كەشە ماسكەۋدە، لومونوسوۆ اتىنداعى ۋنيۆەرسيتەتتە ءدارىس وقىعان قر پرەزيدەنتى نۇرسۇلتان نازارباەۆ سوۆەت وداعىن قايتا ورالتىپ، قالپىنا كەلتىرۋدىڭ مۇمكىن ەمەستىگىنە توقتالدى.

ء«بىزدىڭ قارىم-قاتىناسىمىزدىڭ تىعىزدىعىنا قاراپ، اسىرەسە، ەۋرازيالىق ەكونوميكالىق وداق قۇرۋىمىزعا بايلانىستى ساراپشىلار مەن ساياساتكەرلەر «سوۆەت وداعى قايتادان قۇرىلىپ جاتىر» دەپ الەمدى ۇرەيلەندىرە سويلەيدى. سوۆەت وداعى تۋرالى ميفتىك رەينكراناتسيا (ورالۋ، تۋ. -رەد) ءبىزدىڭ ازاماتتارىمىزدىڭ دا بويىندا بار. بۇنداي تۇسىنىك شىندىقتان الىس ءام تامىرسىز»، - دەدى قر پرەزيدەنتى.

«سوۆەت وداعىنىڭ قايتىپ كەلمەسىنىڭ ءۇش سەبەبى مىنادا، - دەپ ءسوزىن جالعاستىردى نۇرسۇلتان ءابىشۇلى. – بىرىنشىدەن، سوۆەت وداعىنىڭ كەلبەتىن بەينەلەيتىن رەينكراناتسياعا وراي ينستيتۋتتىق بازا جوق، ءبارى تۇبەگەيلى تۇردە، ءبىرجولا تاريحقا اينالدى. ەكىنشىدەن، بۇرىنعى سوۆەت حالقى قازىر ءوزىنىڭ مەنشىكتى مەملەكەتىندە، وزىنە ءتان سالت-ءداستۇردىڭ اياسىندا ءومىر سۇرۋدە. ۇشىنشىدەن، قازىرگى مەنشىكتىك جۇيە، الەۋمەتتىك قۇرىلىم مەن ەكونوميكالىق قالىپ سوۆەتتىك ارحايكادان الىسقا كەتىپ ۇلگەردى».

پرەزيدەنت، ءدارىس وقۋ بارىسىندا سونداي-اق، ەۋرازيالىق ەكونوميكالىق وداقتىڭ جايىنا توقتالىپ، ويىن اشىق ايتتى.

ء«سوزدىڭ اشىعىنا جۇگىنەيىن، مەن اتالعان ەكونوميكالىق وداق تۋراسىندا جاعىمسىز پىكىرلەردى كوپ ەستىپ ءجۇرمىن. بۇل ءبىر ەسەپتەن ەۋرازيالىق ەكونوميكالىق وداق وزگە دە ءىرى ەكونوميكالىق قاۋىمداستىقتارعا كۇشتى باسەكەلەس بولادى دەگەندى بىلدىرسە كەرەك. جانە وسى ۋاقىتقا دەيىن  كەڭ اۋقىمدا قالىپتاسقان بىرجاقتى باسەكەلەستىك ەندى ءبىزدىڭ جاڭا ينتەگراتسيالىق بىرلىگىمىزدىڭ اينالاسىنا توپتاسا الاتىندىعىنا ايعاق»، - دەدى نازارباەۆ.

كەدەندىك وداق، ەۋرازيالىق ەكونوميكالىق وداق، ۇجىمدىق قاۋىپسىزدىك كەلىسىمى، رەسەيمەن اراداعى بۇدان وزگەدە بارىس-كەلىس پەن ارالاس-قۇرالاستىقتىڭ تۇرلەرى قازاق حالقىن ويلاندىرىپ وتىرعانى انىق. ونىڭ ۇستىنە رەسمي ماسكەۋدىڭ وزىنە ەتەنە جاقىن ۋكراينا حالقىنىڭ ىشىكى ىسىنە ارالاسۋى، جيرينوۆسكي، ليمونوۆ دەيتىن كەراۋىز ساياساتكەرلەردىڭ قازاق جەرىنە كوز تىگىپ، كوستەڭدەپ سويلەۋى وي ۇستىنە وي جاماپ وتىرعانى دا شىندىق. الايدا، بىتىمگەرلىك ساياسات ۇستاناتىن قازاق پرەزيدەنتى ەكى تاراپتى دا ەكونوميكالىق وداقتىڭ كەلەشەگىنە سەندىرىپ باعۋدا. بۇگىنگى ەكونوميكالىق وداقتار كەشەگى سوۆەتتىك وداق ەمەستىگىن نۇرسۇلتان ءابىشۇلى كوپتەن بەرى ايتىپ ءجۇر. وسى رەتتە دە سول ءسوزىن قاداپ ايتتى. «سوۆەت وداعى... بۇل مۇمكىن ەمەس»، - دەدى ول.

Abai.kz