قازاقستاننىڭ باس پروكۋراتۋراسى دەۆالۆاتسيا تۋرالى قاۋەسەت تاراتۋدىڭ جاۋاپكەرشىلىگى تۋرالى ەسكەرتەدى. بۇل تۋرالى Tengrinews.kz باس پروكۋراتۋرانىڭ مىنا مالىمدەمەسىنە سۇيەنىپ حابارلادى: "سوڭعى كۇندەرى ءارتۇرلى بايلانىس قۇرالدارى (باق، الەۋمەتتىك جەلىلەردى، سمس-ءتى قوسا العانداعى ينتەرنەت-حابارلار) ارقىلى جاقىندا ۇلتتىق ۆاليۋتانىڭ قۇنسىزدانۋ مۇمكىندىگى تۋرالى رەسمي راستالماعان اقپارات تاراتىلا باستادى. اتالعان حابارلار حالىق اراسىندا ايتارلىقتاي شۋ شىعارىپ، ىشكى ۆاليۋتا نارىعىنداعى جاعدايدىڭ تۇراقسىزدانۋ قاۋپىن تۋعىزدى. قازاقستان رەسپۋبليكاسىنىڭ باس پروكۋراتۋراسى 2014 جىلعى 23 ساۋىردە ەلىمىزدىڭ قىلمىستىق كودەكسىنە كورىنەۋ جالعان اقپارات تاراتقانى ءۇشىن جاۋاپكەرشىلىك بەلگىلەيتىن نورما (242-1 باپ) ەنگىزىلگەنىن ەسكە سالادى. وسىعان بايلانىستى ۋاكىلەتتى مەملەكەتتىك ورگانداردىڭ رەسمي دەرەكتەرىنە نەگىزدەلمەگەن تەڭگە باعامىن تۇزەتۋ تۋرالى اقپاراتتىڭ ودان ءارى تاراتىلۋىنا جول بەرمەۋ تۋرالى رەسمي تۇردە ەسكەرتەمىز. سونداي-اق باق وكىلدەرىنەن قاراستىرىلىپ وتىرعان ماسەلەنى حابارلاۋ كەزىندە تەكسەرىلگەن فاكتىلەر مەن مالىمەتتەرگە عانا سۇيەنۋلەرىن جانە شىندىققا جاناسپايتىن اقپاراتتىڭ جاريالانۋىنا جول بەرمەۋلەرىن سۇرايمىز".

ەستەرىڭىزگە سالساق 31 شىلدەدە ەل اۋماعىن اقشانىڭ قۇنسىزدانۋى تۋرالى قاۋەسەت شارلاپ كەتتى. اتاپ ايتساق استانانىڭ ايىرباس پۋنكتتەرىندە ۇزىن-سونار كەزەك پايدا بولدى، كەيبىر پۋنكتتەردە دوللار تاۋسىلىپ قالدى. قر ۇلتتىق بانكى 1 تامىز كۇنى دەۆالۆاتسيانىڭ ەكىنشى تولقىنى تۋرالى قاۋەسەتتەردى جوققا شىعاردى. ۇلتتىق بانك قاۋەسەت تاراتۋشىلار ۇستىنەن شاعىمداناتىن بولسا، جاڭا قىلمىستىق كودەكس بويىنشا جالعان داقپىرت جاساۋشىلار 12 جىلعا دەيىن باس بوستاندىعىنان ايىرىلادى.

اباي-اقپارات