قايدا تۇراسىڭ؟ قاشان باسپانالى بولاسىڭ؟

«تۇرعىن ءۇي قۇرىلىس جيناق بانكى» اق وسى سۇراقتارعا جاۋاپ ىزدەيدى

كەشە، الماتى قالاسىنداعى تيان-شان قوناقۇيىنىڭ ءماجىلىس زالىندا «تۇرعىن ءۇي قۇرىلىس جيناق بانكىنىڭ» (تقجب) باسشىلارى مەن قوعامدىق كەڭەس مۇشەلەرىنىڭ جيىنى بولىپ ءوتتى. «تۇرعىن ءۇي قۇرىلىس جيناق بانكى» «قولجەتىمدى تۇرعىن ءۇي -2020» باعدارلاماسى بويىنشا پارمەندى جۇمىس ىستەپ باستاعان بانك ەكەنى كوپشىلىك قاۋىمعا بەلگىلى بولسا كەرەك.

وتكەن تامىز ايىندا اتالعان بانكتىڭ قاسىنان قوعامدىق كەڭەس قۇرىلعان بولاتىن. قوعامدىق كەڭەستىڭ قۇرامىندا قازاقستان جۋرناليستەر وداعىنىڭ توراعاسى سەيتقازى ماتاەۆ باستاعان تانىمال ءباسپاسوز وكىلدەرى مەن كاسىپكەرلەر، بانكتتىڭ كليەنتتەرى بار.

جيىن بارىسىن كىرىسپە سوزبەن اشقان قوعامدىق كەڭەس مۇشەلەرىنىڭ جەتەكشىسى سەيتقازى ماتاەۆ باسپانانىڭ باستى ماسەلە ەكەندىگىن قايتالاي كەلىپ، نەگىزگى اڭگىمە جەلىسىن  «تۇرعىن ءۇي قۇرىلىس جيناق بانكى» اق باسقارما توراعاسى ايباتىر جۇماقۇلوۆقا ۇستاتتى.

ايباتىر نىشانبايۇلى بىردەن ءىستىڭ سوزىنە كوشىپ: ء«بىزدىڭ بانكتىڭ سالىمشىلارى وزدەرى بولاشاقتا يە بولاتىن پاتەرلەردىڭ ساپاسىنا الاڭدايدى. سوندىقتان بانك قىزمەتكەرلەرى «قولجەتىمدى تۇرعىن ءۇي -2020» باعدارلاماسى بويىنشا سالىنىپ جاتقان ۇيلەرگە بارىپ، ولاردى سۋرەتتەرگە ءتۇسىرىپ، بانكتىڭ ۆەب-سايتىندا جاريالاپ تۇرادى. بانك كليەنتتەرى ءبىزدىڭ سايت ارقىلى تۇرعىن ۇيلەردىڭ قۇرىلىسى قالاي، قانداي ساپادا جۇرگىزىلىپ جاتقانىن باقىلاپ، قاداعالاپ وتىرادى. مىنە، ءبىز بۇگىن قۇرمەتتى، قوعامدىق كەڭەس مۇشەلەرى، سىزدەردىڭ الدارىڭىزعا «قولجەتىمدى تۇرعىن ءۇي -2020» باعدارلاماسى بويىنشا سالىنىپ جاتقان ۇيلەردىڭ جاي-كۇيىنە جاۋاپ بەرە الاتىن ادامداردى شاقىردىق»، - دەدى.

وسىلايشا بۇگىنگى جيىننىڭ ماقساتىن ايقىنداپ بەرگەن تورعانىڭ سوزىنەن كەيىن ورتاعا شىققان ەربول قاراشۇكەەۆ (تقجب اق باسقاراما توراعاسىنىڭ ورىنباسارى) 7 وبلىستان وكىلدەر كەلگەنىن، ولاردىڭ ارقايسىسى ۋاقىتىندا تاپىسىرىلماي قالىپ جاتقان تۇرعىن ۇيلەرگە قاتىستى ناقتى ماسەلەلەرگە جاۋاپ بەرەتىندىگىن حابارلادى.

ەربول شىراقپايۇلىنىڭ سوزىنە قاراعاندا،  «قولجەتىمدى تۇرعىن ءۇي -2020» مەملەكەتتىك باعدارلاماسى بويىنشا سالىنىپ جاتقان ۇيلەردىڭ باسەكەسىندە اقتوبە وبلىسى الدىڭعى ورىندا بولىپ شىقتى. اقتوبەدەن كەيىنگى ورىن الماتىعا ءتيىپتى. الماتىدان كەيىن استانا تۇر. استانانىڭ سوڭىنان باتىس قازاقستان وبلىسى مەن شىعىس قازاقستان وبلىسى ىلەسىپتى. ال، ەڭ سوڭعى ورىندا اقمولا وبلىسى مەن مۇنايلى وبلىستار: اتىراۋ مەن ماڭعىستاۋ تۇر.

حوش دەلىك. بىراق مەملەكەتتىك باعادارلامالار نەگىزىندە بوي كوتەرىپ ۇلگەرگەن ۇيلەر نەگە بەلگىلەنگەن مەرزىمىندە بەرىلمەيدى؟ نەگە ەل ءىشى وسى ۇيلەردىڭ ساپاسىنا نارازى؟ قاراشۇكەەۆ مىرزا وسى ساۋالداردى جاۋاپتى ادامدارعا تىكەلەي قويا وتىرىپ، ماسەلەنىڭ ءمان-جايىن انىقتاي سويلەۋدى سۇرادى.

مىسالى، كوكشەتاۋ قالاسىنداعى «ۆاسيلكوۆسكي» ىقشام اۋدانىندا تۇرعىزىلعان 150 پاتەرلىك 5 ءۇيدىڭ سىرتقى جۇمىستارى قارجى ۋاقىتىندا بولىنبەگەندىكتەن بىتپەي تۇر.

اتىراۋ قالاسىنداعى 135 پاتەرلىك 3 ءۇي («الماگۇل» ىقشام اۋدانى) بۇرىنعى وبلىس باسشىسىنا قىلىمىستىق ءىس قوزعالعاندىقتان توقتاپ قالعان.

پاۆلودار قالاسىنداعى №1 ىقشام اۋدانىندا 2011 جىلى باستالعان قۇرىلىس مەردىگەرلەردىڭ جۇمىستى تالاپقا ساي جۇرگىزە الماۋىنان تاعى ءبىر مەردىگەر اۋىستىرىپ مەجەسىنە جەتە الماي قاڭتارىلعان. الايدا، پاۆلودار قالاسى اكىمدىگىنىڭ قۇرىلىس باسقاراماسى جونىندەگى ءبولىمنىڭ ورىنباسارى ەرجان اسىلباەۆ مىرزانىڭ سوزىنە سەنسەك،  قازىر تۇرعىن ءۇيدىڭ ىشكى-سىرتقى جۇمىستارى جوندەلىپ، بىتۋگە تاياعان كورىنەدى.

پەتروپاۆلسك قالاسىنىڭ «بەرەكە» ىقشام اۋدانىنداعى 45 پاتەرلى ءۇيدىڭ سۋقۇبىرى جارىلىپ، ىرگەتاسى سوگىلگەن سوڭ جۇمىس توقتاپ، قاۋىپسىزدىك شارالارىن ەسكەرە وتىرىپ ماسەلەنى زەرتتەۋ، انىقتاۋ قاجەت بولعان. قازىر قۇرىلىس قايتادان قارقىن العانعا ۇقسايدى. ءسويتىپ، 2013 جىلى بەرىلۋگە ءتيىس ءۇي 2014 جىلعا قالعان.

شىمكەنتتەگى ء«نۇرسات» ىقشام اۋدانىندا بوي كوتەرىپ جاتقان 49 پاتەرلى 1 ءۇي باس مەردىگەردىڭ («شۇعىلا» جشس) جۇمىس كەستەسىن بۇزا بەرگەنى ءۇشىن اراداعى كەلىسىم قايتا قارالىپ، مەردىگەر اۋىسقان. سول سەبەپتى دە 49 پاتەرلى تۇرعىن ءۇي ءالى پايدالانۋعا بەرىلگەن جوق.

الماتىنىڭ «مامىر»، «ايگەرىم-2» ىقشام اۋدانىندا سالىنىپ جاتقان ۇيلەر جۇمىسشى كۇشىنىڭ تاپشىلىعى مەن كاسىبي مامانداردىڭ جوقتىعىنا بايلانىستى بىتەر ەمەس.

جوعارىدا ءبىز ءتىزىپ وتكەن جايتتاردىڭ ارقاندايىنا بولسىن وبلىس ورتالىقتارىنان ارنايى كەلگەن وكىلدەر بارىنشا جاۋاپ بەرۋگە تىرىستى. قايسىبىرى تەرلەپ-تەپشىپ، الداعى ءبىر-ەكى ايدا قۇرىلىس نىساندارىنىڭ تولىعىمەن اياقتالاتىندىعىنا سەندىرىپ باقتى. ايتسە دە، بۇنداي ۋادەلەر قوعامدىق كەڭەس مۇشەلەرىن يلاندىرا العان جوق. كەڭەس مۇشەلەرى ءوز تاراپتارىنان قۇرىلىس جۇمىستارىنا قاتىستى سۇراقتار قويىپ، قاجەتتى دەرەكتەردى قويىن داپتەرلەرىنە ءتۇرتىپ الىپ وتىردى.

ارينە، تقجب قاسىنان قۇرىلعان قوعامدىق كەڭەستىڭ جيىنىنان سوڭ ءبارى كەرەمەت بولىپ كەتەدى دەپ بايلام جاساۋ قاتە، بىراق، وسى ارادا كليەنتتەرىنىڭ كوڭىلىندەگى كۇدىك پەن كۇماندى ورتاعا سالىپ، ماسەلەنىڭ ءمان-جايىن كۇن تارتىبىنە قويىپ وتىرعان بانك اكىمشىلىگىنىڭ ارەكەتىن قۇپتاعان ءجون شىعار. نەگە؟ ويتكەنى ەلىمىزدەگى ءبىرىنشى دارەجەلى بانكتەردىڭ ءوزى سالىمشىلارىنىڭ اقشاسىن اينالىمدا ۇستاعانى بولماسا، ولاردىڭ تۇپكىلىكتى مۇددەلەرىمەن ەسەپتەسپەيدى. ءجا، بۇل ءوز الدىنا بولەك اڭگىمە. ءبىزدىڭ ايتپاعىمىز: مەملەكەت تاراپىنان قولداۋ ءبىلدىرىلىپ جاتقان باعدارلامالارعا قولدى سىلتەپ قويىپ قاراپ وتىرماي قاتىسقان ءجون، باق سىناعان ابزال. ول ءۇشىن «تۇرعىن ءۇي قۇرىلىس جيناق بانكىنىڭ» جەرگىلىكتى بولىمشەلەرىنە بارىپ حابارلاسىپ، اقپارات الىپ تۇرۋ كەرەك. قاجەت دەپ تاپساڭىز بانكتىڭ ەلەكتروندى پوشتاسىنا: os@hcsbk.kz حات جولداڭىز. ويىڭىزداعى سۇراقتاردى قويىڭىز، مامانداردان جاۋاپ الىڭىز. http://www.hcsbk.kz سايتىن قاراپ وتىرىڭىز. 8 8000 801 880 تەلەفونىنا تەگىن قوڭىراۋ شالىڭىز. بۇنى قيىنسىنساڭىزدار Abai.kz اقپاراتتىق پورتالى بانك قىزمەتىنە بايلانىستى ساۋالدارىڭىزعا ناقتى مامانداردان جاۋاپ الىپ،  دانەكەر بولۋعا دايىن.   

Abai.kz