«قازاقستان تەمىر جولى» اق باسشىلىعى قايدا قاراپ وتىر؟

ءبىز، ارقالىق  دەگەن  شاعىن  قالانىڭ  تۇرعىنى  بولامىز.  شاعىن قالا بولعان سوڭ، وبلىس ورتالىعىنان  جىراق جاتقان  قالاعا   وڭتۇستىك  وڭىرلەردەن  قاتىناۋ دا  قيىنعا سوعىپ ءجۇر. اسىرەسە، تەمىر جول قاتىناسى ارقىلى. ارقالىقتان  «قازاقستان  تەمىر جولى»  اق قاراستى  ەكى  باعىتتاعى (ارقالىق – استانا، ارقالىق – قوستاناي)  پويىزى  جۇرەدى. قازاقستاننىڭ  وڭتۇستىك  استاناسى – الماتى شاھارىنا  ارقالىقتان تىركەمەلى  ەكى ۆاگون  قاتىنايدى. بۇل تەك جۇپ كۇندەرى جۇرەدى. ارقالىقتان  كەشكى  20:05  № 603 تسگ «ارقالىق-استانا»  باعىتىمەن  №19, 20 ۆاگوندار  ەسىل ستانتسياسىنا  تۇنگى  00:00 دە  كەلىپ، تاڭعى ساع – 09:20 دا  №044 تسگ « قوستاناي – الماتى»  باعىتىمەن  الماتى  قالاسىنا كەلەسى كۇنى ساعات – 13:39  كەلەدى. ەسىل  ستانتسياسىندا  اتالعان  ەكى ۆاگون  9 ساعات  توقتاپ تۇرادى. قىستا ايازعا «قاقتالىپ»، جازدا شىبىن، شىركەي، ماسالارعا تالانىپ جولاۋشى بايقۇس جولدىڭ ازابىن تارتۋداي-اق تارتادى.  الماتىدان  ارقالىققا  قاتىناۋ دا  ءدال  وسىلاي  بولادى. تەك  جۇپ  كۇندەرى قاتىنايتىن  ەكى ۆاگوندا  بوس ورىندار بولمايدى. بيلەتتى  الدىن الا  الماساڭىز، باسقالاي  قاتىناۋدىڭ  جولى جوق.

ارقالىقتان  الماتىعا  قاتىنايتىن  ەكى ۆاگوننىڭ  ءبىرى – پلاتسكارت، ەكىنشىسى – كۋپە. پلاتسكارت  دەگەنىڭىز – كادىمگى جۇك كامازى ىسپەتتى. ارقالىق، امانكەلدى، جانكەلدى ايماقتارىنداعى  ساۋداگەرلەر  ءجيى  وسى  ۆاگونعا  ورنالاسادى. قاراپايىم  جولاۋشىلاردى  تاعى  ابىگەرگە سالادى. ۆاگوندار ەسكى. ەشقانداي مۇمكىندىك جوق. بيلەت  قۇنى ۆاگوننىڭ  جايلىلىعى مەن ساپاسىنا، جولسەرىكتەردىڭ  قىزمەتىنە  ساي ەمەس! جولسەرىكتەر  جولاۋشىلارمەن  سىپايى  سويلەسۋ دەگەندى  بىلمەيدى. جولسەرىكتەردىڭ  كوبى – وزگە  ۇلتتىڭ  وكىلدەرى. مەملەكەتتىك  تىلدە  جاۋاپ قايتارمايدى. ءتىپتى، قتج كومپانياسى  باسشىلىعى  بەكىتكەن جولاۋشىلارعا  ارنالعان  جەڭىلدىكتەرگە  بەيجاي قارايدى. (مىسالى، اتالمىش جەڭىلدىكتەردىڭ №10 پۋنكتىندە  ۇيالى  تەلەفوندى  قۋات كوزىنە  جالعاۋ قىزمەتى تەگىن دەپ كورسەتىلگەن. جولسەرىكتەر بۇنى ەسكەرمەيدى، ۇيالى تەلەفونىنىڭ قۋاتى ازايا باستاعان ءار جولاۋشىدان 200 تەڭگە الادى).

ارقالىق – جاستار قالاسى. سەبەبى، وڭىردەگى جالعىز  جوعارى وقۋ ورنى – ىبىراي  التىنسارين  اتىنداعى  ارقالىق  مەملەكەتتىك پەداگوگيكالىق  ينستيتۋتى ستۋدەنتتەرىنىڭ 80 پايىزى وزگە  وبلىستاردىڭ  تۋمالارى. سونىڭ ىشىندە 70 پايىزى وڭتۇستىك وڭىردەن. وزگە  وبلىستان  كەلگەن  جاستاردىڭ  كوبى وسى  ەكى ۆاگون ارقىلى  قاتىنايتىنىن  تاعى دا باسا ايتقىمىز كەلەدى.

قۇرمەتتى  قتج  باسشىلىعى، ءبىزدىڭ  جانايقايىمىزعا  قۇلاق  اسىپ، ەسىك  ستانتسياسىندا  9 ساعات، قىسقى اۋىسىمداعى  2,5  ساعات  توقتاپ تۇرۋدى ء بىر رەتكە  كەلتىرىپ، ۆاگوننىڭ قولايلى، جايلى بولۋىنا زاماناۋي  تۇرعىدان  جاعداي جاساعاندارىڭىز ءجون. وسى كەلەڭسىزدىكتى جويىپ، الداعى ۋاقىتتا، جولاۋشىلاردىڭ  سەنىمىنەن  شىعار  دەپ ۇمىتتەنەمىز.

ەلدوس  توقتارباي.

Abai.kz