«وتباسى كۇنى» مەرەكەسى قارساڭىندا وڭتۇستىك قازاقستاندا اۋقىمدى شارالار اتقارىلۋدا. سونىڭ باستاماسى رەتىندە بۇگىن وبلىستىق ىشكى ساياسات باسقارماسىنىڭ ۇيىتقى بولۋىمەن وتەتىن شاراعا كورنەكتى جازۋشى، قازاقى داستۇرلەردى ناسيحاتتاۋشى، حالىق قاھارمانى باۋىرجان مومىشۇلىنىڭ كەلىنى زەينەپ احمەتوۆا كەلدى. شاراعا قاتىسۋشىلار الدىمەن باۋىرجان مومىشۇلىنىڭ ەسكەرتكىشىنە گۇل شوقتارىن قويىپ، حالىق قاھارمانىنىڭ رۋحىنا تاعزىم ەتتى.

ودان كەيىن مارتەبەلى مەيمان م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىندە بولىپ ستۋدەنت جاستارمەن، ءبىلىم ورداسىنىڭ ۇستازدارىمەن كەزدەستى. ۋنيۆەرسيتەت قابىرعاسىندا ۇيىمداستىرىلعان «وتباسى – مەملەكەتىمىزدىڭ ىرگەتاسى» شاراسىنا قاتىسىپ، وتباسىلىق قۇندىلىقتار، اتا-ءداستۇرىمىزدىڭ زامان تالعامىنا ساي قايتا جاڭعىرتىلۋى، ۇلكەنگە ىزەت، كىشىنى قۇرمەت تۇتۋ سىندى ماسەلەلەر بويىنشا ءوز ويلارىن ءبىلدىرىپ، جاس بۋىن وكىلدەرىمەن ءوزارا پىكىر الماستى. ءتۇس قايتا زەينەپ احمەتوۆا وبلىستىق «وتىرار» كىتاپحاناسىنا كەلىپ «بابالار اماناتى» اتتى كىتابىنىڭ تانىستىرىلىمىن وتكىزەدى، وقىرماندارمەن جۇزدەسەدى.

وقو اكىمى اپپاراتىنىڭ ءباسپاسوز قىزمەتى