الماتى قالاسى بويىنشا «ميگ» اقشا ايىرباستاۋ جەلىسىندە ساعات 11:30-داعى دوللار باعاسى تەڭگەگە شاققاندا 190,5 تەڭگەدەن ساتىلىپ جاتتى. كوپ ۇزاماي بۇل باعام 197,5 تەڭگەگە بىراق كوتەرىلدى. ال الەۋمەتتىك جەلىلەردە دوللاردىڭ 196 تەڭگەدەن، ءتىپتى 198 تەڭگەدەن ساتىلىپ جاتقانى تۋرالى ايتىلۋدا.

«Facebook» جەلىسىندە Denis Krivosheyev ەسىمدى قولدانۋشى «ككب - كۋرس 198 تەنگە زا دوللار» دەپ جازسا، Abildin Erkebulan  ەسىمدى قولدانۋشى «دوللار باعاسى وزگەردى. ساتىپ الۋ - 194; ساتۋ - 196. نە ايتاسىزدار، تاعى وسەدى مە ەكەن؟»، - دەپ سۇراۋ تاستادى.

اقشا ايىرباستاۋ پۋنكتتەرىندەگى باعامداردىڭ كورسەتكىشتەرىن جاريالاپ وتىراتىن kurs.kz سايتىندا اقشا ايىرباۋستاۋ پۋنكتتەرىنىڭ دەنىندە دوللار باعامىنىڭ كوتەرىلگەنىن كورۋگە بولادى. دوللاردىڭ ساتىلۋى 189 تەڭگە دەپ كورسەتىلگەن بىرنەشە اقشا ايىرباستاۋ ورنىنا Abai.kz ءتىلشىسى قوڭىراۋ شالىپ كوردى. ولار وكىنىشكە وراي وزدەرىندە دوللار جوق ەكەنىن ايتتى.

ەستەرىڭىزگە سالساق، كەشە عانا باس بانكير كەلىمبەتوۆ مەملەكەت باسشىسىنىڭ قابىلداۋىندا بولىپ, ينفلياتسيانىڭ تۇراقتى ەكەنىن اتاپ وتكەن بولاتىن.  

ايتا كەتەر بولساق، مۇناي باعاسى ارزانداۋىن جالعاستىرۋدا، كەشە عانا Brent-ءتىڭ قۇنى باررەلىنە $48,55-گە تومەندەدى. سونداي-اق، قازاقستانمەن ساۋدا قاتىناسىنداعى قىتايدا سوڭعى 20 جىل ىشىندەگى ەڭ اۋقىمدى دەۆالۆاتسيا بولدى. ءبىر اپتا بۇرىن قىتايدىڭ حالىق بانكى ءيۋاندى 1,9 پايىزعا قۇنسىزداندىردى. تۇركيانىڭ ورتالىق بانكى دە ليرانىڭ دوللارعا شاققانداعى باعامىن 10 پايىزعا قۇنسىزداندىرىپ، ءبىر دوللاردىڭ 2,65 ليرا باعامىنان، 2,90-عا دەيىن كوتەردى. تۇركياداعى اقشا ايىرباستاۋ ورىندارىندا ءبىر دوللار 3 ليرادان ساتىلىپ جاتىر. رەسەي رۋبل دە كۇن ساناپ قۇنسىزدانۋدا. بۇگىنگى رەسمي باعام بويىنشا ₽65,8289 بولدى.

Abai.kz