ۇكىمەت مۇشەلەرى الدىندا ءسوز سويلەگەن پرەزيدەنت نازارباەۆ ەڭ اۋەلى سىرتتاعى قانداستارىمىزدى ەلگە شاقىرعان 22 جىل بۇرىنعى ءسوزىن تاعى ءبىر جاڭعىرتتى. بۇل تۋرالى ەلباسى ءسوزى بىردەن اقپارات كەڭىستىگىن كەزىپ كەتتى. ء«بىز ورالمانداردىڭ جاعدايىن جاساۋىمىز كەرەك. ال ىشكى كوشى-قون ماسەلەسى تۋرالى بۇرىن دا ايتىلعان. ادامداردى جۇمىس ورىندارى بار جەرلەرگە قاراي جىبەرۋ قاجەت. وڭتۇستىك وڭىرلەردە جۇمىس ورىندارى از، سوندىقتان ادامدار بۇل جاعدايدى دۇرىس تۇسىنۋلەرى ءتيىس. قۇدايعا شۇكىر، قازاقستان كەڭ-بايتاق. جۇمىس ورىندارى اشىلۋدا، اسىرەسە جاستار ءبىر جەردە وتىرا بەرمەي، ءار جەرگە بارىپ، جۇمىس ىستەپ، ەلىمىزدىڭ بولاشاعىن بىرگە جاساۋى كەرەك»، – دەدى ن. نازارباەۆ. وتىرىس بارىسىندا ءسوز سويلەگەن دۇيسەنوۆا حانىمنىڭ ايتۋى ويىنشا بيىلعى جىلى ەلگە قانداستارىمىزدان 13 مىڭ وتباسى ورالىپ، قازاقستان حالىق سانىن 35 مىڭ ادامعا ۇلعايتقان. الداعى قىركۇيەك ايىندا ورالماندارعا قاتىستى جاڭا زاڭ قابىلداناتىن بولادى.

ۇكىمەت وتىرىسى بارىسىندا ۇكىمەتتە جاڭارتۋلار بولاتىنى ايتىلدى. ەلباسىنىڭ سوزىنە ساي ەندى ۇكىمەت 12 مينيسترلىك پەن وتىزعا تارتا كوميتەتتەن تۇراتىن بولادى. بۇگىندە 17 مينيسترلىك، 9 اگەنتتىك، 54 كوميتەت، 272 دەپارتامەنت بار. ياعني 12 مينيسترلىك، 30 كوميتەت قالادى، ال بارلىق 9 اگەنتتىك جويىلىپ، كوميتەت تۇرىندە مينيسترلىك قاراماعىنا كىرەدى.  بۇل تۋرالى پرەزيدەنت: «ۇكىمەتپەن پارلامەنتپەن اقىلداسا كەلە، مىناداي شەشىم قابىلدادىم: جاڭا بەس مينيسترلىك قۇرىلادى. ونىڭ ىشىندە ۇلتتىق ەكونوميكا مينيسترلىگى قۇرىلماق. وعان بۇگىنگى ەكونوميكا مينيسترلىگىنىڭ وكىلەتتىگى، بيۋدجەتتىك جوسپارلاۋ مەن وڭىرلىك دامۋ قىزمەتتەرى بەرىلەدى. ستاتيستيكا جونىندەگى اگەنتتىك پەن تابيعي مونوپوليالاردى رەتتەۋ اگەنتتىكتەرى، تۇتىنۋشىلار قۇقىعىن قورعاۋ، باسەكەلەستىكتى دامىتۋ اگەنتتىكتەرى دە وسىعان كىرەدى. پرەمەر-ءمينيستردىڭ ۇسىنۋىمەن بۇل لاۋازىمعا ەربولات دوساەۆتى تاعايىندايمىن»- دەپ مالىمدەگەن. مەملەكەت باسشىسىنىڭ اتاپ وتۋىنشە، يندۋستريا جانە جاڭا تەحنولوگيالار كولىك جانە كوممۋنيكاتسيا مينيسترلىكتەرىنىڭ، بايلانىس جانە اقپارات، ۇلتتىق عارىش اگەنتتىكتەرىمەن وكىلەتتىلىكتەرى بەرىلە وتىرىپ، ينۆەستيتسيا جانە دامۋ جونىندەگى مينيسترلىك قۇرىلدى. اتالعان ۆەدومستۆوعا اسەت يسەكەشەۆ باسشىلىق جاسايتىن بولادى. ەلباسى بۇعان دەيىن كولىك جانە كوممۋنيكاتسيا ءمينيسترى بولعان جەڭىس قاسىمبەك اتالعان مينيسترلىكتىڭ ءبىرىنشى ورىنباسارى قىزمەتىنە تاعايىندالعانىن اتاپ ءوتتى. ال بۇعان دەيىن بايلانىس جانە اقپارات اگەنتتىگىنىڭ باسشىسى بولعان اسقار جۇماعاليەۆ اسەت يسەكەشەۆتىڭ ورىنباسارى قىزمەتىنە كىرىسەدى. سونىمەن قاتار ەنەرگەتيكا مينيسترلىگى قۇرىلىپ، وعان ۆلاديمير شكولنيك باسشىلىق جاسايتىن بولدى. بۇعان دەيىن مۇناي جانە گاز ءمينيسترى بولعان ۇزاقباي قارابالين جاڭا ءمينيستردىڭ ءبىرىنشى ورىنباسارى بولىپ تاعايىندالدى.

سونداي-اق توتەنشە جاعدايلار مينيسترلىگىنىڭ وكىلەتتىلىگى ءىىم-نە بەرىلەدى. مينيسترلىكتى ق. قاسىموۆ باسقارادى، ال ونىڭ ورىنباسارى ۆ. بوجكو بولادى. مەملەكەتتىك قىزمەت ىستەرى جانە جەمقورلىققا قارسى ءىس-قيمىل اگەنتتىگىن ق. قوجامجاروۆ باسقارادى. ۆەدومستۆونىڭ مالىمەتىنشە، قارجى پوليتسياسى وكىلەتتىلىگى مەملەكەتتىك قىزمەت ىستەرى جانە جەمقورلىققا قارسى ءىس-قيمىل اگەنتتىگىنە بەرىلەدى. ال ەكونوميكالىق جانە قارجىلىق قۇقىقبۇزۋشىلىق ماسەلەلەرى قارجى مينيسترلىگىنە بەرىلەدى. مادەنيەت جانە سپورت مينيسترلىگىن ا. مۇحامەديۇلى باسقارادى. سونىمەن قاتار، ن. نازارباەۆ وڭىرلىك دامۋ ءمينيسترى بولعان بولات جامىشەۆتىڭ قازاقستاننىڭ دامۋ بانكىنە تاعايىندالاتىنىن اتاپ ءوتتى.

اقوردا ءباسپاسوز قىزمەتىنىڭ حابارلاۋىنشا بۇنداي وزگەرىستەر قاجەتتىلىكتەن تۋىپ وتىر. ەلباسىنىڭ تاپسىرماسى بويىنشا  جاڭا قىزمەتىنە ءبىر توقسان تولعان پرەمەر-مينيستر ءماسىموۆ ەلدىڭ تۇتاس اۋماعىن ارالاپ شىققان. ول ءتۇرلى اكىمدەرمەن كەزدەسىپ، جاڭا باعدارلامالار جاساۋ قاجەتتىگىن تۇسىنگەن. بۇنىڭ ءبارى الماعايىپ زاماندا ۇلتتىق قاۋىپسىزدىكتى ساقتاۋ مەن ەكونوميكانى وركەندەتۋدىڭ شارالارى بولىپ تابىلادى. اتالمىش جيىندا پرەزيدەنت تۇراقتىلىق پەن بەيبىتشىلىكتىڭ ماڭىزدىلىعىن باسا ايتىپ: «بىرلىكسىز جۇرتتىڭ جاعدايىن ءبىز باسقالاردان كورىپ وتىرمىز. تۇراقتىلىقتىڭ ءمانى مەن ماڭىزىن ۋكراينانىڭ قازىرگى احۋالىنان بايقاۋعا ابدەن بولادى»، – دەدى. ۇكىمەتتىڭ جاڭا قۇرامىنا ساتتىلىك تىلەگەن ەلباسى «ەل ىشىنەن جاۋ ىزدەپ، ءبىرىن-ءبىرى كەمسىتۋ ەشقاشان دا ەشبىر مەملەكەتتى جاقسىلىققا اپارمايتىنىن» دا ەسكەرتە كەتتى.

نۇرعالي نۇرتاي

Qamshy.kz