تامىز ايىنىڭ العاشقى ونكۇندىگى وتىسىمەن-اق ەلىمىزدىڭ تۇكپىر-تۇكپىرىندە «مەكتەپكە جول» اكتسياسىنىڭ جۇرگىزىلۋىنە وراي جارمەڭكەلەر ءوز جۇمىستارىن باستاپ كەتتى.  بيىل ەلىمىزدە 300 مىڭعا جۋىق بالا ءبىرىنشى سىنىپقا بارادى. تەك الماتىنىڭ وزىندە 23500 ءبۇلدىرشىن العاش رەت مەكتەپ تابالدىرىعىن اتتايدى ەكەن.

وسى ورايدا مەكتەپ وقۋشىلارى كيەتىن كيىمنىڭ پوشىمىن، باعاسىن ءبىلۋ ماقساتىندا  گاگارين داڭعىلى، №294-ءۇيدىڭ الدىندا ورنالاسقان ساۋدا ورنىنا بارىپ كوردىك. «Angelcher» مەكتەپ وقۋشىلارىنىڭ كيىم ۇلگىلەرى قر مەملەكەتتىك ستاندارتتارىنا سايكەس كەلەدى» دەگەن جازۋلارى بار ءساندى پلاكات دۇڭگىرشىكتىڭ سىرتىنا ءىلىنىپتى. وقۋشىلار كيىمىندەگى «قازاقستاندا شىعارىلعان» دەيتىن جاپسىرما جازۋلار كوزىمىزگە وتتاي باسىلدى.
«ماگنۋم» دۇكەنىندە مەكتەپ وقۋشىلارىنا ارنالعان «Clasman»، «Altinlar»، «Marshal»، «Fashion»، «Koorman»، «Sano»، ت.ب. شەتەلدىك فيرمالاردىڭ كيىم-كەشەكتەرى، شۇلىقتارى، شاش تۇيرەۋىشتەرى، وقۋ قۇرالدارى تومەندەتىلگەن باعامەن اكتسيا بويىنشا ساتىلۋدا. ماسەلەن، 13 مىڭ تەڭگە تۇراتىن ەر بالالاردىڭ كوستيۋمدەرى 11 مىڭ تەڭگە شاماسىندا بولىپ شىعادى.
مەكتەپ فورماسىن «Abdi»، «زاڭ­عار»، «مەترو»، «الما»، «رامستور»، «مەگا»، ت.ب. ۇلكەن دۇكەندەردەن دە، كوشە بازارلارىنان دا ساتىپ الۋعا بولادى.
بۇگىنگى كۇنى ءاربىر اتا-انا بالاسىن مەكتەپكە دايىنداۋدىڭ قامىنا شۇعىل كىرىسۋدە.  ياعني كيىم-كەشەك، اياقكيىم، سومكە، مەكتەپكە قاجەتتى قۇرال-جابدىقتارى، ت.ب. كەرەك-جاراعىن ساتىپ الۋلارى قاجەت. ايتەۋىر، قاتاردان كەم قىلمايىن دەپ اۋرەلەنگەندىكتەن مۇمكىندىگىنشە بالاسىنا ءتاۋىر كيىم اپەرۋگە تىرىسادى. وسىندايدا «وقۋ وشاقتارىندا بىرىڭعاي مەكتەپ فورماسىنىڭ بولعانى قاجەت» دەۋشىلەر مەن «بالانى جىبەرە سالۋعا بولادى» دەيتىن اتا-انالار دا تابىلاتىنى انىق. ءبىرى «الەۋمەتتىك جاعدايى تومەن وتباسىلاردىڭ بالالارىنا قيىن تۇسپەس ءۇشىن بىركەلكى فورما كيدىرۋ كەرەك» دەگەندى العا تارتسا، ەكىنشى جاق، بالانىڭ تالعامىن شەكتەمەۋدى قۇپتايدى.
قوعامداعى وسىنداي ەكىۇداي پىكىردىڭ ورىن الۋىنا قاراماستان، قازىر مەكتەپتەردە لاجى بولعانىنشا بىرىڭعاي كيىمدەردى كيۋ ءۇردىس العان. بىراق سول بىرىڭعاي كيىمدەردىڭ ءوزى ءار مەكتەپتە ءارتۇرلى. مىسالى، كەيبىر مەكتەپتىڭ شاكىرتتەرى بۇرىننان قالىپتاسقان اق فارتۋك پەن قارا كويلەك كيسە، ەندى ءبىرى وزدەرىنە لايىقتالىپ تىكتىرىلگەن بىرىڭعاي كيىمدەرىمەن بىردەن كوزگە تۇسەدى.
سونىمەن، ءبىر بالانى مەكتەپكە دايىنداۋ ءۇشىن ورتا ەسەپپەن 40-45 مىڭ تەڭگە جۇمسالادى ەكەن. ال ءبىر ۇيدەن بىرنەشە بالا مەكتەپكە باراتىن بولسا، اتا-انانىڭ قالتاسىن جۇقارتاتىنى انىق. كيىمنەن باسقا وقۋشىلار ءۇشىن قانشاما سۋرەت سالۋعا ارنالعان البومدار، توركوز، كەڭ جول، قالىڭ داپتەرلەر، سىزعىش، جەلىم، قالامساپتار، ساناعىش-ەسەپشوتتار، بوياۋ قارىنداشتار، پلاس­تيليندەر، ەڭبەك ساباعىنا ارنالعان ءتۇرلى-ءتۇستى قاعازدار، ياعني تولىپ جاتقان ۇساق-تۇيەك بولسا دا اسا قاجەتتى وقۋ قۇرالدارىن الۋ، اسىرەسە اۋىلدىق جەردەگى اتا-انالاردىڭ قارجىسىن ورتايتاتىنى ءسوزسىز. راس، كەيبىر جەرلەردە اكىمدىكتەر، فيرمالار، دەمەۋشىلىك جاساۋعا ىقىلاستى ازاماتتار  الەۋمەتتىك جاعىنان از قامتىلعان وتباسىلارىنا اقشالاي نەمەسە زاتتاي كومەك بەرىپ تە جاتادى.
وسى ورايدا قالا دۇكەندەرىن جاۋلاپ العان شەتەلدىك ونىمدەردىڭ ورنىنا وتاندىق تاۋارلار كوپتەپ جاسالسا دەگەن تىلەگىمىز بار. مەكتەپ جاسىنداعى 3 ميلليونعا جۋىق وقۋشىنى بىرىڭ­عاي كيىممەن قامتاماسىز ەتۋگە ەل ەكونوميكاسىنىڭ قاراجاتى  تولىق جەتەدى دەگەن ويدامىز. قازاق حالقى ءاۋ باستان قولونەرىنە، ىسمەرلىككە جاقىن ەمەس پە ەدى؟! ولاي بولسا مەكتەپ وقۋشىلارىنا ارنالعان كيىم ۇلگىلەرىن قولجەتىمدى باعامەن نەگە شىعارماسقا؟! وسىنداي يگىلىكتى ءىس تاياۋ ارادا جولعا قويىلار ما ەكەن؟

نۇرلان قۇمار

"انا ءتىلى" گازەتى