ومىردە اقىلعا قونىمسىز كەرەعارلىقتار كوپ قوي. سونىڭ ءبىرى مۇنايدىڭ ۇستىندە شالجيىپ جاتىپ، جىلىنا 85 ملن. توننا مۇناي ءوندىرىپ وتىرعان قازاقستاننىڭ اياق استىنان بەنزينگە جارىماي قالاتىندىعى. بيىلعى كۇزدە دە سولاي بولدى. قاي ججس-كە بارساڭ دا «بەنزين جوق» دەگەن سوزگە تاپ بولاسىڭ.  ودان ساپاسىز بەنزين قاپتادى-اي كەلىپ، قانشاما ادامنىڭ ناپاقاسىن ايىرىپ وتىرعان ماشينەلەرى سولاردىڭ كەسىرىنەن جارامسىز بولىپ قالدى.

 وسىندا قولدان جاسالعان قاستىقتىڭ قۇلاعى قىلتيىپ تۇرعانى شىندىق. كورشى ەلدەردىڭ بىرىندە (قايسى ەكەنى بەلگىلى عوي) ساپاسىز بەنزين شىعىپ، «ولاردى ساتقىزبايمىز» دەگەن دابىل قاعىلىپ ەدى، ءبىر اي وتپەي جاتىپ بىزدە بەنزين تاپشى بولدى دا كەتتى. ودان الگى ساپاسىز بەنزين بىزگە جەتىپ، ونى «الساڭ دا الاسىڭ، الماساڭ دا الاسىڭعا» سالىپ قويدى...

بەنزين نەگە جەتپەي جاتىر دەگەنگە وكىمەتتەگى وكىلەتتى ورگان باسشىلارىنىڭ بەرگەن جاۋابىن ەستىگەندە نە كۇلەرىڭدى، نە جىلارىڭدى بىلمەيسىڭ. ولار اۋزى –مۇرىندارى قيسايماي بارىنە كىنالى بىزدەگى بەنزيننىڭ ارزان ەكەنىن ايتادى. سونداعى سالىستىراتىندارى جىلىنا 80 مىڭ توننا عانا مۇناي وندىرەتىن قىرعىزستان مەن رەسەي.

 وسى ماسەلەگە بايلانىستى جۋىردا ءماجىلىس دەپۋتاتى ايقىن قوڭىروۆ پرەمەر-مينيستر كارىم ءماسىموۆتىڭ اتىنا ساۋال جولدادى. مىنە، وسى ساۋالدا دەپۋتات بىزدەگى بەنزين رەسەيلىكتەردەن ارزان، سوندىقتان جەتپەي جاتىر دەگەندى سىلتاۋراتىپ ونىڭ باعاسىن كوتەرگىسى كەلەتىن مونوپوليستەردى قاتتى سىنادى. وسى مىرزالار رەسەيدەگى ورتاشا ەڭبەكاقى بىزدىكىنەن 22 پايىزعا، ال ءومىر ءسۇرۋ دەڭگەيىنىڭ ەڭ تومەنگى كورسەتكىشى 100 پايىزعا جوعارى ەكەنىن نەگە ەسكەرمەيدى دەيدى دەپۋتات.

 سونىمەن بىرگە ول مونوپوليستەردىڭ ءتورتىنشى مۇناي وڭدەۋ زاۋىتىن سالۋدان نەگە قاشقالاقتايتىنىن تۇسىنبەيتىنىن ايتقان ەدى. ءتورتىنشى زاۋىتتى سالعانشا قولداعى ءۇش زاۋىتتى مودەرنيزاتسيالايمىز دەپ جاريالاعان مۇناي سەكتورى باسشىلارىنىڭ جاۋابىن ول دۇرىسقا سانامايتىنىن ايتتى. ويتكەنى، مودەرنيزاتسيالاۋ دەگەن ىستەپ تۇرعان زاۋىتتى بالەن ايعا توقتاتىپ قويۋ دەگەن ءسوز، ال بۇل حالىقتى الەۋمەتتىك جاعىنان ونسىز دا شيرىقتىرىپ وتىرعان ماسەلەنى مۇلدە كۇردەلەندىرىپ جىبەرمەي مە، دەيدى دەپۋتات. ونىڭ ۇستىنە مودەرنيزاتسيالايمىز دەگەن ءسوزدى وسى زاۋىتتىڭ قوجايىندارى جىلدا ايتادى، بىراق سونى ءالى كۇنگە ورىنداماي كەلە جاتقانى دا تۇسىنىكسىز. 

پرەزيدەنت ن.نازارباەۆ ۇستىمىزدەگى جىلعى جولداۋىندا 2015 جىلدان باستاپ ءتورتىنشى مۇناي-وڭدەۋ زاۋىتىن سالۋعا كىرىسەتىنىمىزدى جاريالاعان بولاتىن، ال مۇناي سەكتورىنىڭ وكىلەتتى ورگان باسشىلارىنىڭ ءسوزى الگىدەي. سوندا بۇلار پرەزيدەنتكە قارسى ما دەگەن ءسوزدى ناقتى ايتپاسا دا دەپۋتات وسى ساۋالدى پرەمەرگە جۇقارتىپ قويىپ وتىر.

ءجون. الايدا مۇنايدىڭ ۇستىندە وتىرىپ ونىڭ ونىمىنە تاپشى بولىپ قالۋىمىزدىڭ كۇردەلى سىرى بار ەكەنى انىق. سول سىردى اشىپ، ماسەلەنى پرەزيدەنتتىڭ ءوزى تۇبەگەيلى شەشپەسە پرەمەردىڭ قولىنان بۇل ءىس كەلمەيدى-اۋ دەگەن ءبىزدىڭ كۇمانىمىز بار.    

سەرىك ەلەۋ، ساراپشى

 Abai.kz