اقتاۋ قالاسىندا توبانياز ءالنيازۇلىنىڭ ەسكەرتكىشى قورلاندى. ماڭعىستاۋ وبلىستىق ىشكى ىستەر دەپارتامەنتى ماڭىندا ورنالاسقان ەسكەرتكىشكە ۆاندالدار فاشيستىك تاڭبانى سالىپ، بەيپىل سوزدەردى جازىپ كەتكەن. بۇل تۋرالى Tengrinews.kz سايتى "لادا" پورتالىنا سىلتەمە جاساپ حابارلادى.

ۆاندالدار قىزعىلت سارى بوياۋمەن توبانياز ءالنيازۇلىنىڭ ەسكەرتكىشىنە سۆاستيكا تاڭباسىن سالىپ، بوقتىق سوزدەردى جازىپ كەتىپى. "كاسپي وپەرەيتينگ" جشس ديرەكتورى ءابدىراحىم قالىموۆتىڭ سوزىنە قاراعاندا، قالادا ەسكەرتكىشتەردى بوياۋ سياقتى ۆاندالدىق ارەكەتتەر جاسالۋى ءبىر بۇل ەمەس ەكەن، توبانياز ءالنيازۇلى، تاراس شەۆچەنكو جانە ماڭگىلىك الاۋ ەسكەرتكىشتەرى ءجيى قورلانىپ تۇراتىن كورىنەدى. ء"بىزدىڭ جۇمىسشىلارىمىز اپتاسىنا ءۇش رەت بارلىق ەسكەرتكىشتەردى تەكسەرىپ وتىرادى. سول كەزدە ىلعي ءبىر جازۋلاردى وشىرۋگە تۋرا كەلەدى. ءبىز ونىڭ ءبارىن ىستەيمىز. بىراق مۇنىمەن ماسەلە شەشىلمەيدى عوي. ءبىز قالانىڭ ىشكى ىستەر باسقارماسىنا بىرنەشە رەت ءوتىنىش جاساپ، بەينەباقىلاۋدى ورناتۋدى سۇراعانبىز. الايدا ءالى كۇنگە دەيىن ناتيجە جوق", - دەيدى قالىموۆ.  بۇل ماسقارالاۋدىڭ  كىمگە تيەسىلى ەكەنى ازىرگە انىقتالماعان. 

ايتا كەتەيىك، قر قىلمىستىق كودەكسىنە سايكەس، ۆانداليزم ءۇشىن 100-500 ايلىق ەسەپتىك كورسەتكىش كولەمىندە ايىپپۇل تولەۋ، 120-180 ساعاتقا دەيىنگى قوعامدىق جۇمىستار نەمەسە 1 جىلعا دەيىن باس بوستاندىعىنان ايىرۋ سياقتى جازا قولدانىلادى.

توبانياز ءالنيازۇلى - 1875, بۇرىنعى زاكاسپي وبلىسى ماڭعىشلاق ۋ. جەتەنەي بولىسىندا تۋعان قوعام قايراتكەرى. ءدىني مەكتەپتە باستاۋىش ءبىلىم العان. 1915 ج. بولىس باسقارۋشىسى بولىپ سايلانعان. 1916 ج. پاتشا جارلىعىنا قارسى شىققانى ءۇشىن تۇتقىنعا الىنىپ، 1917 ج. پاتشا وكىمەتى قۇلاعاننان كەيىن اباقتىدان بوساتىلدى. 1918 – 1923 ج. اداي ۋەزدىك رەۆوليۋتسيالىق كوميتەتىنىڭ توراعاسى. الاشوردا ۇكىمەتىنىڭ باتىس بولىمشەسىنىڭ جەتەكشىلەرى – حالەل جانە جاھانشا دوسمۇحامەدوۆتەرمەن تىعىز بايلانىستا بولعان.  كەڭەستىك بيلىككە قارسى قاراقۇم وڭىرىندە ءجۇرىپ جاتقان قوزعالىسقا قولداۋ تانىتتى. بيلىك ورىندارىنىڭ نۇسقاۋلارىندا جەرگىلىكتى حالىقتىڭ تۇرمىس-تىرشىلىگىندەگى، دىنىندەگى ەرەكشەلىكتەردىڭ ساقتالۋىن تالاپ ەتتى. 1923 ج. توبانيازعا “ۇلتشىل”، ء“دىندار” دەگەن ايىپ تاعىلدى. سوعان وراي ول ۋەزدىك رەۆوليۋتسيالىق كوميتەتىنىڭ توراعاسى قىزمەتىنەن بوساتىلدى. 1924 – 1928 ج. ۋەزدىك سالىق ينسپەكتورى بولىپ ەڭبەك ەتتى. 1929 ج. جەلتوقساندا تۇتقىنعا الىنىپ،  1930 جىلى الماتىدا اتىلدى. توبانياز 1990 ج. 26 ساۋىردە قازاق كسر-ى جوعارعى سوتىنىڭ شەشىمىمەن اقتالعان.

اباي-اقپارات