قازاقستاندا تولقۇجاتقا قر پرەزيدەنتىنىڭ تاۋەلسىزدىك تۋرالى ءسوزى ەنگىزىلەدى. ءدال وسىنداي نورمانى كوزدەيتىن زاڭ جوباسىن بۇگىن قر پارلامەنتى ءماجىلىسى قاراۋىنا الدى.

قر پارلامەنتى ءماجىلىسىننىڭ زاڭناما جانە سوت-قۇقىقتىق رەفورما كوميتەتىنىڭ توراعاسى راحمەت مۇقاشەۆتىڭ ايتۋىنشا، بۇل زاڭ جوباسى رەسپۋبليكانىڭ «جەكە باستى كۋالاندىراتىن قۇجاتتار تۋرالى» زاڭىنا تولىقتىرۋلار ەنگىزۋدى كوزدەيدى. زاڭ جوباسىنىڭ ماقساتى – «ماڭگىلىك ەل» جالپى ۇلتتىق پاتريوتتىق يدەياسىنىڭ نەگىزگى نورمالارى مەن قۇندىلىقتارىن ەنگىزۋ.

«جەكە باستى كۋالاندىراتىن قۇجاتتار تۋرالى» زاڭعا رەسپۋبليكا ازاماتتارىنىڭ تولقۇجاتىنا  تۇڭعىش پرەزيدەنتتىڭ، ۇلت كوشباسشىسىنىڭ تاۋەلسىزدىك تۋرالى ءسوزىن ەنگىزۋ، سونىمەن قاتار رەسپۋبليكا ازاماتىنىڭ قر ازاماتتىعىنا قابىلدانۋىنا بايلانىستى جەكە كۋالىك الۋ كەزىندە مىندەتتى تۇردە انت بەرۋ تۋرالى وزگەرىستەر  ەنگىزىلەدى»، – دەدى ول.

زاڭ جوباسىن وتىرىسقا قاتىسقان 100 دەپۋتاتتىڭ بارلىعى قولداپ، ارنايى قاۋلى قابىلداندى.

Inform.kz