قۇرىلتاي دەپۋتاتى ارمان حايرۋللين مەملەكەت باسشىسىنىڭ «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى جولداۋىندا بەلگىلەنگەن باسىمدىقتار مەن باستامالاردى ءتۇسىندىرۋ ماقساتىندا اتىراۋ وبلىسىندا بىرقاتار جۇمىس كەزدەسۋىن وتكىزدى.

حالەل دوسمۇحامەدوۆ اتىنداعى اتىراۋ ۋنيۆەرسيتەتىندە وتكەن جيىندا ول قۇجاتتا قامتىلعان نەگىزگى الەۋمەتتىك-ەكونوميكالىق ماسەلەلەرگە توقتالىپ، الداعى كەزەڭگە ارنالعان مىندەتتەردىڭ ماڭىزىن اتاپ ءوتتى. سونداي-اق ستۋدەنتتەر مەن پروفەسسور-وقىتۋشىلار قۇرامىنا الەۋمەتتىك سالادا جوسپارلانعان وزگەرىستەر تۋرالى ايتىپ بەردى.

اتاپ ايتقاندا، دەنساۋلىق ساقتاۋ سالاسىندا ۋچاسكەلىك مەديتسينا قىزمەتكەرلەرىنىڭ جالاقىسىن كەزەڭ-كەزەڭىمەن 40 پايىزعا ارتتىرۋ جوسپارلانىپ وتىرعانىن ايتتى. ال ءبىلىم بەرۋ سالاسىندا مۇعالىمدەردى قاعازباستىلىقتان ارىلتىپ، ولاردىڭ نەگىزگى مىندەتى – ساپالى ءبىلىم بەرۋگە كوبىرەك كوڭىل بولۋىنە جاعداي جاساۋ كوزدەلگەن. بۇدان بولەك، مەكتەپ تاپشىلىعىن ازايتۋ ماقساتىندا ەلىمىزدىڭ 20 وڭىرىندە 237 مىڭ وقۋشىعا ارنالعان مەكتەپتەر سالۋ جوسپارلانىپ وتىر.

جيىندا «حالىقتىق قۇرىلىس» باعدارلاماسىنىڭ الەۋمەتتىك سالاعا تيگىزەر وڭ اسەرى تالقىلاندى. دەپۋتاتتىڭ پىكىرىنشە، 2027 جىلدى جالپىحالىقتىق قۇرىلىس جىلى دەپ جاريالاۋ تۋرالى ۇسىنىس الەۋمەتتىك ينفراقۇرىلىمدى دامىتۋعا تىڭ سەرپىن بەرەدى. اسىرەسە، حالىق سانىنىڭ وسۋىنە بايلانىستى مەكتەپتەرگە، مادەنيەت جانە الەۋمەتتىك نىساندارعا سۇرانىس ارتىپ وتىرعان شاقتا بۇل باستامانىڭ ماڭىزى زور. سونىمەن قاتار قۇرىلىس قارقىنىنىڭ ارتۋى جاڭا جۇمىس ورىندارىن اشۋعا سەرپىن بەرمەك.

– «حالىقتىق قۇرىلىس» جوباسى ەلىمىزدىڭ دامۋىنا تىڭ سەرپىن بەرەدى دەپ ويلايمىن. بۇل – بولاشاعىمىزعا سالىنعان ۇزاق مەرزىمدى ينۆەستيتسيا. جوبا اياسىندا كەمىندە 100 مىڭ جاڭا جۇمىس ورنىن اشۋ كوزدەلگەن. وسى مىندەتتى ءتيىمدى جۇزەگە اسىرۋ ءۇشىن زاڭنامانى جەتىلدىرىپ، وتاندىق كاسىپكەرلەرگە قولايلى جاعداي جاساۋ جانە اكىمشىلىك كەدەرگىلەردى جويۋ ماڭىزدى، – دەدى ارمان حايرۋللين.

جۇمىس ساپارى بارىسىندا ارمان حايرۋللين اباي اتىنداعى وقۋشىلار ورتالىعىندا مادەنيەت جانە سپورت سالاسىنىڭ قىزمەتكەرلەرىمەن جۇزدەستى. سونداي-اق «اتىراۋ-اقپارات» مەدياحولدينگىندە جاستارمەن، ۇكىمەتتىك ەمەس ۇيىمدار جانە ەتنومادەني بىرلەستىكتەر وكىلدەرىمەن پىكىر الماستى. بۇدان بولەك، ماحامبەت جانە يساتاي اۋداندارىنا بارىپ، اۋىل تۇرعىندارىمەن جۇزدەستى.

ءىس-شارالارعا قازاقستان حالىق كەڭەسىنىڭ مۇشەلەرى مەن ۇكىمەت وكىلدەرى دە قاتىستى.

 Abai.kz