كەشە، اقوردادا قر پرەزيدەنتى نۇرسۇلتان نازارباەۆتىڭ توراعالىمەن ەكونوميكالىق ساياساتتىڭ جۇيەلى شارالارى جونىندەگى كەڭەس ءوتتى. شارا بارىسىندا الەمدىك نارىقتاعى احۋالدىڭ قيىنداۋى جاعدايىندا قازاقستاندىق ەكونوميكانىڭ ءوسىمىن قامتاماسىز ەتۋ باعىتتارى تالقىعا ءتۇستى. مەملەكەت باسشىسى ۇزاقمەرزىمدى بولاشاقتا قازاقستاندىق ەكونوميكاعا ىقپال ەتۋى مۇمكىن بىرقاتار تەرىس فاكتورلاردى اتاپ كورسەتتى. نۇرسۇلتان نازارباەۆ ەل ەكونوميكاسىنا ۇلكەن قاۋىپ ءتونىپ تۇرعانىن ەسكەرتتى.

اتالعان كەڭەستىڭ ۆيدەوسى Tengrinews.kz-ءتىڭ Youtube-دەگى كانالىنان الىندى.

“دۇنيە جۇزىندەگى ەكونوميكالىق احۋال وتە ناشار. قازاقستان ساتاتىن مەتاللدىڭ ءبارى 30 پايىزعا تومەندەدى، تەمىر، مىس، قورعاسىن. ونىمەن قويماي،  ءبىزدىڭ سىرتقا شىعارىپ ساتاتىن كورشىلەرىمىز قىتاي، رەسەيدىڭ ساتىپ الۋ قابىلەتى تومەندەپ، ءبىزدىڭ نارىعىمىز قىسقاردى. ەلىمىزدىڭ ەكونوميكاسىن، ءتىپتى تاۋەلسىزدىگىمىزدى ساقتاپ قالۋ ءۇشىن وتە ۇلكەن بەلەستىڭ الدىندا تۇرمىز، شارا قولدانۋىمىز كەرەك”، – دەدى پرەزيدەنت.

ال قارا التىننىڭ قۇنى الداعى 5 جىلدا ءدال وسى دەڭگەيدە ساقتالۋى مۇمكىن، – دەدى ەلباسى. سوندىقتان ۇكىمەت بارىنشا  ءتيىمدى  بيۋدجەتتىك جانە اقشا ساياساتىنا كوشۋى كەرەك جانە  2018 جىلعا دەيىن جاڭادان سالىناتىن قۇرىلىس نىساندارى  توقتاتىلاتىن بولدى.

كەڭەس بارىسىندا قارجى ءمينيسترى ب.سۇلتانوۆ بيۋدجەتكە تۇسىمدەردىڭ ايتارلىقتاي ازايىپ كەتكەنىنە توقتالدى. "يمپورت كولەمى 38 پايىزعا تومەندەپ، سونىڭ سالدارىنان كەدەندىك باج سالىعىنان تۇسەتىن تۇسىمدەر ەكى ەسە ازايدى. مۇناي باعاسى ەكى ەسە ارزاندادى، سوعان بايلانىستى ەكسپورتتىڭ كەدەندىك باج سالىعى تۇسىمدەرى ۇشتەن ءبىر  مولشەرگە ازايدى. ناتيجەسىندە بيۋدجەتتىڭ كىرىسى 22 پايىزعا تومەندەدى.  بۇل رەتتە بىلتىرعى وسى كەزەڭمەن سالىستىرعاندا شىعىستاردىڭ ءوسۋ قارقىنىن ەڭ الدىمەن ۇلتتىق قوردان الىنعان كەپىلدەندىرىلگەن ترانسفەرتتەر ەسەبىنەن 103,4 پايىز دەڭگەيىندە ۇستاپ تۇرۋدىڭ ءساتى ءتۇستى", – دەدى ب.سۇلتانوۆ.

پرەزيدەنت  رەسپۋبليكالىق بيۋدجەت تاپشىلىعىن  ىشكى رەزەرۆتىڭ ەسەبىنەن 1 پايىزعا تومەندەتۋدى تاپسىردى. سونداي-اق بۇل داعدارىس قازاقستانداعى بۇكىل ونەركاسىپكە كەرى اسەر ەتەدى، بۇرىن-سوڭدى مۇنداي قيىندىق بولماعانىن ايتقان نازارباەۆ ءاربىر ءمينيستردىڭ جۇمىسىن جەكە باقىلاۋدا ۇستايتىنىن دا ەسكەرتتى.

Abai.kz