مەملەكەتتىك سىيلىقتىڭ لاۋرەاتى، جازۋشى دۋلات يسابەكوۆ كەشە ەلباسىمەن جۇزدەسىپ، اقوردادا بولىپ قايتتى. قالامگەر مەن پرەزيدەنت اراسىندا قانداي اڭگىمە بولدى؟ اۋزى ءۋالى اعامىز مەملەكەت باسشىسىمەن نە جايىندا سويلەستى؟ وسى ساۋالدار توڭىرەگىندە Abai.kz اقپاراتتىق پورتالىنىڭ ءتىلشىسى جازۋشىمەن شاعىن سۇحبات جاسادى.

- دۋلات اعا، بۇل، ارينە، ءداستۇرلى سۇراق: ەلباسىمەن ارالارىڭىزدا قانداي اڭگىمە بولدى؟

- پرەزيدەنتپەن كەزدەسىپ شىققان بەتتە مەنەن تەلەارنالاردىڭ جۋرناليستەرى شۇعىل سۇحبات العان بولدى. بىراق ولاردىڭ مەنىڭ ءسوزىمدى ءۇزىپ-جۇلىپ بەرگەنى ۇنامادى. مەن تەلەجۋرناليستەرگە كەزدەسۋ بارىسىنداعى اڭگىمەمىزدى تولىقتاي ايتتىم-اۋ دەيمىن. بىراق ولار مەنىڭ لوندونعا شىعارماشىلىق ساپارمەن باراتىنىمدى، وسى ساپارىم جايلى ەلباسىن قۇلاعدار ەتكەنىمدى عانا كورەرمەن قاۋىمعا جەتكىزدى. بۇدان جۇرت ويلاۋى مۇمكىن عوي، مىنا جازۋشىلار تەك وزدەرىنىڭ قارا باستارىنىڭ عانا قامىن كۇيتتەيدى ەكەن دەپ.

-  سوندىقتان نەگىزگى اڭگىمەلەرىڭىزدى Abai.kz اقپاراتتىق پورتالىنىڭ وقىرمانىنا بىلدىرە وتىرايىق.

- نەگىزگى اڭگىمە ۋكراينانىڭ باسىنداعى بۇگىنگى احۋال تۇرعىسىنان ءوربىدى. ءتىلى تۋىس، ءدىنى ءبىر، تاريحي تامىرى تەرەڭگە كەتكەن، ءتىپتى ءبىر-بىرىنەن ءبولىپ-جارىپ قاراۋعا بولمايتىن ۋكراينا مەن رەسەيدىڭ اراسىنداعى بۇگىنگى شيەلەنىس مەنى قاتتى تولعاندىرادى دەدىم پرەزيدەنتكە. تاريحتا «كيەۆ كنيازدىگى» دەگەن بولدى. «كيەۆ – ورىستىڭ اناسى» دەپتە ايتىلاتىن. مىنە، وسىنداي باياعىدان ىلىك-شاتىس ەلدىڭ اراسى ءبۇلىنىپ جاتقاندا ءبىزدى دە ءارتۇرلى ويلار شىرماۋىقشا شىرمايدى ەكەن. شىعىسىمىزداعى ەلمەن دە، سولتۇستىكتەگى كورشىمىزبەن دە ءدىنىمىزدىڭ، ءدىلىمىز بەن  ءتىلىمىزدىڭ  ءۇش قايناسا سورپاسى قوسىلمايدى. ال، ەلىمىزدىڭ سولتۇستىك وبلىستارى بولسا، سول سولتۇستىكتەگى كورشىمىزگە قاراپ ەلەڭدەپ وتىراتىنى بەلگىلى. بۇلار دا ەرتەڭ رەفەرەندۋمداتىپ شىعا كەلمەي مە؟ – دەدىم. پرەزيدەنت كۇلىپ: «اعايىندى ەكەۋى الا كوز بولىپ قالسا، وعان ءبىزدىڭ قاتىسىمىز جوق قوي» دەدى. سوسىن ەلدىڭ تىنىشتىعى مەن مەملەكەتىمىزدىڭ تۇتاستىعىن ماڭگى ساقتاپ قالۋدىڭ قامى بىزدىكى، جاتپاي-تۇرماي الىس-جاقىننىڭ بارىمەن سويلەسىپ وتىرمىز. كىمنىڭ كوكەيىندە قانداي وي ءجۇر، پيعىلى قانداي –سونىڭ ءبارىن قاداعالاپ، باقىلاپ وتىرمىز. ەلىمىزدىڭ تاۋەلسىزدىگىنىڭ ءبىر ءتۇيىرىن دە جاتتىڭ قولىنا بەرمەيمىز. مەن نەگە «تىنىشتىق-تىنىشتىق» دەي بەرەمىن. تىنىشتىقتىڭ، سىيلاستىقتىڭ قادىرىن ءبىزدىڭ حالىق اينالادا بولىپ جاتقان وقيعالار دۇرمەگىنە قاراپ وتىرىپ پايىمداپ ۇلگەرگەن شىعار دەپ ويلايمىن. وسى تىنىشتىقتىڭ ارقاسىندا اياققا ابدەن تۇرىپ الۋىمىز كەرەك. شۇكىر، شەكارامىزدى بارلىق تاراپتاعى كورشىلەرىمىزبەن بەكىتىپ الدىق. ىشكى جالپى ءونىپ جىلدان جىلعا ءوسىپ كەلەدى. تابيعي رەسۋرستارىمىزدىڭ يگىلىگىن كورىپ باستادىق» ، - دەدى. سودان ماعان كۇلە قاراپ قويىپ: «دۇكە، - دەپ اڭگىمەسىن جالعاستىردى، - دۇكە، مەن ەلدىڭ تىلەگىن، وي ارمانىن، ماقسات مۇراتىن جاقسى بىلەتىن اداممىن. بىراق ءار نارسەنىڭ ءوز رەتى بار. بىرەۋلەر ءتىل ماسەلەسىن توتەسىنەن قويعىسى كەلەدى. بىرەۋلەر ءتىپىتى ءورىستىلدى تەلەارنالاردى جاۋاپ تاستاۋ كەرەك دەپ جاتىر. ال، وسىنىڭ ءبارىن ءبىر كۇندە قولعا الايىق تا، ىسكە اسىرايىق. سوندا نە بولادى؟ ىشىمىزدەگى جۇرت داۋىرىقپايدى، داۋ شىعارمادى دەي الامىز با؟ شىعارادى. سونىڭ ءبارىن ءبىلىپ، سەزىپ وتىرعاندىقتان تارازى باسىن تەڭ ۇستاۋعا ءماجۇبىرمىز». اڭگىمەسىن وسى سوزبەن ءبىر قايىرعان پرەزيدەن ودان ءارى  گااگاداعى كەزدەسۋلەردىڭ ءمان-جايىن بايان ەتتى. مەن دە وسى ارادا ەلباسىنا ريزاشىلىعىمدى ءبىلدىردىم. مەملەكەت باسشىسىنىڭ بەدەلى – مەملەكەتتىڭ بەدەلى. مەملەكەتىڭ ازۋىن ايعا بىلەپ تۇرعانىمەن ونىڭ باسشىسى دارىنسىز بىرەۋ بولسا، ەل اتىنا سىن. ء«سىزدىڭ  اقش پرەزيدەنتى باراك وباما سياقتى تۇلعالارمەن جەكە كەزدەسىپ اڭگىمەلەسۋىڭىز ءبىزدىڭ كوڭىلىمىزدى تاسىتتى. سول جيىنداعى ساياساتكەرلەردەن ءسىزدىڭ شوقتىعىڭىزدى ءبىز بيىك كورىپ وتىردىق»، - دەپ ەدىم پرەزيدەنت جايراڭداپ كۇلىپ: ء«بارى دە ەلدىڭ قامى عوي» دەپ بۇل اڭگىمەگە نۇكتە قويدى.

- دۋلات اعا، ءسىز بىلتىر قازاقستان حالقى اسسامبلەياسىنىڭ قۇرىلتايىندا موڭعوليادان كوشىپ كەلگەن باۋىرلارىمىزدىڭ ءبىرازى كەرى كوشىپ كەتكەنى تۋرالى ايتقان ەدىڭىز؟ سول ماسەلە اڭگىمە بولدى ما؟

- بولدى. ەلىمىزدەگى وزگە ۇلت وكىلدەرىن قوسپاعاندا 11 ميلليون عانا حالقىڭ بار. نۇرەكە، وسى كوشى-قون جايى قالاي بولادى، مىناۋ اقوردامىز قونىس تەپكەن ارقا دالاسىنىڭ باتىسى مەن سولتۇستىگىندەگى وبلىستارعا كوز الارتىپ، ءسوز قىلىپ جاتقاندار بار دەپ ەدىم، پرەزيدەنت: «كوش توقتامايدى، مۇنىڭ ءبارىن تەرەڭ ويلاپ، ناقتى ىستەرگە قادام جاساعالى وتىرمىز، كوڭىلىڭدەگى الاڭدى تۇسىنەمىن»، - دەدى.

- بايقاۋمىزشا، پرەزيدەنتتە ءبىر بەتبۇرىس بار سياقتى.

-  ءيا، ەلباسىنىڭ ەلگە دەگەن ىقىلاسىن وسى جولى ەرەكشە بايقادىم. ۇلكەن ساياساتكەر عوي. ساياساتتىڭ ادامى الداعى جوسپارىنىڭ ءبارىن اقتارىپ تاستاپ قاراپ وتىرمايدى. بىراق، ءبىر بەتبۇرىستىڭ بارىن وسى جولعى كەزدەسۋدەن مەن دە  ىشتەي اڭعاردىم.

Abai.kz