15 تامىزدان 30 قىركۇيەككە دەيىن «نازار اۋدارىڭىز – بالالار!» جەدەل-پروفيلاكتيكالىق ءىس-شاراسى وتۋدە.

باستى ماقساتىمىز – بالالاردىڭ جولدا، مەكتەپتە جانە كۇندەلىكتى ومىردە قاۋىپسىزدىگىن قامتاماسىز ەتۋ.

پوليتسيا قىزمەتكەرلەرى مەكتەپ اۆتوبۋستارىنىڭ قاۋىپسىزدىگىن، ولاردىڭ تەحنيكالىق جاعدايىن، سونداي-اق مەكتەپ ماڭىنداعى جولدار مەن جاياۋ جۇرگىنشىلەر وتكەلدەرىن تەكسەرۋدە. انىقتالعان كەمشىلىكتەردى جويۋ بويىنشا ءتيىستى شارالار قابىلدانۋدا.

مەكتەپتەردەگى قاۋىپسىزدىككە دە ەرەكشە كوڭىل بولىنۋدە. بەينەباقىلاۋ كامەرالارىن پوليتسيانىڭ جەدەل باسقارۋ ورتالىقتارىنا تولىق قوسۋ جۇمىستارى جۇرگىزىلۋدە.

ءار مەكتەپكە پوليتسيا قىزمەتكەرلەرى بەكىتىلگەن. ولار بالالارمەن كەزدەسىپ، قاۋىپسىزدىك ەرەجەلەرىن ءتۇسىندىرىپ، ءتۇرلى جاعدايلاردا قالاي دۇرىس ارەكەت ەتۋ كەرەكتىگىن ۇيرەتۋدە.

قۇرمەتتى اتا-انالار!

بالا قاۋىپسىزدىگى – تەك پوليتسيانىڭ نەمەسە مەكتەپتىڭ مىندەتى ەمەس. بۇل – ەڭ الدىمەن، اتا-انانىڭ دا جاۋاپكەرشىلىگى.

كۇن سايىن بالاڭىزبەن بىرنەشە مينۋت قاۋىپسىزدىك تۋرالى سويلەسىڭىز. جولدى تەك جاياۋ جۇرگىنشىلەر وتكەلى ارقىلى ءوتۋ، جولدان وتەردە جان-جاعىنا قاراۋ، تەلەفونعا الاڭداماۋ، بەيتانىس ادامدارمەن بىرگە كەتپەۋ سياقتى قاراپايىم ەرەجەلەردى ۇنەمى ەسكە سالىپ وتىرىڭىز.

قىمباتتى بالالار!

ارقاشان ساق جانە مۇقيات بولىڭدار. ەگەر ءبىر نارسە سەندەرگە قاۋىپتى نەمەسە كۇماندى بولىپ كورىنسە، ۇندەمەي قالماڭدار. بۇل تۋرالى مىندەتتى تۇردە اتا-انالارىڭا، مۇعالىمگە نەمەسە پوليتسيا قىزمەتكەرىنە ايتىڭدار.

بالانىڭ قاۋىپسىزدىگى – بارشامىزعا ورتاق جاۋاپكەرشىلىك.

بىرگە قامقور بولساق، ءار بالا مەكتەپكە امان بارىپ، ۇيىنە قاۋىپسىز ورالادى.

بالالارىمىزدى بىرگە قورعايىق!

Abai.kz