«قازاقستان تۇرعىن ءۇي قۇرىلىس جيناق بانكىنىڭ» ءباسپاسوز قىزمەتى ۇلتتىق كاسىپكەرلەر پالاتاسىنىڭ قۇرىلىس جانە قۇرىلىس ونىمدەرى مەن تۇرعىن ءۇي-شارۋاشىلىق كوميتەتىنىڭ توراعاسى الەكساندر بەلوۆيچتىڭ ايتقان سوزدەرىن جوققا شىعاراتىن مالىمدەمە تاراتىپ وتىر.

جاقىندا الەكساندر بەلوۆيچ «قازاقستان تۇرعىن ءۇي قۇرىلىس جيناق بانكىندە» 425 مىڭ ادام كەزەكتە تۇر. مەنىڭ ويىمشا بۇل ادامداردىڭ بارلىعىن باسپانامەن قامتاماسى ز ەتۋ مۇمكىن ەمەس. بولعان كۇننىڭ وزىندە وعان 13-14 جىل ۋاقىت كەتەدى» دەگەن بولاتىن. وسىندا كەلتىرلىگەن ايعاققا بايلانىستى قتقجب ءباسپاسوز قىزمەتى بانكتىڭ ءوز ءۋاجىن ورتاعا سالادى. « 425 مىڭ ادامنىڭ بانكپەن شارت جاساسقانى راس. بىراق، بۇل ەلىمىزدە وسىنشا ادامنىڭ باسپانا كەزەگىندە تۇرعاندىعىن بىلدىرمەيدى. كەلتىرىلگەن سانايعاقتىڭ تەك 35 پايىزى عانا «قول جەتىمدى باسپانا-2020» باعدارلاماسىنا قاتىسۋعا نيەت بىلدىرە الادى جانە نارىقتاعى باسپانا باعاسىنان تومەنگى مولشەردە تۇرىعىن ءۇي ساتىپ الۋعا قول جەتكىزەدى» دەلىنگەن ءباسپاسوز حابارلاماسىندا.

ياعني، بانك «قول جەتىمدى باسپانا» باعدارلاماسىنىڭ باس وپەراتورى رەتىندە ءوز سالىمشىلارىنا ارزان باعاداعى ءۇيدى ۇسىنىپ وتىر. بۇل تەك مەملەكەتتىك باعدارلاماعا قاتىسۋشى ازاماتتارعا ارنالعان جۇيە. جوعارىدا ايتىلعان 35 پايىز ادامداردىڭ ۇلەسى وسى باعدارلامانى قامتيدى.

بۇدان بولەك، «قازاقستان تۇرعىن ءۇي قۇرىلىس جيناق بانكىنىڭ» نەگىزگى ۇستانىمىنا سايكەس، بارلىق  الەۋمەتتىك ساناتتاعى ادامدار ءۇشىن قولايلى باستامالار جۇزەگە اسىرىلۋدا. ماسەلەن، تابىسى ورتا جانە ورتادان تومەن قىزمەتكەرلەر ءۇشىن تۇرعىن ءۇي ساتىپ الۋعا ارنالعان نەسيەلەر بار. دەمەك، بانكتىڭ قىزمەتى تەك تۇرعىن ءۇي نارىعىنداعى مەملەكەتتىك باعدارلاماعا قاتىسۋمەن عانا شەكتەلمەيدى. بۇگىنگى كۇنى بەلوۆيچ مىرزا كەلتىرگەن دەرەكتەگى ادامداردىڭ 65 پايىزى بانكتىڭ تابىسى ورتا جانە ورتادان تومەن قىزمەتكەرلەر ءۇشىن تۇرعىن ءۇي ساتىپ الۋعا ارنالعان نەسيەلەرىنە ءۇمىت ارتىپ وتىر دەگەن ءسوز.

سونداي-اق، الەكساندر بەلوۆيچتىڭ «قول جەتىمدى باسپانا» باعدارلاماسى بويىنشا سالىنىپ جاتقان تۇرعىن ۇيلەردەگى «قازاقستان تۇرعىن ءۇي قۇرىلىس جيناق بانكىنىڭ» ۇلەسى جىلىنا 150 – 200 مىڭ شارشى مەتردى عانا قۇرايدى» دەگەن ءسوزى دە شىندىققا سايكەسپەيدى ەكەن.  ول تۋرالى ءباسپاسوز قىزمەتى بىلاي تۇسىنىكتەمە بەرەدى: بۇگىنگە دەيىن بانك جەلىسى بويىنشا قارجىلاندىرىلعان تۇرعىن ءۇيدىڭ اۋماعى جىل سايىن 500 مىڭ شارشى مەتردەن اسىپ وتىر. باسپانا باعاسىنىڭ شارشى مەترگە شاققانداعى قۇنى: ايماقتاردا 90 مىڭ تەڭگەدەن اسپاسا، استانا مەن الماتى قالاسى ءۇشىن 142 مىڭ تەڭگەنى قۇرايدى. ال، «قول جەتىمدى باسپانا-2020» باعدارلاماسى شەڭبەرىندە 6 ملن. شارشى مەتىر تۇرىعىن ءۇي سالۋ كوزدەلگەن.

تاعى ءبىر ايتا كەتەرلىگى، «قازاقستان تۇرعىن ءۇي قۇرىلىس جيناق بانكى» الەۋمەتتىڭ تولەم قابىلەتىن ەسكەرە وتىرىپ، تۇرعىن ءۇي قۇرىلىسىن تومەنگى باعاعا جۇرگىزەتىن قۇرىلىس كومپانيايلارىمەن ارىپتەستىك ورناتقان.» بۇگىنگە دەيىن 43 قۇرلىس كومپانياسى ويداعىداي جۇمىس جاساپ، تاپسىرىستى ۋاقتىندا ورىنداۋدا» دەلىنگەن ءباسپاسوز قىزمەتىنىڭ مالىمەتىندە.

ال، بانك تاراپىنان ەليتالىق ۇيلەر سالىپ جۇرگەن قۋاتتى كومپانيالدارعا تاپسىرىس بەرىلمەيدى ەكەن. ماسەلەن، «بازيس-ا» سياقتى الپاۋىتتاردىڭ قۇرىلىس جۇرگىزۋدەگى قۇنىن تابىسى ورتا جانە ورتادان تومەن قىزمەتكەرلەر وتەي الماسى انىق. ادەتتە، مۇنداي كومپانيالار سالعان تۇرعىن ۇيلەردىڭ ءار شارشى مەترىنىڭ باعاسى 2-3 مىڭ اقش دوللارىنان كەم بولمايتىنى اقيقات.

دەمەك،  الەكساندر بەلوۆيچتىڭ مالىمدەمەسىنىڭ استارىندا وسىنداي بيزنەس-سىنىپتاعى ۇيلەردى سالۋعا نيەتتى جانە ونى قىمبات باعاعا ساتۋعا ىنتالى ەليتالىق كومپانيالاردىڭ قوجايىندارىنىڭ مۇددەسى جاتۋى دا عاجاپ ەمەس...

اباي.kz