسي-رەسمي ورتالىق بولعانىمەن، ساياسات الماتىدا جاسالا ما، بىردەڭە عوي ءوزى...))

"سايلاۋعا قاتىسىپ جاتقان جەتى پارتيانىڭ بىرەۋىنە مىندەتتى تۇردە داۋىسىڭدى" بەر دەپ مەن الماتىلىقتاردى جەتەلەۋدەن نەمەسە ۇگىت-ناسيحات سوعۋدان اۋلاقپىن. جۇرت ءوز قالاۋىن قالاعانىنشا بىلدىرۋگە قاقىلى. ءتىپتى ،جەتى پارتيانىڭ بىرىنە دە داۋىس بەرمەيمىن دەسە، مارحاببات، بيۋللەتەندە «بارىنە قارسىمىن» دەگەن دە  جول بار. قىسقاسى، بۇل دا سەنىڭ سايلاۋعا قاتىسىپ، ساياسي كوزقاراسىڭدى ءبىلدىرۋدىڭ توتە جولى.

«توتە جولدى كورسەتشى اۋىلىڭا باراتىن» دەمەكشى، سايلاۋ – ساياساتقا ارالاسۋدىڭ توتە جولى. وسىنى ەسكەرەيىك تە، "بىزگە كەلىپ قالاي داۋىس بەرەدى ەكەن، ءا؟" دەپ تۇرعان كوك جاشىكتەرىمىزدى بيۋللەتەندەرگە تولتىرىپ تاستايىق.

داۋرەن قۋات

Abai.kz