...سونىمەن،  الا جازداي كۇتىپ ءجۇرىپ، كۇز باسىندا ايمان ساعيدۋللاەۆا اسلان سارىنجىپوۆتەن سارعايا كۇتكەن جاۋاپ حاتىن الدى. بىراق، ارينە ءبىلىم جانە عىلىم ءمينيسترىنىڭ وزىنەن ەمەس، سول مينيسترلىكتىڭ قۇزىرىنداعى مەكتەپگە دەيىنگى جانە ورتا ءبىلىم، اقپاراتتىق تەحنولوگيالار دەپارتامەنتىنىڭ ديرەكتورى ج. جوناتاەۆا دەگەن كىسىدەن.  جوناتاەۆانىڭ حاتى «الماتى وبلىسى، قاراساي اۋدانى، جاڭاتۇرمىس ورتا مەكتەبىنىڭ ۇستازى ا. ساعيدۋللاەۆاعا» دەپ ءتاپ-ءتاۋىر باستالادى دا سودان كەيىن كادىمگى كەڭسە تىلىنە كوشەدى.

-          بۇل حاتتا نە جازىلعانىن ماسەلە كوتەرىپ جۇرگەن مەنىڭ ءوزىم تۇسىنە المادىم. قاراپايىم وقىرمان ونى قايدان ءتۇسىنسىن؟ - دەيدى ايمان. سوندىقتان ءبىز دە قازپوشتا قىزمەتى ارقىلى جەتكەن حاتتىڭ كسەروكوشىرمەسىن عانا جاريالاۋعا ءماجبۇر بولىپ وتىرمىز.

ەستەرىڭىزگە سالا كەتەيىك، ء بىلىم جانە عىلىم ءمينيسترى اسلان ءسارىنجىپوۆتىڭ اتىنا سوڭعى 5 ايدىڭ شيرەگىندە بىرنەشە اشىق حات جازىلدى. سول حاتتىڭ ءبىرىن مەملەكەت جانە قوعام قايراتكەرى، اقىن مۇحتار شاحانوۆ جازدى. قوعام بەلسەندىلەرى جازدى. جاۋاپ بولعان جوق. سودان كەيىن 176 ادام قول قويىپ ءمينيستردىڭ اتىنا جانە ءبىر ءۇشبۋ حات جولدادى. سول حاتتار پرەزيدەنت اكىمشىلىگىنە، پرەمەر-مينيسترگە، سەنات سپيكەرى قاسىم جومارت توقاەۆقا دا رەتىمەن جولدانىپ جاتتى. ال، ولار ءوز كەزەگىندە مۇنداي مازمۇنداعى حاتقا ءبىلىم جانە عىلىم مينيسترلىگى جاۋاپ بەرۋ كەرەك دەگە سىلتەمە جاساپ وتىردى.

176 ادام قول قويعان اشىق حاتتا قانداي ماسەلەلەر كورىنىپ ەدى؟ قاراڭىز:

1. تاۋەلسىز ەلىمىزدە ورنى توردە بولۋعا ءتيىستى ۇلاعاتتى ۇستازدارىمىز اكىمشىلىك پەن مەكتەپ ديرەكتورلارىنىڭ قولبالاسىنا اينالعان. كونبىس، جالتاق مۇعالىمدەردەن تاربيە الىپ جاتقان ۇرپاعىمىزدان قانداي بولاشاق كۇتەمىز؟ مۇعالىم ازات بولماي، وقۋشى ەركىن ويلى بولا المايدى. سوندىقتان، وبلىستىق، اۋداندىق ءبىلىم باسقارمالارىن قر ءبىلىم جانە عىلىم مينيسترلىگى جەرگىلىكتى اكىمشىلىكتەن ءوز قۇزىرەتىنە وتكىزىپ الۋىن تالاپ ەتەمىز.

بۇل مەكتەپ مۇعالىمدەرىن سايلاۋ، ساناق، سەنبىلىك، گازەت-جۋرنالدارعا جازدىرۋ، كونتسەرتكە بيلەت العىزۋ ت.ب. سەكىلدى ءتۇرلى ناۋقانداردان قۇتقارۋدىڭ نەگىزگى جولى;

2. مەكتەپتىڭ جوندەۋ جۇمىستارىنا اقشا جيناۋدىڭ الدىن الۋ ءۇشىن ءار وقۋ ورنىنا جوندەۋ جۇمىستارىنا مەملەكەتتىك بيۋدجەتتەن بولىنگەن قاراجاتتى ءباسپاسوز بەتتەرىندە جاريالاۋ;

3. ۇبت-ءدىڭ كەمشىلىگى جەتەرلىك! جانە ۇبت-ءنىڭ قولدانىستاعى فورماتى ەلىمىزدىڭ ءبىلىم سالاسىنا ەنگىزىلىپ جاتقان جاڭا باعدارلامامەن («كەمبريدج تەحنولوگياسى») قابىسا بەرمەيدى. سوندىقتان ۇبت-ءنى بارىنشا جەتىلدىرۋ قاجەت.

4. مەكتەپ باسشىلىعى مەن مۇعالىم اراسىنداعى كەلىسىمشارت 1 جىلعا عانا جاسالادى. مەكتەپ باسشىلارى وسىنى پايدالانا وتىرىپ مۇعالىمدەردى ايتقانىنان شىعارماي، ايداۋىنا كوندىرە الادى. كەلەسى وقۋ جىلىندا جۇمىسقا قابىلدانىپ، ساعاتى مەن جۇكتەمەسىن قىسقارتپاي الۋى ءۇشىن مۇعالىمنىڭ مەكتەپ باسشىسىنا تاعى پارا بەرەتىن جايتتار دا كوپتەپ كەزدەسەدى. وسى جاعدايلارعا وراي، كەلىسىمشارت مەرزىمىن ۇزارتىپ، مۇعالىمدەردى قىزمەتكە قابىلداۋ ءۇشىن پارا الۋ فاكتىلەرىن تۇبىرىمەن جويۋدىڭ امالدارىن قاراستىرادى دەپ سەنەمىز.

5. ءتۇرلى تەكسەرۋلەر مەن سىناقتارعا ارنالعان وقۋشىنىڭ بىلىمىنە قوسار ۇلەسى از قاعازداردى ۇستازدارعا تولتىرتا بەرۋدىڭ ءدال قازىرگى تەحنولوگيانىڭ دامىعان ۋاقىتىندا قاجەتى شامالى. سوندىقتان مۇعالىمدەر بىلىكتىلىگى مەن وقۋشىلار ءبىلىمى ىلگەرىلەسىن دەسەك، ارتىق قاعازباستىلىقتان قۇتىلۋ كەرەك.

6. ءبىر مەكەمەدە باسشىلىق قىزمەتتە 15-20 جىلداپ وتىرۋ تانىستىق-تامىرلاستىققا اپارادى، ول ارى قاراي سىبايلاس جەمقورلىققا، پاراقورلىققا ۇلاسىپ كەتەدى. سوندىقتان مەكتەپ ديرەكتورلارىنىڭ ءبىر ورىندا تاپجىلماي ۇزاق وتىرۋىنا مۇمكىندىك بەرىلمەسىن.

7. مەكتەپكە جان-جاقتان كەلەتىن تەكسەرۋلەردىڭ بارلىعى دەرلىك تەك اقشا جيناۋدىڭ امالى. ول تەكسەرىستەردەن وڭ باعا الۋ ءۇشىن تاعى دا مۇعالىم قالتاسىنداعى قاراجاتىنان قاعىلادى. سوندىقتان قاپتاعان تەكسەرىستەردىڭ قاجەتتىسىن عانا قالدىرىپ، كەرەكسىزىن مۇلدە الىپ تاستاۋ قاجەت.

8. قازاقستان رەسپۋبليكاسىنىڭ 2007 جىلعى 27-شىلدەدەگى №319 ءبىلىم تۋرالى زاڭى 51-بابىنىڭ 4-تارماعىندا «قازاقستان رەسپۋبليكاسىنىڭ زاڭدارىندا كوزدەلگەن جاعدايلاردى قوسپاعاندا، پەداگوگ قىزمەتكەرلەردى وزدەرىنىڭ كاسىپتىك مىندەتتەرىن ورىنداۋ مەن بايلانىسى جوق جۇمىس تۇرلەرىنە تارتۋعا جول بەرىلمەيدى»  دەگەن زاڭ تارماعى ءبىزدىڭ تالاپتارىمىزبەن تولىقتىرىلۋىن ءارى ناقتى كۇشىنە ەنۋىن تالاپ ەتەمىز. (http://abai.kz/post/view?id=3980).

P.S. ءبىلىم جانە عىلىم مينيسترلىگىنەن  ايمان ساعيدۋللاەۆانىڭ اتىنا كەلگەن حاتتا جوعارىداعى 8 ماسەلەگە بايلانىستى ناقتى جاۋاپ جوق. ال، بۇنى نە دەۋگە بولادى؟ جاۋاپ دەۋ كەرەك پە، الدە مينيسترلىكتىڭ جاۋاپسىزدىعى دەۋ كەرەك پە؟ جاۋاپسىزدىق دەمەكشى، حاتتىڭ ماڭدايشاسىنا كوز جىبەرىڭىزشى. "28 قىركۇيەك، 2015 جىل" دەپ تۇر. بۇگىن قانشاسى؟ كۇلەمىز-ءا!. مۇنداي قاتەلىككە كۇلمەۋ كەرەك؟ بۇل ءبىزدىڭ مينيسترلىكتىڭ "ساۋاتتىلىعىنىڭ" كورىنىسى. سولاي ەمەس پە؟ تورەلىگىن جۇرت ايتسىن.

Abai.kz