وتكەن ءبىر ماقالامىزدا ءبىزدىڭ وبلىستىڭ اكىمى قوستاناي قالاسى كۇنى مەرەكەسىندە ارشىعان جۇمىرتقاداي اپپاق عيمارات — نەكە سارايىنىڭ اشىلۋى سالتاناتىنا وراي نەكەگە تۇرۋعا كەلگەن جاس جۇبايعا «گوركو» دەپ ايقايلاعانىن جازعان ەدىك (http://abai.kz/post/view?id=1449 ). ءسىرا، ورىسشا سويلەپ، ورىسشا ويلايتىن اكىمىمىز قاتتى قۋانعاننان قازاقتىڭ سالتىن ورىستىڭ سالتىمەن شاتاستىرىپ السا كەرەك. اكىمنىڭ بۇل «باستاماسىن» كوپشىلىك دۇرىس تۇسىنبەپتى. وعان قولداۋ كورسەتۋدىڭ ورنىنا وسى سايتتاعى شىققان ماقالامىزدى «Nur.kz» سەكىلدى سايتتار كوشىرىپ باسىپ، تالاي وقىرمانداردىڭ كوڭىلىن كوتەرىپ تاستادى.

   ال ەندى قازىر سول كەزدە «مىناداي كەرەمەت سالتانات سارايىن سالدىم» دەپ اكىمىمىزدىڭ توبەسى كوككە ەكى ەلى جەتپەي قالعانداي بولىپ ورەكپەگەن كوڭىلى سۋ سەپكەندەي باسىلىپ قالدى. ويتكەنى بۇل سارايدىڭ داۋى وبلىسىمىزدان اسىپ، بايتاق ەلىمىزگە كەڭىنەن تاراپ كەتتى. سويتسەك، «باقساق باقا ەكەن» دەگەندەي ەلباسى كەلگەندە جارقىرقىراتىپ كورسەتىپ، ءبىر بەدەل جيناپ قالامىن دەگەن نيەتپەن سالىنعان دۇنيەنىڭ بىلىعى جەتەرلىك كورىنەدى. وسىنداعى «توبىل» الەۋمەتتىك-سەرىكتەستىك كورپوراتسياسى اناۋ-مىناۋ ەمەس، تۋرا 375 ميلليون تەڭگە جۇمساپ سالعان سارايىنىڭ راحاتىن جەكە مەنشىك يەلەرى كورىپ جاتىر. نەكە سارايى ىسكە قوسىلعاننان كەيىن سوندا نەكەگە تۇرۋعا بارعان جاستار مۇنداعى تىركەلۋ باعاسىن ەستىگەندە تالىپ قالا جازداعان كورىنەدى. سويتسە، الگى سارايدىڭ نەكەگە تۇرۋ سالتاناتىن وتكىزەتىن، ەرەكشە اسەمدەلگەن، قىمبات ماتەريالدارمەن كومكەرىلگەن تۇگەل ەكىنشى قاباتىن «مەرەكە Love» دەگەن فيرما جالعا الىپ، بۇل شارانى وتكىزۋ ءۇشىن 110 مىڭ تەڭگە تالاپ ەتىپتى. سوندا قالاي، ءوزى كوممۋنالدىق كاسىپورىن بولىپ تابىلاتىندىقتان مەملەكەتتىڭ قارجىسىنا سالعان عيماراتتىڭ پايداسىن نەگە جەكە مەنشىك كورۋى ءتيىس؟ بيۋدجەتكە تۇسەتىن تيىن-تەبەندى ءوز قۇلقىنىنان اسىرىپ وتىرعان جەكە مەنشىك فيرمانىڭ بۇل قارەكەتى قانداي زاڭعا سيادى؟ بۇل باتپان قۇيرىقتى ولارعا كىم سىيلاپتى؟ وسىنشا زور كولەمدەگى قارجىنىڭ قايتارىمى كىمنىڭ موينىندا؟ وبلىستاعى قۇقىق قورعاۋ ورگاندارى قايدا قارا وتىر؟

    اسىلى، سوڭعى سۇراعىمىز تىم ارتىقتاۋ سەكىلدى. ويتكەنى الگى «توبىل» كورپوراتسياسىنىڭ اكەسى دە، كوكەسى دە وبلىس اكىمى بولىپ تابىلادى. «ەلباسى كەلەر قارساڭىندا ءبىر جاقسى سىيلىق دايىندايىق» دەسە ول كورپوراتسيا نە دەي الادى؟ جالعىز قوجايىنىنا قارسى شىعۋعا قاۋقارى جەتە مە؟ ارينە، جەتپەيدى. ويتكەنى، «باتىرعا دا جان كەرەك». ال بيۋدجەتتىڭ اقشاسىنا قازىر كىمنىڭ جانى اشىپ جاتىر دەيسىڭ. قۇقىق قورعاۋ ورگاندارى دا اقىماق ەمەس قوي. ىمدى ولار دا تۇسىنەدى. جەلدىڭ قاي جاعىنان سوعىپ تۇرعاندىعىن بىلەتىن جاندار ءۇشىن بۇل جۇمباقتىڭ جاۋابى قيىنعا سوقپايدى.

   مۇنى ءبىر دەڭىز. ەكىنشىدەن، دايىن عيماراتقا كوك تيىن دا سالماستان ەكىنشى قاباتتى تۇگەل جالعا الىپ، بۇل جەردى تەگىن تابىس كوزىنە اينالدىرىپ وتىرعان جاندار دا تەگىن ادامدار ەمەستىگى بەلگىلى بولدى. ول فيرمانىڭ يەسى اناۋ-مىناۋ ەمەس، وبلىستاعى ۇلكەن الپاۋىتتاردىڭ ءبىرى، اتىنان ات ۇركەتىن ۆيكتور سولوجەنكوۆ دەگەننىڭ اندرەي دەگەن ۇلى كورىنەدى. اكەسى وبلىستى اشسا الاقانىندا، جۇمسا جۇدىرىعىندا ۇستايتىن اتاقتى «اراي» فيرماسىنىڭ قوجايىنى بولسا، كىمنەن ايىلىن جيسىن؟ ۆيكتور دەگەن كاسىپكەرىمىز وسىنداعى اتاعى جەر جاراتىن «يۆولگا حولدينگ» فيرماسىنىڭ قوجايىنى ۆاسيلي روزينوۆتەن كەيىنگى تۇكىرىگى جەرگە تۇسپەيتىن ەكىنشى مىقتى. ەندى مۇنداي وبلىستىڭ تۇتقاسىن ۇستاپ تۇرعان ازاماتتىڭ ايتقانىن قالاي ەكى ەتەرسىڭ. مۇنداي «دوستاردان» بيۋدجەتتىڭ قانداي دا قارجىسىن اياپ نە كورىنىپتى. جەلگە ۇشقان حالىقتىڭ قاراجاتىنان الگىندەي كاسىپكەرلەردىڭ كوڭىلى قىمبات.

شىركىن، مۇنداي «دوستارى» كوپ اكىمنىڭ نە ارمانى بار دەيسىڭ....

P.S. ايتپاقشى، ءبىزدىڭ وبلىس ورتالىعىندا كەيىنگى كەزدەرى قازاق ءتىلىن مازاق ەتەتىن «ايناLine»، «دالا Holl»، «ايدانا Plase» سەكىلدى قويىرتپاقتار تىم كوبەيىپ كەتتى. سوعان، مىنە، ەلباسىنا ارنالعان «سىيلىعىمىزدىڭ» اتىن «مەرەكە Love» دەپ اتاپ، ءماز بولىپ وتىرعان جايىمىز بار.

مۇراتبەك داۋرەنۇلى

قوستاناي

Abai.kz