تۇركيانىڭ بۇرىنعى پرەزيدەنتى كەنان ەۆرەن ءومىر بويىنا باس بوستاندىعىنان ايىرىلدى، - دەپ حابارلايدى Tengrinews.kz. 96 جاستاعى ساياساتكەر بيلىككە قارسى قىلمىستارى ءۇشىن كىنالى دەپ تانىلعان. كەنان ەۆرەن  1980 جىلدىڭ 12 قىركۇيەگىندە مەملەكەتتىك توڭكەرىستى ۇيىمداستىرۋشى سانالادى. ول كەزدە ەۆرەن ارميانىڭ باس شتابىنىڭ باستىعى بولعان. وسى وقيعالاردان سوڭ ول جاڭا اكىمشىلىكتىڭ باسشىسى، كەيىن پرەزيدەنت بولىپ سايلاندى. ول بيلىككە كەلە سالا جاپپاي قۋعىن-سۇرگىن جاساعان. رەسمي مالىمەت بويىنشا ەۆرەننىڭ باستاماسىمەن 178 مىڭ ادام تۇتقىنعا الىنعان، 64 مىڭ ادام تۇرمەدە وتىردى، 30 مىڭ ادام ازاماتتىعىنان ايىرىلدى، 50 ادام ءولىم جازاسىنا كەسىلىپ، تاعى 450-ءى ازاپتاۋدان ءولدى.

بۇرىنعى پرەزيدەنتپەن بىرگە ونىڭ ۇزەڭگىلەس سەرىگى - 89 جاستاعى وتستاۆكاداعى گەنەرال تاحسين شاحينكايا دا سوتتالعان. ول بۇرىن ەلدىڭ اسكەري اۋە كۇشتەرىنە قولباسشىلىق ەتكەن. مەملەكەتتىك توڭكەرىس قاتىسۋشىلارى 2012 جىلدان باستاپ جاۋاپكەرشىلىككە تارتىلدى. سوت پروتسەسى كەزىندە ەكس-پرەزيدەنت پەن سەرىگى دە دەنساۋلىعىنا بايلانىستى كەلە المادى. سوت ۇكىمى ايتىلعان سوڭ بيلىك پارتياسى وكىلدەرى سول توڭكەرىستىڭ باسقا دا كوزى ءتىرى قاتىسۋشىلارىن قاتاڭ جازا كۇتىپ تۇرعانىن مالىمدەدى. ال كەزىندە "ىستەۋگە ءتيىس نارسەنى عانا ىستەدىم" دەپ مالىمدەگەن ەۆرەن ءوز ارەكەتىنە وكىنىش بىلدىرمەپتى.

اباي-اقپارات