«بوردو» مەن «قايرات» اراسىنداعى ماتچ ەكى ەل كلۋبتارىنىڭ العاشقى كەزدەسۋى بولماق. فرانتسيا ءبىزدىڭ فۋتبولشىلارىمىز ەۋروكۋبوك شەڭبەرىندە كەزدەسكەن ۋەفا-نىڭ 38-ءشى ەلى بولعالى وتىر. فرانتسيا جانە قازاقستان فۋتبول كلۋبتارى بيىلعا دەيىن ەۋروكۋبوك اياسىندا كەزدەسپەگەن بولاتىن. بۇل تۋرالى sport.kz جازدى.

21 تامىزعا قاراعان ءتۇنى الماتىلىق "قايرات" كلۋبى ەۋروپا ليگاسىنىڭ پلەي-وفف كەزەڭىندە فرانتسيانىڭ "بوردو" كومانداسىنا قارسى العاشقى ماتچ وتكىزەدى. ەكى كوماندا اراسىنداعى كەزدەسۋ بوردونىڭ "ستاد بوردو-اتلانتيك" ستاديونىندا استانا ۋاقىتى بويىنشا ساعات 00.30-دا باستالادى. ماتچتى "قازاقستان" ارناسى تىكەلەي ەفيردە تاراتادى. 

ايتا كەتەيىك، قازاقستاندىق كلۋبتار ازىرگە ازەربايجان، انگليا، اندوررا، گيبرالتار، يتاليا، ليحتەنشتەين، ليۋكسەمبۋرگ، ماكەدونيا، مالتا، پورتۋگاليا، سان-مارينو، سولتۇستىك يرلانديا، ۋەلس، فارەر ارالدارى جانە چەرنوگوريا فۋتبولشىلارىمەن الاڭدا بىرگە دوپ تەۋىپ كورگەن جوق.

ەستەرىڭىزگە سالا كەتەر بولساق، فۋتبولدان ۋەفا چەمپيوندار ليگاسىنىڭ سوڭعى ىرىكتەۋ كەزەڭىندە «استانا» كيپردەن كەلگەن اپوەل كومانداسىن قابىلداپ، 1:0 ەسەبىمەن جەڭىسكە جەتتى. كەزدەسۋدىڭ 14-مينۋتىندا سول قاپتالداعى فوكسي كەتەۆومانىڭ اۋەلەتىپ بەرگەن دوبىنا ءبىرىنشى جەتكەن باۋىرجان جولشيەۆ ەسەپتى اشتى. 18 تامىزداعى ويىنعا «استانا» - اپوەل ماتچى كەزىندە ەۋروكۋبوك سىنىنا قازاقستاندىق كوماندالاردىڭ ءوز الاڭىندا وتكىزگەن كەزدەسۋلەرىندە بۇرىن-سوڭدى بولماعان كەلۋشىلەر سانىنىڭ جاڭا رەكوردى تىركەلدى. ماتچ كەزىندە «استانا ارەنا» ستاديونىنا 30 000 جانكۇيەر جينالدى.

اباي-اقپارات