قازاق كەڭەستىك ادەبيەتىندە وزىندىك ورنى بار اقىن، جازۋشى، دراماتۋرگ، كوسەمسوزشى ساكەن سەيفۋلليننىڭ ءومىر جولى مەن شىعارماشىلىق قۇپيا الەمىن ءار قىرىنان الىپ، زەرتتەپ-زەردەلەۋشىلەر بارشىلىق. ءتىپتى ساكەن شىعارمالارىن تالداپ، ارنايى مونوگرافيالار جازعان ە. ىسمايلوۆ، س. قيراباەۆ، ت. كاكىشەۆتەردىڭ ەڭبەگى ەرەكشە اتاپ وتۋگە تۇرارلىق.

داۋىلپاز جىرشى، كەڭەستىك كەزەڭدەگى قىزىل سۇڭقار اتانعان اقىن بەينەسى قازاق دراماتۋرگياسىندا دا بىرنەشە رەت سومدالعان. ايتالىق، س. مۇقانوۆتىڭ دراماسى ءوز كەزىندە ساحنالانىپ، ەرەكشە اتالدى دا.

ال، ەندى جاڭا داۋىردە س. سەيفۋللينگە باسقاشا كوزقاراسپەن قاراپ، ونىڭ قۇپيا-سىرلارىن وزگەشە ادىسپەن جەتكىزۋگە تالپىنعان تۋىندى – “ساكەننىڭ سوڭعى ساپارى” (اۆتورى – بەلگىلى دراماتۋرگ جولتاي ءالماشۇلى) دەپ اتالادى.

تاياۋدا قاراعاندىداعى س. سەيفۋللين اتىنداعى دراما-سازدى تەاترى وسى پەسانى ساحنالادى. (رەجيسسەرى – دۋناي ەسپاەۆ.) 1930 جىلدارى قاراعاندى وبكومىنىڭ ەكىنشى حاتشىسى بولعان ۇلتجاندى ازامات س. ساپاربەكوۆ پەن س. سەيفۋللين اراسىنداعى تارتىستى اڭگىمەگە قۇرالعان بۇل درامادا كىسىنىڭ جان دۇنيەسىنە بارىنشا بويلاپ، ىشكى يىرىمدەرىن تەرەڭىنەن اشۋعا تىرىسقان. 1936 جىلدىڭ اياعىنا قاراي قاراعاندىعا ساكەن اقىن كەلەدى، بىراق وبكومنىڭ ءى-حاتشىسى ونى قابىلداۋدان باس تارتادى. سوعان قاراماستان س. ساپاربەكوۆ ونىمەن كەزدەسىپ، ۇزاق اڭگىمەلەسىپ، وي بولىسەدى، اقىننىڭ ىشكى جان قينالىسىن تىڭداپ، رۋحاني كۇش بەرەدى. درامانىڭ ەڭ ۇلكەن جاڭالىعى – وندا ساكەننىڭ شىن بەينەسىن اشۋ ءۇشىن ءوزىنىڭ اينالاسىنداعى ادامدار ارقىلى ءسوز ساباقتالىپ وتىرادى، سىرت كوز ارقىلى اقىندىق-ازاماتتىق باعاسى بەرىلەدى.

– بۇل جاڭاشا ادىسپەن جازىلعان بارىنشا تىڭ درامالىق تۋىندى ەكەن، – دەدى سپەكتاكلگە قاتىسقان بەلگىلى ادەبيەت جانە تەاتر سىنشىسى قۇلبەك ەرگوبەك. – ماعان پەساداعى جاناما كەيىپكەرلەر تاسجان مەن ۇلانبەك وتە قاتتى اسەر قالدىرادى. بۇل تۇرعىدا قويۋشى-رەجيسسەر د. ەسپاەۆ ءىنىمىزدىڭ دە ىزدەنىسى ەرەكشە بايقالادى.

وسىنداي ويدى پارلامەنت ءماجىلىسىنىڭ دەپۋتاتى، جازۋشى ا. سمايىل دا قوستاپ سويلەدى. ايتا كەتۋ كەرەك، قازاقستاننىڭ ەڭبەك سىڭىرگەن قايراتكەرى، دراماتۋرگ جولتاي ءالماشۇلى جۇمات بۇعان دەيىن 20-عا تارتا درامالىق شىعارمالار جازعان. كوپتەگەن شىعارمالارى رەسپۋبليكانىڭ دراما تەاترلارىندا سوڭعى 10-15 جىلدان بەرى ۇزدىكسىز قويىلىپ كەلەدى. درامالىق شىعارمالاردىڭ رەسپۋبليكالىق جابىق بايقاۋلارىنىڭ ءۇش دۇركىن جەڭىمپازى.

سپەكتاكل انشلاگپەن ءوتتى. حالىق وتە كوپ جينالدى.

ەندى تەاتر ۇجىمى وسى قويىلىمدى باسقا دا وبلىستارعا الىپ شىعىپ، كورەرمەندەرگە رۋحاني ءلاززات سىيلاۋدى جوسپارلاپ وتىر.

اينۇر نايمانباي،

مادەنيەتتانۋشى.

اباي.kz