ءماسىموۆ ماڭگىلىك ەلگە ورالدى

Abai.kz اقپاراتتىق پورتالى وتستاۆكاعا كەتىپ جاتقان احمەتوۆ ۇكىمەتىن «ۇندەمەيتىن ۇكىمەت» اتاعان ەدى. «ۇندەمەيتىن ۇكىمەت» سول ۇندەمەگەن قالپى جىلى ورىنىن بوساتىپ، اتقارۋشى بيلىكتى قايتادان كارىم قاجىمقانۇلىنىڭ قولىنا قايتارىپ بەردى. سەرىك نىعمەتۇلى 1 جىل 7 اي (ول 2012 جىلى 24 قىركۇيەكتە پرمەەر-مينيسترلىككە تاعايىندالعان بولاتىن) قر ۇكىمەتىن باسقارىپتى. احمەتوۆتىڭ پرەمەرلىگىن ەل ءىشى جىلى قابىلداعان ەدى. ەشقانداي كلاندا جوق. سۋىققولدىلىعى بايقالماعان. سىپايى، سىلىق. الايدا، احمەتوۆ سول ءيميدجىن ساقتاپ قالۋعا تىرىسىپ باققانداي باسقا ەشتەڭە تىندىرا قويمادى. تىلگە سىنبادى. كوشى-قون ماسەلەسىنە قىڭبادى. رەسەيمەن كەدەندىك وداق شەڭبەرىندە باسەكەگە تۇسە المادى. ەسەسىنە ۇكىمەتتىڭ سونداي ۇنسىزدىگى مەن مومىندىعى پرەزيدەنت اكىمشىلىگىن باسقارعان كارىم ءماسىموۆتىڭ سالماعىن ارتتىرا تۇسكەن. جۇرتتىڭ ەسىندە شىعار، 14 اقپاندا بولعان ۇكىمەتتىڭ كەڭەيتىلگەن وتىرىسىندا اينالاسىنا قاداۋ-قاداۋ تاپسىرما بەرگەن ەلباسى احمەتوۆكە ەمەس، ماسىموۆكە كوبىرەك قاراپ، سوعان مويىن بۇرىپ، سو كىسىمەن كەڭەسىپ وتىرعانداي، سو كىسىگە عانا ءۇمىت ارتقانداي سويلەگەن ەدى. ونىڭ ۇستىنە، ۇكىمەت پەن پرەزيدەنت اكىمشىلىگى اراسى ناشار ەكەن دەگەندى ەستيتىنبىز. اقىرى، مىنە، احمەتوۆ وتستاۆكاعا اتتانىپ ۇكىمەت باسشىلىعىنا ءماسىموۆ قايتا تاعايىندالىپ جاتىر. كارىم قاجىمقانۇلى بۇدان بۇرىندا پرەمەر-ءمينيستردىڭ ورىنتاعىنا وتىرىپ كورگەن. تاجىريبەسى مول. قىسقاسى، ءماسىموۆتىڭ تاعايىندالۋى – قازاقستان ۇكىمەتىنىڭ تاريحىندا بولماعان تاعايىندالۋ.

ال ەندى ءماسىموۆتىڭ بۇل تاعايىندالۋىندا قانداي ءمان بار؟

بىرىنشىدەن، پرەزيدەنت ونىڭ كەدەندىك وداق شارتتارىن ءتۇزىۋ بارىسىنداعى تاراپتارمەن (رەسەيمەن، بەلارۋسسيامەن) بايلانىسىن كادەگە جاراتۋدى كوزدەۋى مۇمكىن.

ەكىنشىدەن، دۇنيەجۇزىلىك كەزەكتى قارجى داعدارىسى كەزىندە ۇكىمەتتى باسقارىپ ەلدى داعدارىستان الىپ شىققان ۇكىمەت باسشىسى رەتىندە باعالانۋى ىقتيمال.

ۇشىنشىدەن، ءماسىموۆ مامىلەگەر تۇلعا. ونىڭ كىسىگە جۇعىمدىلىعى دا ەسەپكە الىنعان شىعار.

تورتىنشىدەن، قىتايدان جۇمىسشى كۇشىن تارتىپ، سولتۇستىكتى ديحان-شارۋالارمەن تولتىرۋ دەيتىن اسا نازىك شارۋانى قحر-دا وقىعان، قىزمەت جاساعان، قىتاي ءتىلىن بىلەتىن ءماسىموۆ جۇزەگە اسىرۋى مۇمكىن دەگەندى پرەزيدەنت ويعا الدى دەلىك.

بەسىنشىدەن، ەۋرازيالىق ەكونوميكالىق كەڭىستىككە قادام باسار تۇستا ماسىموۆپەن ۇكىمەت باسشىسى رەتىندە كەڭەسە وتىرىپ جۇمىس ىستەۋ پرەزيدەنتكە ءتيىمدى بولسا كەرەك. التىنشىدان... جەتىنشىدەن.... جۇزىنشىدەن.... وسىنداي سەبەپتەرمەن كارىم قاجىمقانۇلى ماڭگىلىك ەلدىڭ ۇكىمەت باسشىلىعىنا ورالدى.