وسىدان 2 جىلعا جۋىق بۇرىن – 2013 جىلى 13 جەلتوقساننىڭ تۇنىندە شاردارا قالاسىنداعى (وڭتۇستىك قازاقستان وبلىسى) «حالىق بانكىنىڭ» فيليالىنان 63 ميلليون تەڭگە ۇرلانادى. كۇدىكتى رەتىندە «ۇيىقتاپ قالىپپىن» دەگەن كۇزەتشى ا.جارباەۆ بىردەن قاماۋعا الىنادى. ءۇش اي بويى تىمىسكىلەپ، تۇك تاپپاعان تەرگەۋشىلەر «كۇزەتشى كورسەتتى» دەپ، 2014 جىلدىڭ 8 ناۋرىزىندا بانكتىڭ فيليال ديرەكتورى م.احمەتوۆ باستاعان بەس بىردەي قىزمەتكەرىن تاعى قاماۋعا الادى.

تۋراسىن ايتقاندا، بانك ديرەكتورى باستاعان بەس بىردەي قىزمەتكەر وزدەرى نانىن جەپ وتىرعان مەكەمەنى تونايدى دەگەنگە كىم سەنەدى؟ ال پوليتسەيلەر بولسا، ولاردى ۇرىپ-سوعىپ، قيناپ، ازاپتاپ، ء«بىز ۇرلادىق» دەگىزىپ، كىنالارىن مويىنداتادى. كەيىن ولاردىڭ ءبارى دە بۇل مويىنداۋدان باس تارتۋى، سوققى، ازاپ كورگەنى جايلى ارىزدانۋى سەبەپتى 2014 جىلى 22 ساۋىردە قىلمىستىق ءىس قوزعالعانىمەن، 7 قاراشادا «قىلمىستىڭ قۇرامى بولماۋى سەبەپتى» قىسقارتىلىپ جىبەرىلەدى.

– مەنىڭ بالام، بانكتە پروگرامميست بولىپ ىستەيتىن ەرجىگىت قاسيموۆتى 8 ناۋرىز كۇنى شاردارا اۋداندىق ءىىد شاقىرادى، – دەيدى ۇلبوسىن سەيداەۆا. – ويىندا ەشنارسە جوق ونى كىرگەن بويدا شاردارا اۋداندىق ءىىب باستىعى بەگمانوۆ بار، وبلىستىق ءىىد تەرگەۋ ءبولىمىنىڭ باستىعى داۋىلباەۆ بار، اۋداندىق ءىىب قىزمەتكەرى وسپانوۆ دەگەن بار، 5–6 ادام «اقشا قايدا؟! اقشا قايدا؟!» دەپ تارپا باس سالادى. «قانداي اقشا؟» دەسە، «مىنە، قازىر بىلەسىڭ» دەپ، ءبىر تۇيمەنى قوسسا، جارباەۆتىڭ «ەرجىگىت قاسيموۆ بەينەكامەرانىڭ سىمىن ەكى جەردەن كەستى» دەپ، ءويتتى دە ءبۇيتتى دەگەن ساڭقىلداعان داۋسى ەستىلەدى. «ويباي، وتىرىك، مەن مۇنداي بالەنى ىستەگەن جوقپىن!» – دەگەن بالامدى ءبىر ۇرىپ قۇلاتىپتى دا، قولىنا كىسەن سالىپ، ەكىنشى ءبىر بولمەگە اپارىپتى. ول جەردە باسىنا تسەللوفان پاكەت كيگىزىپ، ۇرىپ-سوعىپ، جاتقىزىپ الىپ تەپكىلەپ، ابدەن ازاپتاپتى.

«اسىرەسە پاكەت كيگىزىپ ۇرعاندا، قاتتى قينالدىم، تۇنشىعىپ ءولىپ كەتە جازدادىم. سولاردىڭ ايتقانىنا كونبەسەم، بايقاۋسىزدا ءولىپ كەتۋىم مۇمكىن ەكەنىن سەزگەننەن كەيىن بارىپ، «جارباەۆتىڭ ايتقانى راس» دەپ مويىندادىم، دەدى بالام كەيىن جولىققاندا.

2014 جىلى 2 ءساۋىر كۇنى تەرگەۋلىك ەكسپەريمەنتكە اپاراتىن بولدى دەپ ەستىگەن سوڭ، ءوزىم باسى-قاسىندا ءجۇردىم. ادۆوكات ە.ەلەۋسىزوۆ: «ەگەر سەن شىنىمەن ۇرلىققا قاتىسقان بولساڭ، قازىر ۇرلىقتى قالاي ىستەگەنىڭدى، تەرەزەنىڭ تەمىر تورىن قالاي بۇزعانىڭدى قولىڭمەن ىستەپ كورسەتەسىڭ»، – دەگەن ەكەن، بالام: «مەن ونىڭ ءبارىن ىستەمەسەم، قالاي كورسەتەمىن»، – دەپ، بۇرىنعى ايتقاندارىن جوققا شىعارىپ، باس تارتتى.

– ال مەنىڭ بالام م.ءالىمجانوۆتى تەرگەۋلىك ەكسپەريمەنتكە اپارماعان، – دەيدى ب.ءالىمجانوۆا. – سەبەبى ا.جارباەۆ ونى بانكتىڭ ىشىنە كىردى دەپ كورسەتپەگەن. تەرگەۋ ەكسپەريمەنتىنە دەيىن ۇرىپ-سوققان كەزىندە ايىپتالۋشى 6 ادامنىڭ بەسەۋى مويىنداعان-داعى، جالعىز مەنىڭ بالام م.ءالىمجانوۆ قانا ەشنارسەنى مويىنداماعان. ول شتاتتان تىس جۇرگىزۋشى عوي. 14 جەلتوقساندا جۇمىسقا كەلگەندە ۇرلىق بولعانىن ءبىر-اق ەستىگەن. وعان ۇرلىققا قاتىستى، مىنا نارسەنى ىستەدى دەگەن ناقتى ايىپ تاعىلماسا دا، سوتتالىپ وتىر. تەرگەۋشىلەر قىلمىستىق ىسكە مەنىڭ بالامنىڭ كوزى كوگەرىپ، بەتى كۇپتەي بولىپ ءىسىپ كەتكەنى، مۇرنىنىڭ سىنعانى كورىنبەس ءۇشىن، 9 ناۋرىزدا العان جاۋاپتى ەمەس، 11 ناۋرىزدا العان تەرگەۋدىڭ ءبىر قىرىنان تۇسىرگەن ديسكىسىن تىككەن.

– سوتتا سەرۆەردىڭ ديسكىسىندەگى بەينەجازبانى كورگەنىمىزدە، ۇرىلاردىڭ ەسىكتى بۇزىپ ەمەس، كىلتپەن اشىپ كىرگەنى بايقالىپ تۇردى. سول كەزدە سۋديا ش.بيسيمباەۆانىڭ ءوزى «قاسيموۆ پەن جارباەۆتى شىعارىڭدارشى، سالىستىرىپ كورەيىك» دەدى. كورگەننەن كەيىن «مىنا ادامنىڭ سۇلباسى جارباەۆقا كەلەدى ەكەن، قاسيموۆتىڭ بويى الاسا عوي» دەدى. ءسويتىپ وتىرىپ، بالالارعا 5–6 جىلدان ۇكىم شىعاردى... 13 جەلتوقسان كۇنى تۇندە بالام ەرجىگىت ءوز ۇيىمىزدە قونعان، ءبىز كۇيەۋىم ەكەۋمىز مەنىڭ اكەمنىڭ قىرقىن بەرۋگە كەتكەنبىز. قاسىندا كلاستاس دوسى نۇرلان پاسەنوۆ بولعان. ن.پاسەنوۆ سوتتا سويلەگەن سوزىندە انت وقىپ تۇرىپ كۋالىك بەرسە دە، سۋديا ش.بيسيمباەۆا ونى قاپەرگە العان جوق.

زاڭ بۇزۋشىلىق العاشقى تەرگەۋدە عانا ەمەس، شىمكەنت قالاسى ءال-فارابي اۋداندىق سوتىندا سۋديا ش.بيسيمباەۆا 7 اي جۇرگىزگەن سوت تەرگەۋىندە دە جالعاستى. ول جايلى ادۆوكاتتار قانشاما ءوتىنىش (تالاپ-تىلەك) بەرگەنىمەن، ەشقايسىسى قاناعاتتاندىرىلعان جوق.

سونىمەن، 28 مامىرداعى سوت ۇكىمىمەن ءالى ۇيلەنبەگەن ءۇش جاس جىگىت 5–6 جىلدان «ارقالاپ» كەتە باردى. قايتسەك ادىلدىككە قولىمىز جەتەدى دەپ جانۇشىرعان جاندارعا زاڭگەر جاڭابەك ابىشەۆ بىلاي جاۋاپ بەرگەن ەدى:

-         باسقا بانك تونالسا، زاڭ بۇزۋشىلىق مۇنشاما مول بولماس پا ەدى، ال «حالىق بانكىنىڭ» قوجايىندارى – دينارا نازارباەۆا مەن تيمۋر قۇلىباەۆ. ياعني، ەلىمىزدىڭ پرەزيدەنتى نۇرسۇلتان نازارباەۆتىڭ تۋعان قىزى مەن كۇيەۋ بالاسى. تەرگەۋشىلەر بۇل ءىستى اشا المادىق، ۇرىلاردى تابا المادىق، تابا الماعاندىقتان اقشانى ورنىنا قويا المادىق دەپ، بانك قوجايىندارىنا بايانداۋعا باتا المايدى. ولارعا قالاي دا كىنالىنى تابۋ، تاپتىق دەپ ەسەپ بەرۋ قاجەت.

ء«ادىل شەشەمىن» دەگەن شارا بيسيمباەۆاعا سەنىپ، الدانىپ قالعان ءبىزدىڭ ءوزىمىز» – دەيدى بايعۇس انالار. – بۇل ىستە ءبىزدىڭ ەڭ قاتتى جانىمىزعا باتاتىنى – دينارا نازارباەۆا مەن ونىڭ كۇيەۋى شارداراداعى بانك فيليالىنىڭ تونالعانىنان مۇلدە حابارسىز-اۋ دەيمىز. ەستىسە، مۇمكىن، «تابىلماسا قايتەسىڭدەر، قويا سالىڭدار» دەپ تە قالار ما ەدى... ميللياردتاعان دوللارى بار ادامدار ءۇشىن 63 ملن.تەڭگە دەگەن نە، ءتايىرى! ءبارىن ءبۇلدىرىپ وتىرعان – قىزمەتىمىزدەن ايىرىلىپ قالامىز با دەپ، قالتىراپ-دىرىلدەپ جۇرگەن ورتاداعى شەنەۋنىكتەر عوي...».

29 شىلدەدە شىمكەنت قالاسىندا باستالعان وبلىستىق اپەللياتسيالىق سوتقا قر قىجك-ءنىڭ 86-بابىنىڭ تالاپتارىندا جازىلعان: «...بىرنەشە سۋدياعا نەمەسە بۇكىل سوت قۇرامىنا بەرىلگەن قارسىلىق...» دەپ كورسەتىلگەن زاڭ تالابىنا سۇيەنە وتىرىپ قارسىلىق بەرگەن ولار تالابى قاناعاتتاندىرىلماسا: ا) جوعالعان اقشا د.نازارباەۆانىڭ اقشاسى ەمەستىگىن; ب) د.نازارباەۆا قر پرەزيدەنتى ن.نازارباەۆتىڭ قىزى ەمەستىگىن; ۆ) سۋديالاردى تاعايىندايتىن قر پرەزيدەنتى ەمەستىگىن تەرىسكە شىعارۋدى جانە سونىمەن بىرگە قر قىجك-ءنىڭ 87-بابىنىڭ 10-ءبولىمىنىڭ تالابىنا سايكەس وبلىستىق سوتتىڭ تولىق قۇرامى كوپشىلىك داۋىسپەن قابىلداعان شەشىمىمەن جازباشا تۇردە تانىستىرۋىن تالاپ ەتكەن.

ايتسە دە، ولاردىڭ بۇل ارەكەتىنەن دە ەشتەڭە شىقپادى: قارسىلىقتار قاناعاتتاندىرىلعان جوق. اپەللياتسيالىق سوت ءوز تەرگەۋىن جۇرگىزۋگە مۇمكىندىك الدى. ونىڭ ءبىرىنشى وتىرىسىندا قوس ادۆوكات وزدەرىنىڭ اپەللياتسيالىق شاعىمدارىن ورتاعا سالدى.

ادۆوكات ءا.سارىباەۆ: ءدال سولاردىڭ ۇرلىق جاساعانىنا ەشكىم، ادۆوكات رەتىندە مەن دە سەنبەيمىن. ناقتى ەشقانداي دالەل كورسەتىلگەن جوق. ايىپتاۋ قورىتىندىسى تەك بولجامدارعا جاسالعان. ءبىز وسىعان بايلانىستى تالاي تالاپ-تىلەك بەرگەنىمىزبەن، بىردە-بىرەۋى قاناعاتتاندىرىلمادى.

بىرىنشىدەن، جارباەۆتان باسقا 5 جىگىت بانك فيليالىنداعى جۇمىستارىن ىستەپ جۇرگەن. ولاردىڭ وسى قىلمىسقا قاتىسى بار-جوقتىعى تەكسەرىلگەن، ەشقانداي كۇدىك تۋماعان. ءسويتىپ كەلەدى دە، 2014 ج.، 8 ناۋرىز، مەيرام كۇنى بىردەن بەسەۋى دە قاماۋعا الىنادى. ا.جارباەۆتىڭ كورسەتۋىمەن. جەدەل تەرگەۋ ءىس-شارالارى 8 ناۋرىز كۇنى ەمەس، 9 ناۋرىز كۇنى، ءارى زاڭسىز جولمەن – قيناۋ، ۇرىپ-سوعىپ ازاپتاۋ، ءتىپتى ءدارى ەگۋ ارقىلى جۇرگىزىلىپ، تەرگەۋشىلەر وزىنە كەرەكتى جاۋاپقا وسىنداي جولمەن قول جەتكىزگەندىگى جايلى ولار كەيىن ارنايى مالىمدەمە جاسادى. پروكۋراتۋرا تەرگەۋشىلەردىڭ ۇستىنەن قىلمىستىق ءىس قوزعاعانىمەن، «ناتيجەسى» باسقاشا بولدى...

جاۋاپ الۋ، بەتتەستىرۋ، ايىپ تاعۋ، بارلىعى ءبىر كۇننىڭ ىشىندە جاسالعان. دەمەك، ونىڭ ءبارى الدىن الا دايىندالىپ قويعان دەگەن ءسوز. كوپ جەردە زاڭ تالاپتارى بۇزىلعان. ونداي جاعدايدا الىنعان دالەدەمەلەر قابىلدانبايتىنى بەلگىلى.

شىمكەنتتىك ساراپشىلار بانكتىڭ اقشا ساقتايتىن قويما ەسىكتەرى بۇزىلىپ اشىلعان دەسە، الماتىلىق جانە استانالىق ساراپشىلار كىلتپەن اشىلعان دەيدى. سوت سوڭعى ەكى ساراپتاماعا سۇيەنگەن. ءۇش ەسىكتىڭ كىلتى ءۇش ادامدا ساقتالادى. ونىڭ بىرەۋى جوعالسا بولدى، قويماعا كىرۋ مۇمكىن ەمەس. وبلىستىق، اۋداندىق بانكتەردەگى كىلتتەردىڭ ەشقايسىسى جوعالماعان. ولاي بولسا، ەسىكتەردى اشاتىن كىلتتەر قالاي پايدا بولدى؟ ول كىلتتەردىڭ كوشىرمەسىن وبلىستىق بانكتىڭ باستىعى ماقۇلباەۆ بەرىپ جىبەردى دەگەن نۇسقا جارامسىز دەپ تانىلىپ، ونىڭ ۇستىنەن قوزعالعان ءىستى پروكۋراتۋرا قىسقارتىپ جىبەردى. ال وندا الگى ەكى ساراپتاما نەگە سۇيەنىپ، «ەسىكتەر كىلتپەن اشىلدى» دەگەن تۇجىرىم جاساپ وتىر؟ ولار الگى «مويىنداۋ» تۋرالى جاۋاپتارعا، سونداعى ء«بىز ەسىكتەردى كىلتپەن اشتىق» دەگەن سوزدەرگە سۇيەنىپ جاسالعان. ودورولوگيالىق زەرتتەۋدە دە بەكىتىلگەن ەرەجەلەر بۇزىلعان. ءيىسشىل يت ۇسىنىلعان 5 ءيىستىڭ ىشىنەن 1 ءيىستى عانا بۇلجىتپاي تابۋى ءتيىس. ول ءۇشىن كەرەك 1 ءيىس پەن بوتەن 4 ءيىس ۇسىنىلادى. ال تەرگەۋشىلەر 5 ءيىستى قابات ۇسىنعان.

سول كۇنى تاڭەرتەڭ 5.30-دا بانكتە بولدى دەگەن ايجانوۆ پەن تۇرلىبەكوۆ اتتى قالىس كۋالار سوتتا بەرگەن جاۋابىندا تاڭەرتەڭ ساعات 9-دا كەلگەنبىز دەسە، كەيىن قوسىمشا ارىز جازىپ، تاڭەرتەڭگى 5-تە كەلگەنبىز دەپتى. قايسى ءسوز شىن؟ ەگەر ولار قاتىسپاسا، وندا سول جەردە كۋاگەرلەرسىز جۇرگىزىلگەن العاشقى تەرگەۋ ءىسىنىڭ ءبارى زاڭسىز بولىپ تابىلۋى ءتيىس.

تەرگەۋشىلەر ايگىلى 2014 جىلعى 9 ناۋرىزداعى «مويىنداۋ» كۇنىنىڭ بەينەتاسپاسىن ىسكە تىككەن. بىراق وندا ونى تۇسىرگەن كىم، قانداي بەينەكامەرامەن تۇسىرگەن، قاشان، قاي جەردە تۇسىرگەن – بۇل جايلى بولۋى ءتيىس مالىمەتتەردىڭ ەشقايسىسى جوق. ۇرلىق بولعان كۇنى ءمىنايداروۆ پەن داۋلانوۆ ۇيلەرىندە بولعان. وعان اكە-شەشەلەرىنەن دە، باسقا دا كۋالار بار. ۇرلىققا قاتىسقاندارىنا دالەل بولاتىن بىردە-ءبىر ايعاق زات، دالەلدەمە جوق.

ادۆوكات ە. ەلەۋسىزوۆ: وسى كۇندى ءبىز كوپ كۇتتىك. ءال-فارابي اۋداندىق سوتىنىڭ ۇكىمى تولىق وزگەرتۋگە جاتادى، ءتۇپ-تۇگەل قاتە. (مەن جارباەۆتان باسقا بەس ازامات جايلى ايتىپ وتىرمىن). سەبەبى تەرگەۋشىلەرگە دە، پروكۋراتۋراعا دا، سوتقا دا كەرەگى – «ۇرىلاردى تاپتىق، ولاردى جازالادىق» دەپ راپورت بەرۋ عانا. كىناسى بار ما، جوق پا – وعان باسىن اۋىرتىپ جاتقان ەشكىم جوق.

ءبىز ءبىر نارسەنىڭ شيكىلىگىن ايتساق، سوتقا قاتىسقان پروكۋرورلار ۇيالماي ورىندارىنان تۇرىپ بارىپ، ءىستىڭ تومدارىن اقتارادى. وسى ما وقىعاندارى؟ مەن سوتتا «نەگە سىزدەر ءىستى وقىمايسىزدار؟» دەسەم، «بىزدە ءىس كوپ، وقۋعا ۇلگەرمەيمىز» دەپ جاۋاپ بەردى. پروكۋرور قوجامقۇلوۆ سوتتا قولىنا ايىپتاۋ قورىتىندىسىن ۇستاپ قانا وتىردى. بۇنداي كوزقاراستا ەشقانداي ادىلدىك بولمايدى.

ەڭ ءبىرىنشى ىستەلەر نارسە – وقيعا بولعان جەردى قاراۋ. ساعات 04.43-تە بانكتەن دابىل قوڭىراۋى تۇسكەن. وپەراتيۆتىك توپ 15 مينۋت وتكەن سوڭ بارىپ كەلگەن. سوتتا بانك كاسسيرى ء«بىر رەت دابىل تۇيمەسىن بايقاماي باسىپ قالعانىمدا، وپەرتوپ ءبىر مينۋتتا كەلدى» دەپ كۋالىك بەردى. نەگە بانك قورشاۋعا الىنباعان؟ قالىس ادامدار ايجانوۆ پەن تۇرلىبەكوۆتەن سوتتا «سىزدەردىڭ كوزدەرىڭىزشە ادام قولىنىڭ ىزدەرى، اياقتىڭ ىزدەرى الىندى ما؟» دەپ سۇراعانىمىزدا، «بىلمەيمىز» دەيدى...

تەرگەۋشىلەر وقيعا بولعان جەردەن 4 اياق كيىم ءىزىن تاپقان. بىراق ونىڭ بىردە-بىرەۋى انىقتالماعان! قالايشا ولار تەگىس انىقتالمايدى؟ ء«ىزى ءتۇسىپ قالعان اياق كيىم قاسيموۆتىڭ اياق كيىمى، ول اياعىنا گالوش كيىپ كەلگەن» دەپ قورىتىندى جاساعان. سوندا قىستىڭ كۇنى، دالادا -15 گرادۋس، ال قاسيموۆ گالوش كيىپ جۇرگەنى مە؟

ال شىن مانىندە بۇل قىلمىس وتە مۇقيات دايىندالىپ جاسالعان. شىن ۇرىلار سونداي قىلمىسىن 7 ايدان سوڭ تاعى قايتالاپ، شارداراداعى ەكى بانكوماتتىڭ بىرەۋىن توناپ كەتتى. قىلمىس سول اشىلماعان كۇيى قالدى. تەرگەۋشىلەر وسى ءىستىڭ ءبىتۋىن، ۇكىمنىڭ كۇشىنە كىرۋىن، جوعارعى سوتتا بەكىتىلۋىن كۇتىپ وتىر. سودان كەيىن بارادى دا، تاعى ءۇش-ءتورت جىگىتتى «مويىنداتادى»...

«ۇرىلار ەسىكتەردى كىلتپەن اشتى-داعى، سودان كەيىن بارىپ اشىلعان ەسىكتەردى ۇرعىلاپ، بۇزىپ كىرۋدىڭ ىرىمىن (يميتاتسيا) جاساعان» دەيدى. بۇل ەندى ەشقانداي قيالعا سىيمايتىن تىرلىك. مەن بۇرىنعى تەرگەۋشى رەتىندە شىمكەنتتىك سوت-تراسسولوگيالىق ساراپتامانىڭ «ەسىكتەر بۇزىلىپ اشىلدى» دەگەن ۋاجىمەن كەلىسەمىن. تەرگەۋشىلەر ايىپتالۋشىلاردى مويىنداتىپ العان سوڭ بارىپ، سول جاۋاپتاردى الماتى مەن استاناعا جىبەردى. التى ادامنىڭ جاۋابى التى ءتۇرلى. وسىنداي جاعدايدا «ايىپتالۋشىلار ءوز كىنالارىن تولىق مويىندادى» دەپ قالاي تۇجىرىم جاساۋعا بولادى؟ ولاردىڭ ءسوزى ەڭ بولماسا ءبىر سۇراق بويىنشا دا سايكەس كەلمەيدى.

«حالىق بانكى» وقو فيليالىنىڭ ديرەكتورى ماقۇلباەۆ سوتتالعان احمەتوۆتىڭ «مويىنداۋ» ءسوزى بويىنشا قاماۋعا الىنىپ ەدى، احمەتوۆتىڭ كەيىنگى ۇرىپ-سوعۋ تۋرالى مالىمدەمەسىنەن سوڭ، پروكۋراتۋرانىڭ ءىستى قىسقارتۋىنا بايلانىستى اقتالىپ كەتتى. ال احمەتوۆ باستاعان بەس ازاماتتىڭ قامالۋىنا سەبەپ بولعان جارباەۆتىڭ «مويىنداۋ» ءسوزى. بىراق كەيىن جارباەۆ تا ءوز سوزىنەن باس تارتتى عوي، ەندەشە نەگە 5 جىگىت ماقۇلباەۆ سەكىلدى بوساتىلمايدى؟ بوساتىلمايتىن سەبەبى – ول كەزدە بۇكىل پوليتسيا قىزمەتكەرلەرىنىڭ وتىرىگى اشىلادى!

قىلمىستىق ءىستىڭ ەكى تومى بۇل التى ادامنىڭ ءبىر-بىرىمەن ۇيالى تەلەفونمەن سويلەسكەنى تۋرالى. سونىڭ ىشىندە ولاردىڭ سول كۇندەرى ءوزارا سويلەسكەنى جايلى بىردە-ءبىر دەرەك جوق! ۇكىمدە احمەتوۆ پەن جارباەۆتان باسقا سوتتالعان «...4 جىگىت كۋۆالدانىڭ كومەگىمەن بانك تەرەزەسىنىڭ تەمىر تورىن بۇزىپ كىرىپ...» دەلىنگەن. مەن 22-تومدى تۇگەل وقىپ، بىردە-ءبىر جاۋاپتان «كۋۆالدا» دەگەن ءسوز تاپپادىم، سۋديا ونى قايدان الىپ وتىر؟

P.S. وتكەن اپتادا اقپارات قۇرالدارى شاردارادا  پوشتانى توناماقشى بولعان، مىلتىقپەن، پيستولەتپەن قارۋلانعان قاراقشىلار ۇستالعانىن جانە ولاردىڭ سىبايلاسى اۋداندىق ۇقك-ءنىڭ قىزمەتكەرى بولىپ شىققانىن حابارلاعان سوڭ، سوتتالعان 4 جىگىتتىڭ اتا-اناسى شىمكەنتتە ءباسپاسوز ءماسليحاتىن وتكىزىپ، جۋرناليستەر مەن قوعام وكىلدەرىن وسى ءىستى باقىلاۋعا الۋلارىن ءوتىندى. «بانكومات پەن بانكتى توناعاندار دا سولار، ويتكەنى شالعاي اۋداندا بۇنداي ۇرلىققا بارۋ كوپ ۇرىنىڭ قولىنان كەلمەيدى، تەك ەندى ولار تەرگەۋشىلەرمەن اۋىز جالاسىپ، بانكتى توناعاندارىن مويىنداماي كەتەدى دەپ قاۋىپتەنەمىز» دەيدى ولار...

ومىرزاق اقجىگىت،

جۋرناليست.

وڭتۇستىك قازاقستان وبلىسى

دەرەك كوزى: «وبششەستۆەننايا پوزيتسيا»

(پروەكت «DAT» №28 (299) وت 27 اۆگۋستا 2015 گ.