ۇلتتىق كاسىپكەرلەر پالاتاسىنىڭ (بۇدان ءارى - ۇكپ) پايىمداۋىنشا، جەكەشەلەندىرۋدىڭ نەگىزگى ماقساتى – قازاقستاندى الەمدەگى دامىعان 30 ەلدىڭ قاتارىنا قوسۋ. «جەكەشەلەندىرۋدىڭ ءوزى وسىناۋ اۋقىمدى ۇدەرىستەگى نەگىزگى ماقسات بولىپ تابىلمايدى. مەنىمشە، جەكەشەلەندىرۋدىڭ ماقساتى - ەلىمىزدىڭ ەكونوميكالىق ءوسىمىنىڭ ساپاسىن كوتەرىپ، قازاقستاننىڭ بارىنشا باسەكەگە قابىلەتتى بولىپ، الەمدەگى دامىعان 30 ەلدىڭ قاتارىنۋ كىرۋىنە جاعداي تۋعىزۋ»،-دەپ مالىمدەدى ۇلتتىق كاسىپكەرلەر پالاتاسى توراعاسىنىڭ ورىنباسارى جاننات ەرتىلەسوۆا 14 تامىزدا استانادا وتكەن بريفينگتە. ونىڭ ايتۋىنشا، «جەكەمەنشىك مۇلىك مەملەكەتتىك مۇلىكتەن جاقسى» دەگەن قاعيداتتى ءوزىمىز ۇمتىلىپ وتىرعان دامىعان ەلدەردىڭ تاجىريبەسى تولىق دالەلدەدى.

جاننات جۇرعاليقىزىنىڭ پىكىرىنشە، ەڭ وزەكتى ماسەلەنىڭ ءبىرى – وتاندىق ەكونوميكاداعا كۆازيمەملەكەتتىك سەكتوردىڭ ۇلەسى تۋرالى رەسمي مالىمەتتىڭ جوقتىعى. ۇكپ-نىڭ باعالاۋىنشا، قازاقستاننىڭ ءجىو-دەگى كۆازيمەملەكەتتىك سەكتوردىڭ ۇلەسى 40 پەن 60 پايىزدىڭ مولشەرىن قۇرايدى. «بۇل ماسەلەنى كوتەرىپ، ءبىز قۇزىرلى مينيسترلىككە بىرنەشە رەت حات جازدىق. وعان ءالى جاۋاپ جوق. جاڭادان قۇرىلعان ۇلتتىق ەكونوميكا مينيسترلىگى وسى ماسەلەدە ءبىزدى قولدايدى دەپ سەنەمىز»،- دەدى ول.

اتاپ ايتارلىعى، وتاندىق ساراپشى «جەكەشەلەندىرۋ بىزگە نە ءۇشىن قاجەت؟» دەگەن ساۋالعا: «جەكەشەلەندىرۋدىڭ تۇپكى ماقساتى – مەملەكەتتىڭ ەكونوميكاداعى ۇلەسىن ازايتۋ» دەپ ءارى ناقتى، ءارى تۇسىنىكتى جاۋاپ بەردى. ۇكپ قازىرگى كەزدە مەملەكەت ارالاسىپ وتىرعان ءۇش ءىرى سالانى انىقتاعان. «بىرىنشىدەن، بۇل اۋرۋحانا، مەكتەپ، كوممۋنالدىق مەكەمەلەر سياقتى مەملەكەتتىك كاسىپورىندار. ەكىنشىدەن، سوڭعى 10 جىلدا بارلىق مينيسترلىكتەر مەن اكىمدىكتەردىڭ جانىنان قۇرىلعان تولىپ جاتقان ءارتۇرلى جشس-لار مەن اق-لار. ولار ساراپتاما، كەڭەس بەرۋ سياقتى قىزمەت تۇرلەرىن كورسەتكەنىمەن، جەكەمەنشىك سەكتوردى تۇبەگەيلى ءولتىرىپ تىندى. ەڭ وكىنىشتىسى، ءبىز قانشاما رەت ايتساق تا، ولار جەكەشەلەندىرۋگە شىعارىلمايدى. ءۇشىنشى بولىك: ءبىزدىڭ ۇلتتىق حولدينگتەرىمىز، ياعني، ونەركاسىپتە جانە باسقا دا سالالاردا بيزنەسپەن اينالىساتىن اق-لار مەن جشس-لار»،- دەپ ءتۇسىندىردى ۇكپ توراعاسىنىڭ ورىنباسارى.

سونىمەن بىرگە، ول ۇكپ-نىڭ Yellow Pages قاعيداتىنا قاتىستى ەلىمىزدە ارنايى زاڭ قابىلداۋعا ۇسىنىس جاساعانىن، وسى ۇسىنىستى مەملەكەت باسشىسىنىڭ قولداعانىن ەرەكشە توقتالدى. ياعني، قازاقستان الەمدەگى دامىعان 30 ەلدىڭ قاتارىنا قوسىلامىن دەسە، وسى قاعيداتتى باسشىلىققا الۋى ءتيىس. ول قاعيدات – ەگەر دە ەكونوميكانىڭ قانداي دا ءبىر سالاسىندا جەكەمەنشىك كومپانيا بولاتىن بولسا، وندا ول جەرگە مەملەكەت ارالاسپاۋى كەرەك. – مۇنى انىقتاۋ ءۇشىن تاۋارلىق نارىقتارعا ساراپتاما جۇرگىزىلەدى. ويتكەنى، سونداي انىقتاما ارقىلى نارىقتىڭ كولەمىن، ونداعى كومپانيالاردىڭ ساپالى قىزمەت كورسەتىپ، سۇرانىستى قانشالىقتى وتەي الاتىنىن بىلۋگە بولادى. كوپتەگەن ەلدەردە، ءتىپتى كورشىمىز رەسەيدە وسىنداي ساراپتامانى جۋىردا تاراتىلىپ كەتكەن باسەكەلەستىكتى قورعاۋ اگەنتتىگى سياقتى مەكەمە جۇرگىزەدى. شەتەلدەردە مۇنداي ساراپتاما قوعامعا ءارى اشىق، ءارى قولجەتىمدى بولعانىمەن، قازاقستاندا ول قۇپيالانعان. سوندىقتان، ءبىز مەملەكەتتىك ورگاندارعا ۇكپ-مەن بىرلەسە وتىرىپ، وسى ساراپتامانى اشىق، جاريا تۇردە جاساۋعا ۇسىنىس بىلدىردىك. بىراق بۇرىنعى وڭىرلەردى دامىتۋ مينيسترلىگى دە، باسەكەلەستىك قورعاۋ اگەنتتىگى دە ءبىزدى قولداعان جوق. سوعان قاراماستان، ءبىز بۇل باعىتتاعى جۇمىستى جالعاستىرىپ جاتىرمىز. جانە جاڭادان قۇرىلعان مەملەكەتتىك ورگانداردىڭ ءبىزدى قولدايتىنىنا ۇمىتتەنەمىز،- دەدى ج. ەرتىلەسوۆا اتالعان بريفينگتە. 

ءامىرلان ءالىمجان

Abai.kz