اباي اتىنداعى قازاق مەملەكەتتىك وپەرا جانە بالەت تەاترى حورىنىڭ ارتىستەرى «اباي» وپەراسىنىڭ جاڭارتىلعان قويىلىمى قارساڭىندا، «الماتى-1» تەمىرجول ۆوزكالىندا، «ايتتىم سالەم، قالامقاس» ايگىلى ارياسىن ورىنداپ، شىنايى تەاترلاندىرىلعان كورىنىستى ۇسىندى.

اكتسياعا ءاليا تەمىربەكوۆانىڭ باسشىلىعىنداعى اباي اتىنداعى ماوبت حورى، تەنور - ماقسات ماقۇلبەكوۆ پەن اكتريسا –ايسۇلۋ ازىمباەۆا قاتىستى. تاڭدانعان پوەزد جولاۋشىلارى مەن تەمىرجول قىزمەتكەرلەرى ناعىز ماحاببات سيۋجەتىندەگى شىنايى وپەرالىق قويىلىمنىڭ كورەرمەنى بولدى.

اكتسيانىڭ سيۋجەتى بويىنشا ماقسات ۆوكزال پەررونىندا ءرولىن ايسۇلۋ سومداعان ءوزىنىڭ عاشىعىن ساپارعا شىعارىپ سالۋى كەرەك بولاتىن. الايدا، كۋپەنىڭ تەرەزەسىنەن ءوز عاشىعىنا قاراعان ماقسات قوشتاسقىسى كەلمەي، «اباي» وپەراسىنان «ايتتىم سالەم، قالامقاس» ارياسىن ورىنداي باستادى. كورىنىستىڭ سوڭىنا دەيىن جولاۋشىلار، تەمىرجول قىزمەتكەرلەرىن سومداعان تەاتر حورىنىڭ قىزمەتكەرلەرى جاس جىگىتتى قولداپ، بىرگە ءان شىرقادى. اريانىڭ ورىندالۋى دا جاس قىزعا قاتتى اسەرىن بەرىپ، ايسۇلۋ ءوز عاشىعىن تاستاپ كەتە المادى. كورىنىستىڭ سوڭى، تاعى دا سول قۇدىرەتتى مۋزىكانىڭ ارقاسىندا ەكى عاشىقتىڭ قوسىلۋىمەن اياقتالدى.

قازكوممەرتسبانكتىڭ قاتىسۋىمەن اباي اتىنداعى ماوبت-تىڭ 80 جىلدىق مەرەيتويىنا وراي، ونداعان جىلدار بويى تەاتردىڭ شىمىلدىعىن اشىپ، رەپەرتۋارىنىڭ ەڭ نەگىزگى قويىلىمى بولىپ تابىلاتىن «اباي» وپەراسىنىڭ جاڭارتىلعان نۇسقاسى قويىلاتىن بولادى. مۇحتار اۋەزوۆتىڭ ليبرەتتوسىنا جازىلعان احمەت جۇبانوۆ پەن لاتيف حاميدي بىرلەسىپ جازعان وپەرا العاش رەت اباي اتىنداعى ماوبت-دا 1944 جىلعى 24-ءشى جەلتوقسانىندا قويىلدى. 1958 جىلى قويىلىم جاڭارتىلعان بولاتىن، مىنە، سودان بەرى وپەراعا ايتارلىقتاي وزگەرىس ەنگەن ەمەس.

ءماتىن "جاس قازاق" گازەتىنەن الىندى.