مينيسترلەر كابينەتى 2015 جىلدىڭ ءبىرىنشى توقسانىندا ەلىمىزدەگى رۇقساتقاعازدار  سانىن 50 پايىزعا دەيىن قىسقارتاتىن زاڭ جوباسىن ازىرلەيدى. بۇل تۋرالى ورتالىق كوممۋنيكاتسيالار قىزمەتىندەگى بريفينگتە ۇلتتىق ەكونوميكا ءمينيسترىنىڭ ورىنباسارى مارات قۇسايىنوۆ حابارلادى. ونىڭ ايتۋىنشا، قازاقستانداعى ينۆەستيتسيالىق احۋالدى جاقسارتۋ ماسەلەلەرى تالقىلانعان 16 قىركۇيەكتەگى ۇكىمەت وتىرىسىندا قازىرگى كەزدە بەرىلەتىن ليتسەنزيالار مەن رۇقساتقاعازداردىڭ جالپى سانىن قىسقارتۋ كەڭىنەن قاراستىرىلعان.

مەملەكەت باسشىسىنىڭ تاپسىرمالارىنا وراي، بۇعان دەيىن 2011 جانە 2012 جىلدارى ليتسەنزيالار مەن رۇقساتقاعازداردى 30 پايىزدان قىسقارتۋدىڭ ەكى كەزەڭى وتكىزىلگەنى بەلگىلى. ماسەلەن، 2011 جىلى انىقتالعان 1015 رۇقساتقاعازدىڭ 348-ءى، ال 2012 جىلى 1096 رۇقساتقاعازدىڭ 297-ءسى قىسقارتىلدى. بۇدان كەيىن، 2014 جىلدىڭ 16 مامىرىندا «رۇقساتقاعازدار مەن حابارلاندىرۋ حاتتار تۋرالى» زاڭ قابىلدانىپ، سول قۇجاتتا رۇقساتقاعازداردىڭ بىرىڭعاي ءتىزىمى جاسالدى. بۇل تىزىمدە 708 رۇقساتقاعازدار مەن 29 حابارلاندىرۋ حاتتار بار. ۇلتتىق ەكونوميكا مينيسترلىگى وكىلىنىڭ ايتۋىنشا، جاڭا رۇقساتقاعازدى قولدانامىز دەسەك، «رۇقساتقاعازدار مەن حابارلاندىرۋ حاتتار تۋرالى» زاڭعا مىندەتتى تۇردە وزگەرىس ەنگىزۋىمىز كەرەك. دەمەك، مۇنداي ماسەلە باسقا زاڭنامالىق اكتىلەردە جازىلمايدى.

وسىلايشا، ۇكىمەت رۇقساتقاعازدار سانىن ازايتۋ مەن ىقشامداۋ باعىتىنداعى جۇمىستاردى ودان ءارى جالعاستىرا بەرمەك. سونداي-اق، مارات قۇسايىنوۆ 2014 جىلدىڭ اياعىنا دەيىن ەلىمىزدە ۇيىمداردىڭ ءوزىن-ءوزى رەتتەۋى تۋرالى جاڭ زاڭ جوباسى دايىندالاتىنىن مالىمدەدى. ءوز كەزەگىندە بۇل رۇقساتقاعازدار پايدا بولاتىن سالالارداعى قۇجاتتاردىڭ سانىن ازايتادى. جالپى العاندا، «رۇقساتقاعازدار مەن حابارلاندىرۋ حاتتار تۋرالى» زاڭدا رەتتەۋشىلىك ىقپالدى تالداۋ مەحانيزمى قاراستىرىلعان. سونىڭ ناتيجەسىندە ءوزىنىڭ تيىمسىزدىگىن كورسەتكەن رۇقساتقاعازداردى قىسقارتۋ جونىندە ۇكىمەتكە ناقتى ۇسىنىستار ەنگىزىلەدى.

سايىپ كەلگەندە، مۇنداي يگى ءىس-شارالاردىڭ بارلىعى وتاندىق كاسىپكەرلىكتى دامىتۋعا جول اشادى. بۇعان دەيىن ايتىلعانداي، قازىر ۇكىمەت ەلباسىمىز نۇرسۇلتان نازارباەۆتىڭ تاپسىرماسى بويىنشا «قر-نىڭ كەيبىر زاڭنامالىق اكتىلەرىنە قازاقستانداعى كاسىپكەرلىك قىزمەت ءۇشىن قويىلاتىن تالاپتاردى تۇبەگەيلى جاقسارتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ازىرلەپ جاتىر. ۇلتتىق ەكونوميكا ۆيتسە-ءمينيسترى اتالعان زاڭ جوباسىنىڭ پارلامەنتكە اعىمداعى جىلى قىركۇيەك ايىنىڭ سوڭىنا دەيىن ەنگىزىلەتىنىن حابارلادى.

مارات قۇسايىنوۆ اتاپ ايتقانداي، جاڭا زاڭدا قۇرىلىس سالاسىنداعى رۇقساتقاعازدار بەرۋدى وڭايلاتۋعا قاتىستى ماسەلەلەر انىق جازىلعان. «سونىمەن قاتار، بۇل زاڭدا 2015 جىلدىڭ 1 قاڭتارىنان باستاپ نىساندار قۇرىلىسىندا تەحنيكا-ەكونوميكالىق نەگىزدەمە مەن جوبالىق-سمەتالىق قۇجاتتاماعا سالالىق ساراپتاما الۋ كەزىندە ء«بىر تەرەزە» قاعيداتىن ەنگىزۋ قاراستىرىلعان. نازار اۋدارارلىق جايتتىڭ ءبىرى، زاڭ جوباسىندا مەملەكەتتىك قابىلداۋ كوميسسياسىن جويىپ، ونىڭ قىزمەتىن تاۋەلسىز ساراپشىلارعا بەرۋ باعىتىنداعى ءىس-شارالار دا قامتىلعان. ويتكەنى، اتقارىلعان جۇمىستىڭ ساپاسىنا تىكەلەي تاۋەلسىز ساراپشىلار جاۋاپتى بولۋى ءتيىس. سونداي-اق، سالالىق ساراپتامانى جويۋ كوزدەلگەن»،- دەپ ءتۇسىندىردى م. قۇسايىنوۆ.

ءامىرلان ءالىمجان 

 Abai.kz