بۇعان دەيىن جازعانىمىزداي، ايدىڭ باسىندا اقتولقىن جانىبەكوۆا ەسىمدى جاس انانى قوستانايلىق جولپول جول ەرەجەسىن بۇزعانىنا بايلانىستى توقتاتىپ، ەرەجە بۇزۋى تۋرالى حاتتامانى اقتولقىننىڭ ەركىنسىز ورىس تىلىندە تولتىرعان. ازاماتتىق قۇقىعى بويىنشا حاتتامانى قازاق تىلىندە تولتىرعىسى كەلگەن جانىبەكوۆانى دوسمايلوۆ ەسىمدى جولپول «قازاقشانى ءوز ەلىڭدە، اۋىلىڭدا جازاسىڭ» دەپ قورلاعان. بۇل ءوز كەزەگىندە قوعام نارازىلىعىن تۋدىرىپ ەدى.  وسى ماسەلە العاشقىندا  "قوستاناي تاڭى" گازەتىنەن باستاۋ الىپ، Abai.kz, «قازاق ءۇنى» پورتالدارىندا جالعاسىن تاپقان بولاتىن.

اتالعان ىسكە بايلانىستى 20 شىلدەدە اكىمشىلىك سوت ءوتۋى ءتيىس ەدى. الايدا سوت بۇگىنگە شەگەرىلگەن بولاتىن. سوت قارساڭىندا اتالعان ماسەلەگە بىرقاتار قوعامدىق تۇلعالار دا ۇلكەن الاڭداۋشىلىق ءبىلدىردى. ءتىلشىنىڭ قوڭىراۋىنا جاۋاپ بەرگەن اقتولىقىننىڭ ايتۋىنشا، رۋزا بەيسەنبايتەگى ىلعي دا قوڭىراۋ شالىپ، وعان قولداۋ ءبىلدىرىپ وتىرعان.  بەيسەنبايتەگى الەۋمەتتىك جەلىدە دە قازاق ءتىلىن سىيلامايتىن پوليتسەيگە قوعام نازارىن اۋدارۋعا شاقىردى. اقىن، قۋانىش مۇقاتاي بۇگىن، ءوزىنىڭ الەۋمەتتىك جەلىدەگى پاراعىندا: «جاڭا عانا مەنىڭ ۇيالى تەلەفونىما قوستاناي قالاسىنان اقتولقىن جانىبەكوۆا قوڭىراۋ سوقتى. "قۋانىش اعا! سوتتىڭ الدىندا تۇرمىز. سەرجانت داۋلەت دوسمايلوۆ ءوزىنىڭ ءىسىن دۇرىس دەپ تاۋىپ، بار جالانى مەنىڭ وزىمە جابايىن دەپ تۇرعان سىڭايلى. "موينىما ەشتەڭەنى دە المايمىن" دەپ بەت باقتىرار ەمەس. "سوتتا مەن جەڭىلسەم قايتەر دەيسىز، سوتتا قازاقتىڭ ءتىلى جەڭىلىپ قالايىن دەپ تۇر عوي، اعاتاي-اي!!!" - دەپ اقتولقىن قارىنداسىم جىلاپ جىبەردى...»، - دەپ سوت وتەر ۋاقىتتان بىرنەشە ساعات بۇرىن جازدى. ول، سالدەن سوڭ سوتتىڭ جولپول قىزمەتكەرلەرى كەلمەگەندىكتەن ساعات 15.00 مين. شەگەرىلگەنى تۋرالى دا حابارلادى.  

"قوستاناي تاڭى" گازەتى جاڭا عانا جاريالاعان ماتەريالىندا اقتولقىن رەداكتسياعا شاعىم ايتىپ كەلگەندە وبلىستىق ءىىد باستىعى ت.ماتكەنوۆكە رەداكتسيا اتىنان حات جولدانعان حاتقا جاۋاپ العانىن جازدى. وندا، «د.دوسمايلوۆتىڭ بۇل ارەكەتى قانشالىقتى زاڭدى؟ حاتتامالار تەك ورىس تىلىندە تولتىرىلۋى مىندەتتى مە؟» دەگەن گازەتتىڭ رەسمي سۇراۋى جىبەرىلگەن. رەسمي جاۋاپتا د.دوسمايلوۆ اكىمشىلىك قۇقىق بۇزۋشىلىق جونىندەگى ءىستى جۇرگىزۋ ءتىلىن ناقتى بەلگىلەمەي، زاڭدىلىق تالاپتارىن بۇزعانى ءۇشىن تارتىپتىك شارا قولدانىلعانى جازىلىپتى. 

ال، ساعات 15:00-گە بەلگىلەنگەن سوت تۋرالى اقىن، قۋانىش مۇقاتاي پاراقشاسىندا تومەندەگىدەي جازبا جاريالادى: "قوستانايداعى ماماندىرىلعان سوتتا جابىرلەنۋشى اقتولقىن جانىبەكوۆا مەن جابىرلەۋشى ماي قىزمەتكەرى داۋلەت دوسمايلوۆتىڭ ءىسى قارالدى. سوت ايتكۋجينوۆ ازامات مۋراتوۆيچ جابىرلەنۋشىنىڭ ارىزى قاناعاتتاندىرىلمايدى دەگەن ۇكىم شىعاردى!

سوتقا ازەر دەگەندە كەلگەن سەرجانت د.دوسمايلوۆ سوتتا ورىس تىلىندە جاۋاپ بەردى.   جابىرلەنۋشى ا. جانىبەكوۆانىڭ تالابىنان كەيىن ءوزى دە قازاقشا ەكى ءسوزدىڭ باسىن ازەر قوسىپ وتىرعان سوت ايتكۋجينوۆ ازامات مۋراتوۆيچتىڭ   امالسىزدان جاساعان  «قازاقشا سويلەسىڭىز» دەگەن ەسكەرتپەسىنەن كەيىن، ءبىر-ەكى اۋىز عانا قازاقشا بىردەڭە دەپ مۇرنىنىڭ استىنان مىڭعىرلاپ، سوتتان شىعىپ كەتتى. اقتولقىن سوتتا ىركىلمەستەن ءوزىنىڭ قىزىل باعدارشامعا ءوتىپ كەتكەنىن مويىنداعانىن ايتا كەلە: «ماعان جابىرلەۋشى جاقتىڭ ەشتەمەسى كەرەك ەمەس، تەك قانا داۋلەت دوسمايلوۆ ءوزىنىڭ قازاق ءتىلىن قورلاپ، ماعان دورەكىلىك كورسەتكەنى ءۇشىن كەشىرىم سۇراسىن» دەگەن ەكەن، سوت ونىڭ سوزىنە ەشقانداي ءمان بەرمەپتى… ال د.دوسمايلوۆ كىناسىن مويىنداماق تۇگىلى، قاسىنداعى پوليتسيا قىزمەتكەرىمەن اقتولقىندى مازاقتاپ، ىرجالاڭداپ تۇرىپتى فورما كيىپ كەلگەنىنە قاراماي.
سونىمەن، قوستانايدا قازاق ءتىلىن قورلاۋ ەندى سوت شەشىمىمەن جالعاستى!…"

اقتولقىننىڭ "سوتتا قازاق ءتىلى جەڭىلىپ قالايىن دەپ تۇر عوي، اعاتاي!" دەپ شىرىلداعانى ايداي كەلدى. قازاق ءتىلىنىڭ عانا ەمەس وسى تىلدە سويلەيتىن بارشا ادامنىڭ نامىسى قوسا قۇلادى...

Abai.kz