-ەل ىشىندە قازىرگى قازاق ادەبيەتى تۋرالى تۇسىنىك-پايىم بۇرىنعىداي ەمەس سياقتى. ۇلت ادەبيەتى تۋرالى تەرىس پىكىرلەردى سول قالامگەرلەردىڭ وزدەرى دە ءجيى ايتادى. ونىڭ ۇستىنە بۇگىنگى تەحنوكرات ۇرپاق رۋحاني قۇندىلىقتاردان قول ۇزە باستاعانداي... ءسىز نە دەيسىز؟

-ەل ىشىندە قازىرگى قازاق ادەبيەتى تۋرالى تۇسىنىك-پايىم بۇرىنعىداي ەمەس سياقتى. ۇلت ادەبيەتى تۋرالى تەرىس پىكىرلەردى سول قالامگەرلەردىڭ وزدەرى دە ءجيى ايتادى. ونىڭ ۇستىنە بۇگىنگى تەحنوكرات ۇرپاق رۋحاني قۇندىلىقتاردان قول ۇزە باستاعانداي... ءسىز نە دەيسىز؟

-مەن تازا قازاق ادەبيەتىن وقىپ وسكەن، سول ارقىلى ساۋات اشقان اداممىن. سونداي سارقىلماس قاينارى بار رۋحاني بايلىقتان ءنار العاندىقتان ول تۋرالى تەك جاقسى ماعىنادا ءسوز ايتۋىم پارىز. قازىر ۇلتتىق ادەبيەتىمىز توڭىرەگىندە الىپقاشپا اڭگىمەلەر كوپ. قانشا ادام بولسا سونشا پىكىر بار. دەگەنمەن، «يت ۇرەدى، كەرۋەن كوشەدى». سوندىقتان دا قازاق ادەبيەتى ۋاقىت وزعان سايىن ءوسىپ، وركەندەمەسە توقىراۋعا ۇشىراي قويعان جوق. ارينە، ادەبيەت - ءتىرى ورگانيزم بولعاندىقتان، بەلگىلى ءبىر كەزەڭدەردە ءتۇرلى قيىندىقتاردى باستان وتكەرىپ تۇرادى. بىردە قۇلديلاپ كەتسە، بىردە شارىقتاي جونەلەدى. بىراق ادەبيەتتى جاساۋ پروتسەسى ەشقاشان توقتاعان ەمەس، توقتامايدى دا. ول ءار داۋىردە ءوز داۋىسىمەن، ءوز ەرەكشەلىگىمەن تۋىپ وتىرادى. بۇگىنگى زامان اۋقىمىمەن الىپ قارايتىن بولساق، قازاق ادەبيەتىندە اسىرەسە پوەزيا جانرى العا شىعىپ تۇر. الايدا بۇل پىكىرىم پروزا، دراماتۋرگيا سىندى باسقا سالالار وركەندەمەي تۇر دەگەندى بىلدىرمەيدى. بۇل سالىستىرمالى تۇردە الىپ وتىرعان ءوز ويىم. قالاي بولعان كۇندە دە قازىرگى قازاق ولەڭى قاناتىن كەڭىنەن جايا باستاعانى انىق. بۇل، وسى جانردا قالام ۇستاعانداردىڭ كوپتىگىنەن دە بولسا كەرەك. قازاق ءاۋ باستان اقىن حالىق. بىراق قالام ۇستاعاننىڭ ءبارىن تالانت دەپ تاني بەرۋگە بولماس. اسقار سۇلەيمەنوۆشە ايتساق «كەمتالانت مۇمكىندىگىنشە، شىن تالانت قالاعانىنشا جازادى». «ولەڭگە اركىمنىڭ-اق بار تالاسى» دەمەي مە قازاق. ايتسە دە قازاقتى ءار كەزدەرى رۋحاني اشارشىلىقتان ساقتاپ قالعان وسى ولەڭ قۇدىرەتى دەسەك ارتىق ايتپاعان بولار ەدىك.

جالپى جۇرتقا، قالىڭ وقىرمانعا ەڭ قولجەتىمدىسى پوەزيا بولعاندىقتان ونىڭ ساناعا دەگەن ىقپالى وتە زور. كوپتەگەن ۇعىمدار، نازىك سەزىمنىڭ قۇپيا سىرلارى، بيىك ارماندار مەن ماقساتتار، اقيقات پەن ەلدىڭ ايتار ءسوزى وسى ولەڭمەن جەتكىزىلەدى ەمەس پە؟! ءتىپتى بالاعا دا بار نارسەنى ءتۇسىندىرىپ، ۇيرەتۋ تەكتەن-تەك ولەڭ تىلىمەن ايتىلماسا كەرەك. دەمەك، ولەڭ حالىقتىڭ ساناسىن سىلكىندىرىپ، وياتۋ ارقىلى ءوزىن دە ءوسىرىپ، دامىتىپ وتىرادى. «تۋعاندا دۇنيە ەسىگىن اشادى ولەڭ...» دەپ اباي انىعىن ايتقان. ولەڭ - ءبىزدىڭ رۋحاني ءومىرىمىزدىڭ اينىماس ەرەكشە ءبىر ۇلكەن بولىگى. مۇسىلمان بالاسى قاستەرلەيتىن كيەلى قۇران كىتابى دا ولەڭمەن جازىلعان. ەندەشە، شىن اقىننىڭ جۇرەگىن جارىپ شىققان ناعىز ولەڭ - ءومىردى ءوز سۋرەتى ەمەي نەمەنە؟!

-بۇل سوزدەردى ءسىز اقىن بولعاندىقتان ايتىپ وتىرسىز با؟ «قازاق ادەبيەتى مىقتى» دەپ داۋرىعىپ، شۋلاي بەرگەنشە نەگە وسى مىقتىلىعىمىزدى وزگەلەرگە مويىنداتا المايمىز؟

-راس، وكىنىشكە وراي ءبىز «ادەبيەتىمىز مىقتى» دەپ كەۋدە كەرگەنىمىزبەن وسى مىقتىلىعىمىزدى ءتيىستى دەڭگەيدە الەمگە تانىتا الماي كەلەمىز. قازاقتا قانشاما كەرەمەت ادەبي تۋىندىلار، قانشاما تەگەۋرىندى قالامگەرلەر بار؟! سولاردىڭ سىرتقى ناسيحاتى كەم. ويتكەنى رۋحاني دۇنيەلەردىڭ ءوز ارامىزداعى ىشكى ناسيحاتى دا از. ءبىزدىڭ ءبىر كەمشىن تۇسىمىز بولسا ول - كونەدەن تامىر تارتقان جىراۋلىق پوەزيامىزدىڭ ءوز دەڭگەيىندە الەم تىلدەرىنە اۋدارىلماۋىندا. مىسالى دانتەنىڭ «قۇدىرەتتى كومەدياسىن» اقيىق مۇقاعالي قازاق تىلىندە سويلەتتى. ال سول مۇقاعاليدى ءبىز دانتەنىڭ ەلىنە تانىتا الدىق پا؟ گومەردىڭ «يلليادا»، «وديسسەيا» داستاندارىن قارا سوزبەن اۋدارعان ابىز اقسەلەۋ سەيدىمبەكتى گرەكتەرگە مويىنداتا الدىق پا؟ مۇنداي مىسالداردى جۇزدەپ كەلتىرە بەرۋگە بولادى. ءبىر سۇيسىنەرلىگى قازاقتىڭ قابىرعالى قالامگەرلەرى الەمدىك ادەبيەتتىڭ وزىق ۇلگىلەرىن قازاق وقىرمانىنا ءوز ەرىك-جىگەرلەرىمەن ەڭبەكتەنىپ جەتكىزدى. بۇل جانكەشتىلىكتەرى ءۇشىن قالامگەر قاۋىمىن جوعارىداعىلار جارىلقاي دا قويعان جوق.

باياعىدا قازاقتىڭ مارقاسقا قالامگەرى عابيت مۇسىرەپوۆ سارابدال سىنشى ساعات اشىمباەۆقا بەرگەن سۇحباتىندا «جاپون دەيتىن از عانا حالقى بار كىشكەنە مەملەكەت بولسا دا بۇكىل دۇنيەدەگى تەحنيكانىڭ ەڭ وزىقتارىن جيناپ، وزگەلەردەن ۇيرەنۋ ارقىلى وزدەرىنىڭ وزىق تەحنيكالارىن جاساپ شىعاردى. ادەبيەت تە سول سەكىلدى. سونداي وزىق داستۇرلەردى، وزىمىزگە كەرەك نارسەلەردى ءسىڭىرىپ الماساق ارتتا قالىپ قالامىز» دەگەندەي ويلارىمەن بولىسكەن. دەمەك، وزگەدەن ۇيرەنۋدىڭ پايداسى بولماسا، زيانى جوق.

قازىر قازاق ادەبيەتىنە تىڭنان قوسىلىپ جاتقان بۇگىنگى جاستاردىڭ جاڭا زامانعا ساي وقىپ، بىلگەنى كوپ. قازىر قانشا تەحنولوگيالار ءداۋىرى دەسەك تە جالپى قازاقتىڭ رۋحاني دۇنيەلەرگە دەگەن قۇشتارلىعىنىڭ ارتقانى بايقالادى. بازبىرەۋلەر بۇگىندە ەشكىم توم-توم رومان، حيكاياتتاردى، ولەڭ اتاۋلىنى وقىمايدى دەگەنگە ساياتىن جاڭساق پىكىرلەر ايتادى. مەنىمشە ولاي ەمەس. جالپى قاي قوعامدا بولماسىن ادامزات بالاسى بەلگىلى ءبىر اۋمالى-توكپەلى زامانداردى باستان وتكەرگەننەن كەيىن مىندەتتى تۇردە ارتىنا قارايلاپ، وتكەنگە ورالىپ وتىرادى. جەتپىس جىل بويى ۇلتىمىزدى «قاماۋدا» ۇستاعان قىزىل قۇرساۋدان شىعىپ، تاۋەلسىزدىك العان تۇستان باستاپ ءبىز دە تاريحىمىزدى تۇگەندەپ، رۋحاني مۇرالارىمىزدى قايتا تۇلەتىپ، جاڭعىرتا باستادىق. ءار سالاداعى باتىل قادامدار ەندى-ەندى جاسالا باستادى. مىنەكي، بۇل - ورالۋ، ياعني تامىردان اجىراماۋدىڭ امالى. «وتكەنسىز بولاشاق جوق» دەمەكشى، بۇل بەتبۇرىس قازاق حالقىن جاڭا بيىكتەرگە كوتەرە باستادى.

-وسى ورايدا ءوز تاراپىڭىزدان ايتار ۇسىنىستارىڭىز بار ما؟

قاراپ وتىرساق، كەزكەلگەن قازاق بالاسى وزگەنىڭ ادەبيەتىنەن حاباردار. كەرىسىنشە سىرتتاعى كوپ ەل ءبىزدىڭ باي ادەبي مۇرامىزدان بەيحابار. سەبەبى مەملەكەتىمىزدىڭ سىرتقى يميدجگە جۇمىس ىستەۋى ەكونوميكالىق جەتىستىكتەرگە نەگىزدەلگەن. قۇداي-اۋ، دوڭگەلەنگەن دۇنيەنى شىر اينالدىرعان الپاۋىت ەلدەردى قانداي تەحنيكالىق، ەكونوميكالىق جەتىستىكتەرىمىزبەن تاڭ قالدىرماقپىز؟ ءبىز وزگەلەردى تەك قانا ءوزىمىزدىڭ ۇلتتىق قۇندىلىقتاردان باستاۋ الاتىن دۇنيەلەرىمىزبەن عانا وزىمىزگە قاراتا الامىز.

قازاق قوعامىنا ۇلكەن مىندەتتەر اتقاراتىن ءىرى رۋحاني ورتالىق قاجەت. ءبىز بولساق ءالى كۇنگە دەيىن «الدىمەن ەكونوميكا سوسىن ساياسات» دەپ ءالى ءجۇرمىز. ال ادەبيەت، مادەنيەت، جالپى رۋحانيات قايدا قالدى سوندا. دامىپ كەتكەن ەكونوميكامىز بولسا رۋحانياتىمىزدى العا سۇيرەپ الا جونەلگەنى قايسى؟ ادەبيەت جازۋشىلارعا، مادەنيەت ارتىستەر مەن انشىلەرگە عانا كەرەك پە سوندا؟! بۇگىندە ەلىمىزدە قوعامدىق-ساياسي، ەكونوميكالىق، الەۋمەتتىك زەرتتەۋلەر مەن تالداۋلار جاسايتىن ءىرىلى-ۇساقتى بىرنەشە ورتالىقتار بار. وسى توڭىرەكە ونداعى ماماندار ارنايى ساراپتاما جۇرگىزىپ ءار توقساندى، ءار جىلدى قورتىندىلاپ وتىرادى. بۇعان قوسا بۇل ماسەلەلەر ۇنەمى مەملەكەت نازارىندا تۇرادى. ال قازاق ادەبيەتىنىڭ وتكەن-كەتكەنىن تۇگەندەپ، بۇگىنگى بەتالىسىن ساراپتاپ، جامان مەن  جاقسىسىن ايىرىپ وتىراتىن ورتالىعىمىز نەگە جوق؟ جالعىز جازۋشىلار وداعىنا بارلىق مىندەت-تاپسىرمالاردى ءۇيىپ-توگە بەرۋگە بولماس. ول قوعامدىق ۇيىم عانا. بىراق سوعان قاراماستان وندا قازاق ادەبيەتىنىڭ يگىلىگى ءۇشىن ءبىرشاما جۇمىستار اتقارىلۋدا. مەنىڭ ايتايىن دەپ وتىرعانىم مەملەكەت ەكونوميكاعا قانداي كوڭىل بولسە ادەبيەتكە دە سونداي كوڭىل ءبولۋى كەرەك.

دەسەك تە قازىرگى ۋاقىتتا كىتاپ شىعارۋ ەڭ وڭاي شارۋا بولىپ قالدى. اقشاڭ بولسا بولدى. كىم نە جازسا دا كەزكەلگەن باسپا كىتاپ ەتىپ باسىپ شىعارا بەرمەك. مەملەكەتتىك دەڭگەيدەگى ءتۇرلى سىيلىقتاردى تاعايىنداۋدا دا ءمۇلت كەتەتىن تۇستارىمىز جوق ەمەس. جازۋشى دەگەن اتقا وسىلايشا كىر جۇعا باستادى. وقىرمان تالعامى شاتاستى. مىنە، سوندىقتان دا جاڭا ادەبي اعىمدى ساراپتاپ وتىراتىن ورتالىقتار كەرەك بىزگە.

وسى ورايدا ءبىر ايتا كەتەرلىك جايت، مۇحتار ماعاۋين جيىپ-تەرگەن «بەس عاسىر جىرلايدى» كوپتومدىق جيناقتى كەيىنگى زەردەلى زەرتتەۋشىلەر تولىقتىرا ءتۇسىپ جانە دە ونداعى جىر، قيسسا، داستاندار اعىلشىن، فرانتسۋز، قىتاي، جاپون ءسىندى ەڭ كوپ تاراعان تىلدەرگە شاما-شارقىنشا، قارا سوزبەن ءتۇسىندىرۋ ارقىلى بوسا دا اۋدارۋدى قاجەت ەتەدى. ول ءۇشىن قازاقتىڭ ارعى-بەرگى تاريحىنان حابارى بار تالانتتى اقىندار، تانىمى تەرەڭ عالىمدار القاقوتان وتىرىپ جىراۋلىق پوەزيانى الەمدىك دەڭگەيگە كوتەرۋگە جۇمىلا كىرىسۋ قاجەت.

-دەمەك، اۋدارما سالاسىنا مىقتاپ كوڭىل ءبولۋ قاجەت دەيسىز عوي؟

-ءبىز وسى ۋاقىتقا دەيىن الەم ادەبيەتىن تەك ورىس تىلىندەگى نۇسقاسىن اۋدارۋمەن اينالىسىپ كەلدىك. قازىر، قۇدايعا شۇكىر جاڭا زامانعا بەيىمدەلگەن ءبىر ەمەس بىرنەشە شەت ءتىلىن بىلەتىن، قازىرگى ادەبيەتتە ءوز ورنىن تاۋىپ ۇلگەرگەن جاستار بارشىلىق. مىسالى اقىن دارەن بەرىكقاجىۇلى اعىلشىن ءتىلىنىڭ بىلگىر مامانى بولسا، اقىن تاناكوز تولقىنقىزى فرانتسۋز ءتىلىن ءپاريجدىڭ وزىنەن وقىپ كەلگەن. ونىڭ سىرتىندا كورشىلەس قىتايدان، تۇركيا، يراننان اتامەكەنىمىزگە ورالىپ جاتقان قانشاما ءبىلىمدى دە تالانتتى جاستار بار؟!  سولاردىڭ زور پوتەنتسيالىن پايدالانا وتىرىپ قازاق ادەبيەتىنىڭ تاڭداۋلى تۋىندىلارىن وزگە تىلدەرگە اۋدارۋدى قولعا الساق يگىلىكتى ءىس بولار ەدى. «ەڭبەگىنە قاراي ونبەگى» دەمەكشى، بۇل رەتتە قالاماقى ماسەلەسى دە وڭتايلى شەشىلۋى ءتيىس. ايتپەسە بىزدەگى بۇگىنگى اۋدارما سالاسى كوبىنە وزگەلەردى قازاقشالاۋعا باعىتتالىپ بارادى.

كەڭەس ۇكىمەتى تۇسىندا ادەبي اۋدارما سالاسى رەسمي تۇردە مىقتاپ قولعا الىندى. بىراق، ول كەزدەگى اۋدارمالار ناۋقانشىلدىققا ۇرىنىپ، نەگىزىنەن كەڭەس يدەولوگياسىنا ىڭعايلى دۇنيەلەر عانا اۋدارىلدى. ءبىز بۇگىندە بارلىق ءىس-ارەكەتتەرىمىزدى ۇلتتىق يدەولوگياعا نەگىزدەۋىمىز كەرەك. نەگە ءبىز قازاق پوەزياسى تۋرالى ءسوز باستاعاندا، ارىعا بارۋعا ەرىنشەكتىك تانىتىپ ابايدان بەرى تاراتا سالامىز؟ دەمەك ءوزىمىز كوكجيەكتىڭ ارعى جاعىنا ۇڭىلە بەرمەيتىن بولعانىمىز عوي. قازاقتىڭ قازتۋعان، دوسپامبەت، مۇرىن، اقتامبەردى سىندى جىراۋلارى قاي ۇلتتا بار ەكەن؟ جالپى، ادەبي مۇرانى الەمگە ايگىلەۋ ءۇشىن مەملەكەتتىك دەڭگەيدە جوسپارلى تۇردە وراسان شارۋالار اتقارىلۋى ءتيىس ەدى. الايدا، بۇگىندە قولعا الىنىپ جۇرگەن «مادەني مۇرا» باعدارلاماسى كوبىنە كونە ەسكەرتكىشتەردى جاڭارتۋمەن، بۇعان دەيىن سۇرىپتالىپ قويعان تاريحي دەرەكتەردى بىرىكتىرىپ، ساناۋلى تيراجدى ەنتسيكلوپەديا باسىپ شىعارۋمەن عانا شەكتەلىپ تۇرعانداي.

-ۋاقىت وزعان سايىن اقپاراتتىق تەحنولوگيا سالاسى قاتتى دامۋ ۇستىندە. ايتسە دە ءبىز وسىنداي ەلەكتروندى-تەحنيكالىق يگىلىكتەردى ادەبيەتتى ناسيحاتتاۋعا ءتيىمدى پايدالانا الماي جۇرگەن سياقتىمىز...

- دۇرىس ايتاسىڭ، مىسالى عالامتوردان شەتەلدىڭ كەزكەلگەن اقىن-جازۋشىسى تۋرالى مىڭداعان دەرەكتەر مەن ولاردى شىعارمالارىنا قول جەتكىزە الاسىڭ. ال سول عالامتوردا قازاق ادەبيەتىنە قاتىستى دەرەك ىزدەگەن ادام ەشتەڭە تاپپايدى. ارينە ەلىمىزدە ادەبيەتتى ناسيحاتتايتىن ءتۇرلى دەڭگەيدەگى سايتتار جۇمىس ىستەيتىن كورىنەدى. بىراق ولاردىڭ بارلىعى دەرلىك جۇيەسىز، تالعامسىز قۇرىلعان. ينتەرنەت دەگەننىڭ ءوزى اشىق-شاشىق جاتقان شەكسىز دۇنيە عوي. بىراق، ونى دۇرىستاپ پايدالانساق ءبىر ءجون. كىم بولسا سونىڭ شيماي-شاتپاقتارى ەنگىزىلگەن، قايداعى ءبىر كولدەنەڭ كوكاتتىلار تورىنە جايعاسىپ العان سايتتاردان نە پايدا؟ سونداي-اق بىرنەشە اۆتوردىڭ شىعارمالارىن ءبىر كىتاپقا بىرىكتىرگەن ۇجىمدىق جيناقتار شىقپاي كەتتى. بۇل اسىرەسە وقىرمان ءۇشىن ءتيىمدى بولار ەدى. بەلگىلى ءبىر قالامگەرلەردىڭ كىتاپتارىن جەكە-جەكە ساتىپ العانشا، ۇجىمدىق جيناق ساتىپ الىپ وقۋ ارقىلى بىردەن بىرنەشە اۆتوردىڭ ەڭبەگمەن تانىسۋعا مۇمكىندىك بولار ەدى. ونىڭ ۇستىنە قازاق قالامگەرلەرى باتىستا جاقسى جولعا قويىلعان «ادەبي اگەنت» قىزمەتىنە جۇگىنبەيدى. باسپاعا دا باسقاعا دا ءبىر ءوزى جۇگىرەدى. بولماسا جوعارىداعىلارعا الاقان جايۋعا ءماجبۇر. تاعى ءبىر ەسكەرەتىن جايت، قازىرگى تاڭدا قازاق ادەبيەتى تەلەارنالاردان ناسيحاتتالمايدى. بۇل باعىتتا تەك قازاق راديوسى مەن شالقار ۇلتتىق ارناسى شاما-شارقىلارىنشا جۇمىس ىستەۋدە. وسى ماسەلەلەردىڭ ءبارى دە جوعارىداعىلاردىڭ جوسپارىندا بولسا دەپ ويلايمىن. سەبەبى، قازاق ادەبيەتى بارىنشا ناسيحاتتالسا قازاق ءتىلى توڭىرەگىندەگى پروبلەما كۇرت ازايار ەدى. ءبىز تاۋەلسىز زامانىمىزدىڭ تاۋەلسىز ادەبيەتىن تيىسىنشە دارىپتەمەي ۇلتجاندى ۇرپاق وسىرە المايمىز. قاي مەملەكەتتىڭ دە بيىك بولۋى ول ەڭ الدىمەن رۋحاني بايلىعىمەن ولشەنەتىن بولسا كەرەك.

وسىنىڭ ءبارىن مۇمكىندىگىنشە رەتتەۋگە بولادى. تىم ەركىنسىپ كەتكەن بۇگىنگىدەي قوعامدا تانىسى بارلار مەن قالتالىلار ۇتىپ، ۇتىلىپ وتىرعان شىنايى جازۋشىلار عانا. بالكىم، بۇرىن دا سولاي بولعان شىعار... نە دەسەك تە ۇلت ادەبيەتى كىم كورىنگەننىڭ ويىنشىعىنا اينالماۋى ءتيىس.

-ءسوز سوڭىندا ءبىر ولەڭ وقىپ بەرسەڭىز...

-تۋعان جەردiڭ قار، مۇزى،

ايازىڭمەن «جۋىندىر».

تۋعان جەردiڭ بال قىزى،

بۇرىمىڭمەن بۋىندىر.

تۋعان جەردiڭ بۇلاعى،

تولقىنىڭمەن ات مەنi.

تۋعان جەردiڭ جىلانى،

شىرىلداتىپ شاق مەنi.

تۋعان جەردiڭ شەڭگەلi,

تىرنا، اياماي بەتiمدi.

تۋعان جەردiڭ ەرمەنi,

اۋزىما قۇي ءوتiمدi.

تۋعان جەردiڭ دوڭىزى،

قان جوسا قىپ جارىپ كەت.

تۋعان جەردiڭ قوڭىزى،

دومالاتىپ الىپ كەت.

تۋعان جەردiڭ قاسقىرى،

كەمiر، اقىن سۇيەگiن.

تۋعان جەردiڭ تاس، قۇمى،

سەنi وسىلاي سۇيەمiن!

-راقمەت! قالامىڭىز مۇقالماسىن!

سۇحباتتاسقان المات ءيسادىل

الاشقا ايتار داتىم

نەمىستەردىڭ ادەبيەتى مەن مادەنيەتىن وزگە ەلدەردە نايحاتتايتىن «گەتە ينستيتۋتى» كوپتەگەن ەلدەردە جۇمىس ىستەۋدە. ونىڭ سىرتىندا مىقتى مەملەكەتتەر وزگەلەردىڭ رۋحاني كەڭىستىگىن ۇنەمى باقىلاۋدا ۇستاپ وتىرادى. سەبەبى ولار ءبارىن زەرتتەپ، زەردەلەپ وتىرادى. ۇرىمتال تۇستا وزدەرىن دە كورسەتىپ قالادى، وزگەنى دە مويىنداتا بىلەدى. وسى رەتتە ءبىز ەڭ بولماسا اباي، جامبىل، شاكارىم، ماحامبەت، اۋەزوۆ، ماقاتاەۆ ينستيتۋتتارىن اشىپ ولاردىڭ جۇمىسىن شەتەلدەردە جۇرگىزۋىمىز قاجەت. ورىستاردىڭ ءوزى بۇكىل تاريحي تۇلعالارى مەن كلاسسيك جازۋشىلارىنىڭ شىعارمالارىن ۇلكەن ەكرانعا شىعارا باستادى. ال بىزدە ءالى كۇنگە دەيىن اباي تۋرالى جۇرت كورەتىندەي ءبىر كوركەم فيلم جوق. قاجەت بولاتىن بولسا قازاقتىڭ قايماقتارىنىڭ بارلىعىنىڭ دەرلىك ءبىر ەمەس بىرنەشە سەرياعا جۇك بولا الاتىنداي قادىر-قاسيەتى دە قاۋقارى دا بار. تەك وسىنى قولعا الاتىن كىسى تابا الماي قور بولاسىڭ. بولماسا ادەبيەتتىڭ ءورىسى ءبىر رەتكى ءمۇشايرالار مەن بايگەلەرمەن، تارالىمى 1000 دانا كىتاپتىڭ شىعۋىمەن عانا شەكتەلىپ قالا بەرمەك.