قازاقستان حالىقارالىق “ەكسپو-2017″ كورمەسىن وتكىزۋ بارىسىندا دەمەۋشىلىكتەن، بيلەت ساتۋدان، تاماقتاندىرۋدان، قىزمەتتەر كورسەتۋدەن 330 ملن ەۆروعا جۋىق كىرىس الۋدى كوزدەپ وتىر. قازاقپاراتتىڭ مالىمدەۋىنشە، بۇل تۋرالى ەلباسى «ەكسپو-2017» مامانداندىرىلعان كورمەسىن وتكىزۋگە دايىندىق بارىسى جونىندەگى كەڭەستە جاريا ەتكەن.

“جاريا ەتىلگەن تىركەۋ دوسەسىنە سايكەس، ءبىز دەمەۋشىلىكتەن، بيلەت ساتۋدان، تاماقتاندىرۋدان، قىزمەتتەر كورسەتۋدەن 330 ملن ەۆروعا جۋىق كىرىس الۋدى كوزدەپ وتىرمىز. بۇل رەتتە جاھاندىق دەمەۋشىلەرمەن ارادا كەلىسىمدەرگە قول قويۋ «ەكسپو-2017» كورمەسىنىڭ كىرىستىلىگى ماسەلەسىن وڭ شەشۋ ءۇشىن باستى ماسەلە بولىپ سانالادى. دوسە جوسپارى بويىنشا، ءبىز تەك دەمەۋشىلىكتەن، سونىڭ ىشىندە «ەكسپو»-نىڭ جاھاندىق 8 سەرىكتەسىن تارتۋدان 200 ملن ەۆرودان استام قاراجات تابۋعا ءتيىسپىز، – دەگەن ءوز سوزىندە نۇرسۇلتان نازارباەۆ.

سونداي-اق پرەزيدەنت، ەلىمىزدىڭ حالىقارالىق ءيميدجى ماڭىزدى ماسەلە بولىپ سانالاتىنىن دا اتاپ وتكەن:

“وتە از ۋاقىت قالدى. بارلىق مەملەكەتتىك ورگاندار بەلسەنە، كەلىسە وتىرىپ جۇمىس ىستەۋى كەرەك. ۇكىمەتكە جانە كەڭەسكە قاتىسۋشىلاردىڭ بارلىعىنا العا قويىلعان مىندەتتەردىڭ ورىندالۋىن قامتاماسىز ەتۋدى تاپسىرامىن. كورمەنى لايىقتى دەڭگەيدە وتكىزۋ كەرەك. بۇل ءبىزدىڭ قولىمىزدان كەلەتىنىن بىلەمىن. بۇگىندە جاعداي جەڭىل ەمەس، ءبىز ۇلتتىق قوردان قاراجات ءبولىپ وتىرمىز، ءار تەڭگەنى ءتيىمدى جۇمساۋ قاجەت. سوندىقتان ەلىمىزدىڭ يگىلىگى ءۇشىن بىرلەسە جۇمىس جۇرگىزگەن ءجون”، – دەدى پرەزيدەنت.

ونىڭ ايتۋىنشا، حالىقتى جايعاستىرۋ ورىندارىن، كولىكتى، لوگيستيكانى، جول بويى ينفراقۇرىلىمىن دامىتۋدى قامتيتىن وڭىرلىك تۋريستىك باعدارلاردى ناقتىلاعان ءجون. تۋريستەردىڭ ءارتۇرلى باعىتتار بويىنشا قازاقستاننىڭ وزگە دە وڭىرلەرىنە بارۋ مۇمكىندىكتەرىن الدىن الا ويلاستىرۋ كەرەك. «سامۇرىق-قازىنا» ۇلتتىق ءال-اۋقات قورىنا «ەير استانا» جانە «قازاقستان تەمىر جولى» كومپانيالارىمەن بىرلەسىپ، ۇشاق جانە تەمىرجول بيلەتتەرىنىڭ كورمەگە تەگىن بارۋ قۇقىعىن قامتۋى ماسەلەسىن پىسىقتاۋدى، مۇنداي جۇمىستى وزگە دە اۆياكومپانيالارمەن جۇرگىزگەن ءجون ەكەنىن اتاپ ءوتتى.

بۇدان بولەك، كەڭەستە نۇرسۇلتان نازارباەۆ كومپانيانىڭ سالىنىپ جاتقان «Mega» اتتى ساۋدا-ساۋىق كەشەنىن «جىبەك جولى» (Silk Way) دەپ اتاۋدى ۇسىنعان.

اباي-اقپارات