وسىلاي دەپ ورنىنان قوزعالماعان بەيىمبەت ءمايليندى «ءۇش ءارىپ» سول كۇنى-اق ۇستاپ اكەتىپتى

«بالالارعا باس-كوز بول، مەن ەندى سەندەرگە جوقپىن»

وسىلاي دەپ ورنىنان قوزعالماعان بەيىمبەت ءمايليندى «ءۇش ءارىپ» سول كۇنى-اق ۇستاپ اكەتىپتى

«بالالارعا باس-كوز بول، مەن ەندى سەندەرگە جوقپىن»

بي اعا. حالقى ول كىسىنى ەرەكشە ارداقتاپ، وسىلاي اتادى. سول بي اعانىڭ ارتىندا قالعان ۇرپاقتارىن ىزدەگەنىمىزدە، ۇل-قىزدارىنىڭ بۇگىندە تۇگەل و دۇنيەلىك بولعانىن، ال نەمەرە، شوبەرەلەرىنىڭ اتاسى جايلى ەستەلىك ايتىپ بەرە المايتىنىن ءبىلىپ، قاتتى قىنجىلدىق. بەيىمبەتتىڭ بۇگىندە مارقۇم بولعان قىزى گۇلسىمنىڭ جۇبايى، ياعني بي اعانىڭ كۇيەۋ بالاسى قادىر عانا اتاسىنىڭ اتىن وشىرمەۋگە ات سالىسىپ، مۇرالارىنا باس-كوز بولىپ ءجۇر ەكەن. بەيىمبەت ۇستالىپ، اتىلىپ كەتكەن سوڭ مايليندەر تاعدىرىنىڭ نەندەي كۇيگە تۇسكەنى جايلى قادىر اعا بىلاي دەدى:
قارا كەستەكتە «امانگەلدى» ءفيلمىن ءتۇسىرۋ ءجۇرىپ جاتقان كەز. بي اعاڭ كۇنى بويعى جۇمىستان شارشاپ كەلىپ، دەمالۋعا جانتايىپ جاتا بەرگەنى سول ەكەن، ەسىكتەن بەيتانىس ەكى ورىس كىرىپ كەلەدى. سويتەدى دە جالما-جان جاعادان العانداي «بەيمبەت مايلين ۆى؟» دەيدى. قاننەن-قاپەرسىز جاتقان بەيىمبەت «ءيا، مەن» دەيدى. «توگدا ۆى ارەستوۆانى» دەيدى دە الگىلەر ول كىسىنى سول جەردە تۇتقىنداپ، قۇجات-قاعازدارىن تۇگەلدەي سىپىرىپ الىپ كەتەدى. سودان اپارىپ تۇرمەگە قاماپ، كۇندە ۇرىپ-سوعىپ، ىستەمەگەن ءىسىن موينىنا تاڭا الماعان سوڭ، قورلاۋعا كوشكەن. كۇنجامال اپامىز ارتىنان ىزدەپ بارعاندا اۋزىندا بىردە-ءبىر ءتىس قالماعان بي-اعانىڭ «بالالارعا باس-كوز بول، مەن ەندى سەندەرگە جوقپىن» دەگەننەن باسقاعا شاماسى كەلمەپتى.
1938 جىلدىڭ اقپان ايىندا كۇنىنە قىرىق ادامنان اتىپ وتىرعان. سوندا اقپاننىڭ 25-ىندە ساكەن سەيفۋللين باستاعان 35 ادام اتىلسا، كەلەسى 26-سىندا بەيىمبەت، ءىلياستار اتىلعان. قازىرگى جاڭالىق دەگەن جەرگە اپارىپ اتقان. قاقاعان قىستا «حالىق جاۋلارى» ءۇشىن كىم كور قازادى، اتىپ-اتىپ، قابىرعالاردى قۇلاتا سالعان. قايران، ارىستارىمىزدىڭ دەنەسى سولايشا قارعا-قۇزعىنعا جەم بولعان.    
«ءبولىپ ال دا، بيلەي بەر». وسىنداي ۇراندى ۇستانعان قىزىل يمپەريانىڭ جىمىسقى ساياساتى حالىقتى بايلار جانە كەدەيلەر دەپ ەكىگە ءبولىپ، ەكەۋىن ءبىر-بىرىنە قارسى قويدى. باسقالاردى بايشىل دەسە دە، باسقا دەسە دە، ءدال بەيىمبەتكە وسىنداي جالا جابۋ قيسىنسىز ەدى. سەبەبى ول ناعىز كەدەيدىڭ جاي-كۇيىن مۇڭىن قوزعايتىن شىعارمالار جازعانىن بارشا جۇرت بىلەدى. ۇكىمەتتىڭ ساياساتىنا قايشى كەلەتىن ءبىر ءىس جاساماعاندىقتان، «ۇستالامىن-اۋ، جازاعا تارتىلامىن-اۋ» دەگەن وي بەيىمبەتتىڭ ءوزىنىڭ دە ءۇش ۇيقتاسا تۇسىنە كىرىپ كورمەپتى.
- بي-اعاڭا ميليتسيادا قىزمەت ىستەيتىن تانىستارى، جاناشىرلارى «بۇگىن تۇننەن قالماي قاشىپ كەتپەسەڭىز، ەرتەڭ ءسىزدى ۇستايدى» دەپتى. ونى ەستىگەن بەيىمبەت «قىلمىسكەر سياقتى قاشىپ نە كورىنىپتى؟ مەنىڭ ۇكىمەتكە قايشى كەلگەن جەرىم جوق، مەن كەدەي ادامنىڭ بالاسىمىن» دەپ، ورنىنان قوزعالماپتى. بالكىم، سوندا ماسكەۋگە مە، ايتەۋىر باسقا جاققا بارىپ بوي تاسالاي تۇرعاندا، امان قالار ما ەدى؟، - دەپ كۇرسىندى قادىر اعا، -  بىراق ول كىسى وندايعا بارماق تۇگىلى، ءتىپتى ولاي ويلاۋدى وزىنە ار ساناعان عوي. ول كىسىنىڭ سونداي بالاداي نانعىش، اقكوڭىلدىگىن تۇستاستارى، ىزىنەن ەرگەن قالامگەلەردىڭ ءبارى ەرەكشە ايتادى. عابيت مۇسىرەپوۆتىڭ ءوزى جازۋشىلار وداعىندا ءدۇيىم جازۋشىلاردىڭ الدىندا: «بەيىمبەت حالىق جاۋى بولسا، مەن دە حالىق جاۋىمىن» دەپ، پارتبيلەتىن قوينىنان سۋىرىپ تاستاعان عوي. سوندا ول عابەڭنىڭ بەيىمبەتتى سونشالىقتى جاقسى كورگەندىگى، سىيلاعانداعى ەمەي نەمەنە؟!
وزىنە، وزىنە عانا ەمەس-اۋ، كول جاعاسىنداعى جەلكىلدەپ ءوسىپ كەلە جاتقان جاس قۇراق سەكىلدى قازاق جاستارىن كوركەمدىك شەبەرلىككە باۋلىعان، سولارعا دۇرىس جول سىلتەگەن بي-اعاسىن عابيت مۇسىرەپوۆتىڭ ەرەكشە جاقسى كورەتىندەيى بار. ۇلكەن جازۋشى بولام دەگەن ارمانىنا قانات بىتىرگەن اعاسى جونىندە مۇسىرەپوۆ بىلاي دەپ جازعان ەكەن: «اسىلى، ءبىزدىڭ، ونىڭ زامانداستارىنىڭ، قاي-قايسىسى بولساق تا بەيىمبەت ءمايليننىڭ كيەلى قولى، ياكي ونىڭ كەرەمەتتەي كەمەل رەداكتورلىق قالامى تيمەي وتە الدىق دەمەس ەدىك، - دەيدى. سونداي-اق عابەڭ بي-اعاسى جايلى، - ونىڭ جازۋشى تۋمالارى ءۇشىن باعا جەتپەس قىمبات ءبىر قاسيەتىن ايرىقشا ايتقىم كەلەدى. ول – ونىڭ قاراپايىمدىلىعى، قولىنىڭ كىرشىكسىزدىگى، جۇرەك ءلۇپىلىنىڭ قالتقىسىز، قاياۋسىز پاكتىگى، تالانتىمەن تەڭ تىزە قوسقان ەڭبەكقورلىعى»، - دەگەن ەكەن.

كوپىر استىندا كۇنەلتۋگە تۋرا كەلدى

ەكى ۇلىنان كەيىن جۇبايى قىز تاپقاندا، بەيىمبەت سونداي قۋانىپ، بيە سويىپ، توي جاساعان ەكەن. سوندا جاس نارەستەنى قولىنا الىپ وتىرعان ساكەن وعان گۇلسىم دەپ ات قويىپتى. سونداي قازانى وتتان تۇسپەيتىن، بوساعاسىنان كىسى ۇزىلمەيتىن بەيىمبەتتىڭ شاڭىراعىن رەپرەسسيا ورتاسىنان تۇسىرەدى. ءۇش قالتا قولجازباسىن تۇگەل سىپىرىپ الىپ، ءۇش بالاسىمەن كۇنجامالدى ۇيدەن قۋىپ شىعادى. سودان ولار ءبىراز ۋاقىت ءىلياس جانسۇگىروۆتىڭ ۇيىنە پانالايدى. كوپ ۇزاماي ءىلياستى دا ۇستاپ الىپ كەتەدى. سونان سوڭ كۇنجامال اپامىزدى كارلاگ-قا، بالالارىن جەتىمدەر ۇيىنە ءبولىپ جىبەردى. قادىر اتا وسىلاردى ايتىپ وتىرعاندا تىڭداپ وتىرعان بىزدەردىڭ كوزىمىزگە ەرىكسىز جاس كەلدى.
- نەگىزى بي-اعاڭنىڭ اۋكەن، مەرەكە، ەدىل اتتى ءۇش ۇلى جانە گۇلسىم، سودان كەيىن تاعى روزا دەگەن اسىراپ العان قىزى بولعان. اۋكەندى سوعىسقا ەڭ قاۋىپتى باتالونعا جىبەرگەن، سودان قايتپاعان. ەدىل مەنەن مەرەكەنى سەمەيدەگى،  ال گۇلسىمدى سارقانداعى جەتىمدەر ۇيىنە ءبولىپ جىبەرگەن. ءوزى تۋمىسىنان نازىك، ءالجۋاز گۇلسىمدى جەتىمدەر ۇيىنە بارعاندا ءولىپ قالعان ەكەن دەپ، شىعارىپ تاستاعالى جاتقاندا، مەدبيكەلەردىڭ ءبىرى ونىڭ كىرپىگىنىڭ قيمىلداپ جاتقانىن بايقاپ قالادى. سودان ونى ەمدەپ ءجۇرىپ باۋىر باسىپ قالادى دا، اسىراپ الۋعا نيەت بىلدىرسە كەرەك. بىراق زاڭعا قايشى كەلگەندىكتەن، گۇلسىمدى ول ايەلگە بەرمەيدى. ءسويتىپ ون ءۇش جاسقا كەلگەندە، گۇلسىمدى جەتىمدەر ۇيىنەن بوساتادى. قاراعاندىعا دەيىن اپارىپ سالۋعا جانىنا تاربيەشى ورىس ايەلدى قوسىپ، جىبەرەدى. ول كەزدە پوەزدار ءسىبىر ارقىلى جۇرەدى ەكەن. ادامنىڭ بويىندا قايىرىمدىلىق، مەيىرىم سىندى ىزگى قاسيەت بولماعان سوڭ دا قيىن ەكەن عوي. سوندا نوۆوسىبىرگە كەلگەندە ورىس ايەل «كۇل بولماساڭ، ءبۇل بول» دەپ، گۇلسىمدى ۆوكزالعا تاستاپ كەتىپ قالادى. ىزدەۋشىسى جوق، ايتەۋىر ءبىر «حالىق جاۋىنىڭ» قىزى عوي، ولسە ولە بەرسىن دەگەن قاتىگەزدىگى شىعار. قايتا گۇلسىمنىڭ ەتى ءتىرى بولادى، قاراپ وتىرا بەرمەي ميليتسياعا بارىپ، ءوزىنىڭ كىم ەكەنىن، قايدا بارا جاتقانىن، جالپى بولعان جايدى ايتىپ جەتكىزەدى. سودان ولار سارقانمەن حابارلاسىپ، قاراعاندىمەن حابارلاسىپ، قاسىنا ادام قوسىپ گۇلسىمدى پويىزعا وتىرعىزىپ جىبەرەدى. بىردەن كۇنجامال اپا جۇمىس ىستەيتىن شاحتانىڭ باستىعىنا كەلەدى. جالعىز ەشكىسىن ساتىپ، قىزىن قارسى الۋعا جۇرگەلى جاتقان كۇنجامال اپاي قىزىنىڭ كەلگەنىن ەستىپ، جۇگىرىپ جەتەدى. كۇنجامال اپا ورىسشا بىلمەيدى، گۇلسىم قازاقشا بىلمەيدى. سوعان قاراماي، انالى-قىزدى ەكەۋى جىلاپ كورىسىپ، تابىسادى. باياعى بەيىمبەتتىڭ وتباسى قايتا قاۋىشۋ باقىتىنا يە بولعانىمەن، تۇرمىس تاۋقىمەتى ەڭسەنى ەزىپ تاستاعانداي ەدى. كۇنجامال اپا شاحتەرلاردىڭ اس-سۋىن قامداپ، كىر-قوڭىن جۋىپ، سودان تۇسكەن تيىن-تەبەنمەن بالالارىن اسىرايدى. اياق كيىمى جوق گۇلسىمدى مەرەكە مەكتەپكە ارقالاپ الىپ بارىپ، الىپ قايتادى. سونداي اۋىر تۇرمىس كەشكەن. بالالار مەكتەپتى ءبىتىرىپ، وسىندا الماتىعا وقۋعا كەلگەندە تۇراتىن ۇيلەرى دە جوق. كوپىردىڭ استىن كۇنەلتىپ جۇرگەن جەرلەرىنەن بەيىمبەتتىڭ جەرلەستەرى ەلۋباي ومىرزاقوۆ ءبىر كۇن ۇيىنە قوندىرسا، كەلەسى كۇنى سەركە قوجامقۇلوۆ، سولايشا كەزەگىمەن الىپ كەتىپ جۇرەدى. سودان ءبىر كۇنى مۇحتار اۋەزوۆ كەلىپتى. ماشيناسىنا مىنگىزىپ، ۇيىنە اپارادى دا، تاماق-شاي ۇستىندە گۇلسىمگە «قىزىم، سەن كوپ جاسىما، مويىما، اكەڭنىڭ ەش جازىعى جوق، كوپ ۇزاماي اقتالادى» دەپ جىگەر بەرىپتى. ءوزى ول كەزدە تاۋ-كەن ينستيتۋتىنا تاپسىرىپ، «حالىق جاۋىنىڭ» قىزى دەپ وقۋعا الماعانعا تاۋى شاعىلىپ جۇرگەن كەزى. مۇحاڭنىڭ وسى ءبىر اۋىز جىلى ءسوزى گۇلسىمگە قانات ءبىتىرىپ، ول مەديتسينالىق ينستيتۋتقا تاپسىرىپ، ءتۇسىپ كەتەدى.
وسىنداي ەستەلىك ايتىپ وتىرعان بەيىمبەت ءمايليننىڭ كۇيەۋ بالاسى قادىردىڭ ءوزى دە – جاستايىنان جەتىمدىكتىڭ تاۋقىمەتىن تارتىپ ءجۇرىپ جەتىلگەن جان. الماتىداعى تاۋ-كەن ينستيتۋتىن ءبىتىرىپ، جولدامامەن جەزقازعانعا جۇمىس ىستەۋگە جىبەرىلگەن قادىر، وسىنداعى تۋىسى، جەزدەسى بولىپ كەلەتىن جازۋشى ماعزۇم تيەسوۆتىڭ ۇيىنە ءجيى كەلىپ-كەتىپ تۇرادى. ۇيلەنەتىن جاسىنان اسىپ بارا جاتقان سوڭ تۋىستارى قادىرعا قالىڭدىق قاراستىرا باستاسا كەرەك. سونداي كۇندەردىڭ بىرىندە جەزدەسى «قادىر، سەن نەگە ۇيلەنبەي ءجۇرسىڭ؟» دەپ توتەسىنەن سۇراق قويادى. قاپەلىمدە نە دەرىن بىلمەي ساسىپ قالعان جىگىتتى قۇردىمنان ءوزى قۇتقارعانداي: «مەن سەنى ءبىر جاقسى ادامنىڭ قىزىمەن تانىستىرايىن» دەيدى. سودان وسى بي-اعانىڭ قىزى گۇلسىممەن تانىستىردى. ودان كەيىن جاستار تەز ءتىل تابىسىپ، كوپ ۇزاماي وتاۋ كوتەرەدى.

جەتىمدەر ۇيىندە كورگەن قورلىق

ساكەن، ءىلياس، بەيىمبەتتەر ءوزارا جاقسى ءتۇسىنىسىپ، سىيلاسقاندىقتان، ولاردىڭ بالالارى مەن ايەلدەرى دە جاقىن ارالاسىپ تۇرعان. ساكەننىڭ قىزىنداي بولعان ىرىمجان مەن بەيىمبەتتىڭ گۇلسىمى بالا كەزدەرىندە بىرگە ويناي الماعانىمەن، كەيىن ءبىرىن-ءبىرى تاۋىپ، سىرلاسىپ، ورتاق تاعدىرلارىن ءبولىسىپ تۇرادى. سوندايدا گۇلسىمنىڭ ايتقان سوزدەرىنەن رىمجان اپامىز بىزگە بىلاي دەپ ەستەلىك سىر ءبولىستى:
گۇلسىم جەتىمدەر ۇيىندەگى بالالاردىڭ كورسەتكەن قورلىقتارى جايلى ايتقاندا، تىڭداپ وتىرعان مەنىڭ دەنەم تۇرشىكتى. بالالار گۇلسىمدى ۇرادى ەكەن. ابدەن تاياق جەي-جەي قورقىپ قالعان بايعۇس قىز سودىرلاردىڭ توبەسى كورىنگەننەن-اق كەرەۋەتتىڭ استىنا تىعىلىپ قالادى ەكەن. سودان تاماق ىشەردە دە شىقپاي، مىسىققا ۇقساپ، كەرەۋەتتىڭ استىندا جاتىپ تاماق ىشە بەرەدى ەكەن. ونىسىن كورگەن ورىس بالالارى ودان سايىن كۇشەيىپ شىنىنى ۇساقتاپ جارىپ، سونىڭ ۇستىنە شىعارىپ، «ستوي نا كولەناح ۆراگ نارودا» دەيتىن كورىنەدى. سونىڭ ءبارىن كورىپ وسكەن قىزدىڭ جۇيكەسى زاقىمدانىپ، ءسال نارسەدەن ۇرىككىش بولىپ قالعان. دەنەسى تۇگەل قىشىما باسىپ، بەينە ءپىلدىڭ تەرىسى سياقتانىپ تۇراتىن. قايتا باعىنا جارى جاقسى ادام بولىپ جولىقتى. سونداي ادال، اقكوڭىل جىگىت. قالاي قاتتى اۋىرعاندا دا قاسىندا بولىپ، ءدارى-دارمەگىن تاۋىپ بەرىپ، جانى قالمايدى.
ەكەۋىنىڭ دە زەينەتكەرلىككە شىققان كەزى. ءبىر كۇنى ۇيگە قادىر تەلەفون شالدى. بەيمەزگىل ۋاقىت بولعان سوڭ، شوشىپ كەتتىم. «گۇلسىم تاعى دا قاتتى اۋىرىپ قالىپ ەدى. سوعان ءدارى الۋعا اقشامىز بولماي تۇر. قارجى جاعىنان قاراسا تۇرماس پا ەكەنسىز؟» دەدى داۋسى دىرىلدەپ. ارينە، وندايدا جاردەمدەسپەسەك، ادامگەرشىلىگىمىز قايدا؟ سودان مەن ونى ۇمىتىپ تا كەتكەم. ءبىر كۇنى تاعى قادىر حابارلاسىپ تۇر. «مەن ءسىزدىڭ الدىڭىزدا ۇيالىپ ءجۇرمىن. تۇنەۋكۇنگى اقشانى بەرەم دەپ، بەرە الماي جۇرگەنىمە رەنجىمەڭىز. اقشام بولماي، سودان ەندى كوستيۋمىمدى ساتقالى جاتىرمىن. سونى ساتقان سوڭ، بىردەن اپارىپ بەرەمىن» دەيدى. سوسىن مەن «قادىر، اينالايىن، قاجەت ەمەس. ساتپا كيىمىڭدى. ول مەنىڭ سەندەرگە  ءبىر قاراسقانىم بولسىن» دەپ زورعا توقتاتتىم. سول توسەك تارتىپ جاتقاننان گۇلسىمنىڭ ءحالى ناشارلاي بەردى. اقىرى، قايتىس بولدى. گۇلسىمدى ءوز قولىمىزبەن جەرلەدىك. 
قازاق تەاتر ونەرىنىڭ ىرگەتاسىن قالاۋشىلاردىڭ ءبىرى، بەلگىلى ءارتىس سەرالى قوجامقۇلوۆ بەيىمبەتپەن ءبىر اۋىلدا وسكەن ەكەن. سول كىسى جازىقسىز اتىلىپ كەتكەن جولداسىنىڭ بالالارىنا الاڭداپ، جاي-كۇيىن ءبىلىپ تۇرعان. ءتىپتى قايتىس بولارىندا دا سەراعاڭنىڭ جانى تىنىش تابا الماي، گۇلسىمدى شاقىرىپ الىپتى. گۇلسىم اۋىرىپ جاتقان سەراعاڭنىڭ كوڭىلىن اۋلاپ: «جازىلىپ كەتەسىز، اعا، ءتايىرى وسى دا سىزگە بۇيىم بولىپ پا؟» دەيدى. سول تۇستا بەيىمبەتتىڭ تۋعان جەرىندە ەسكەرتكىش اشىلعان ەكەن. سونى قىزىنىڭ كورگەن، كورمەگەنىن  بىلگىسى كەلسە كەرەك. گۇلسىم ەسكەرتكىشتى كورگەنىن، ونىڭ سونداي بيىك، ادەمىلىگىن، وزىنە ۇناعانىن ايتادى. وسىنى ەستىپ جانى تىنىش تاپقان بولۋ كەرەك، سەراعاڭ سول كۇنى قايتپاس ساپارعا اتتانىپتى. 
بەيىمبەت ۇرپاعىنان بۇگىندە كىمدەر قالدى، ولار ءوزارا قالاي ارالاسىپ تۇرادى دەگەن سۇراق تۇردى كوكەيدە. وسىنى قادىر اتايدان سۇراپ ەدىك:
- مەرەكەنىڭ ءوزى جوق، ەكى ۇلى مەن جۇبايى قاراعاندىدا تۇرادى. ول كىسى ولجاس سۇلەيمەنوۆپەن قاتار ماسكەۋدەگى ادەبيەت ينستيتۋىن بىتىرگەن-ءدى. كۇنى كەشە بالاسى بولات حابارلاسىپ، ءبىزدىڭ جاي-كۇيىمىزدى بىلگەن. ەدىلدىڭ جاراس، رۇستەم اتتى ەكى ۇلى بار ەدى، رۇستەمى بۇرناعى جىلدارى قايتىس بولدى. جاراسى وسىندا الماتىدا تۇرادى. بىراق، ورىستانىپ كەتكەن، بىزبەن ونشا ارالاسپايدى. ال ءبىز گۇلسىم ەكۋمىزدىڭ شۇعا ەسىمدى قىزىمىز بار. قازىر سول شۇعامەن بىرگە تۇرىپ جاتىرمىن. قىزىم ارحيتەكتور بولىپ جۇمىس ىستەيدى، مەن ءۇش نەمەرەمدى باعىپ ۇيدە وتىرامىن.
- گۇلسىم اپامىز قايتقالى دا ءبىراز بولدى ما؟
- 1999 جىلى قانت ديابەتىنەن كوز جۇمدى. التى ايداي توسەك تارتىپ جاتتى. قايتىس بولاتىن كۇنى «قادىر، مەن بۇگىن ولەمىن» دەدى. شىنىندا سول كۇنى باقيلىق بولدى.
مايليندەر ۇرپاعىنىڭ تاعدىرى مىنەكەي وسىلاي ءوربىدى. ال، ەندى بەيىمبەت مايلين شىعارماشىلىعىنىڭ جاعدايى قالاي؟ وسى تۇستا قادىر اتا بەيىمبەتتانۋشى توقتار بەيىسقۇلوۆتىڭ ەڭبەگىن ەرەكشە اتاپ، عالىمنىڭ ەندىگىدە ءىلياس پەن ساكەندىكى سەكىلدى قوستانايدان بەيىمبەت مايلين مۇراجايىن اشۋعا ارەكەتتەنىپ جاتقانىن ايتتى. دەگەنمەن كەز-كەلگەن ءىستى باستاۋ ءۇشىن قارجى كەرەك ەمەس پە، سول قارجى جاعىن سۇراپ توقتار بەيىسقۇلوۆ ەلباسىنان باستاپ، بىرنەشە لاۋازىم يەلەرىنە حات جازعان ەكەن. وعان «جوق» دەگەننەن وزگە جاۋاپ الا الماي، اقىرى سۋ اياعى قۇردىمعا كەتكەنىنە كەيىپ جۇرگەن جايى بار كورىنەدى. سوندا ەندىگىدە بەيىمبەت ءبىر عانا توقتار بەيىسقۇلوۆقا نە بولماسا كۇيەۋ بالاسى قادىرعا عانا كەرەك بولىپ قالدى ما؟ اششى دا بولسا وسىنداي ساۋالدى كولدەنەڭىنەن قويماسقا لاج جوق.

ءماريام ءابساتتار