سيرياعا «جيھادقا» كەتتى دەلىنگەن ورالدا تۋىپ-وسكەن بۇرىنعى فۋتبولشىنىڭ اناسى «ازاتتىق راديوسىنا» جالعىز ۇلىنان ايرىلۋدىڭ قانشالىقتى قيىن ەكەنىن جەتكىزدى.

ورال قالاسىنىڭ ءبىر شەتىندەگى "جۇلدىز" ىقشاماۋدانىندا تۇراتىن ايناش تورەەۆا ءوزىنىڭ ۇلى، ورالداعى «جاستار» فۋتبول كلۋبىنىڭ بۇرىنعى قورعاۋشىسى، 27 جاستاعى تالعات تورەەۆ تۋرالى ايتتى. تالعات 2013 جىلى ايەلىمەن جانە كىشكەنتاي قىزىمەن سيرياعا كەتكەن. ەكى جىلدان سوڭ كەلىنى ەنەسىنە WhatsApp ءموبيلدى قوسىمشاسى ارقىلى تالعات وتىرعان اۆتوكولىكتىڭ اۆياسوققىدان جارىلعانىن، ونىڭ وپات بولعانىن حابارلاعان. سودان بەرى كەلىنى بايلانىسقا شىقپاعان.

تالعات سپورتتاعى العاشقى قادامىن «جايىق» فۋتبول كومانداسىندا ويناپ باستايدى. كەيىن «جاستار» كومانداسىنا وتەدى. ول وقۋشى كەزىندە ءارتۇرلى رەسپۋبليكالىق جارىستارعا قاتىسىپ ءجۇرىپ، ەلدى شارلاپ شىعادى. 2005 جىلى تالعات مەكتەپ ءبىتىرىپ، جاڭگىر حان اتىنداعى باتىس قازاقستان اگروتەحنيكالىق ۋنيۆەرسيتەتىنە «ماشينا قۇرىلىسى» ماماندىعىنا گرانتقا وقۋعا تۇسەدى. بىراق فۋتبول مەن وقۋدى قاتار الىپ ءجۇرۋ قيىنعا تۇسەدى. تالعات ەكىنشى كۋرستا وقۋىن تاستاپ، فۋتبولدى تاڭدايدى. 2009 جىلى تالعات تورەەۆ قازاقستاننىڭ پرەمەر-ليگا چەمپيوناتىندا ويناۋ ءۇشىن تەكسەرىستەن وتە الماي، فۋتبولدان كەتەدى.

وسىدان سوڭ تالعاتتىڭ بىردەن ەڭسەسى ءتۇسىپ، ءارتۇرلى سالالاردا جۇمىس ىستەپ كورۋگە تىرىسادى. كەيىن تالعات اناسىنا ناماز وقۋعا نيەتتى ەكەنىن ايتادى. ولار ورال قالاسى سىرتىنداعى ۇيلەرىن سالىپ جاتقاندا اناسى مەن ۇلى پاتەر جالداپ تۇرعان. ايناشتىڭ ايتۋىنشا، تالعات وسى ۋاقىتتا ۇيگە كەلۋىن سيرەتىپ، "مەشىتكە بارامىن" دەپ جۇرگەن ەكەن. ول، ءبىراز ۋاقىتتان سوڭ ساقالىن وسىرەدى. اناسىنىڭ سوزىنشە، 2010 جىلدان باستاپ تالعات ۇيدە دايىندالعان استى ىشپەيتىن بولعان. مال باۋىزداعان كەزدە ۇلى ونى مىندەتتى تۇردە ءوزىنىڭ تانىسى سويۋىن تالاپ ەتىپ، قۇرباندىق شالۋدا دۇعا وقىلۋى قاجەت دەگەن.   ​تالعات باسقالارعا: "سىزدەر ناماز وقىمايسىزدار، سوندىقتان تازا ەمەسسىزدەر" دەپ تۇسىنىك بەرەتىن بولعان. اناسىنىڭ ايتۋىنشا، ول جەرگىلىكتى مەشىتتەگى يمام مەن ۇلتتىق قاۋىپسىزدىك كوميتەتىنىڭ (ۇقك) جەرگىلىكتى دەپارتامەنتى مەن ءدىن ىستەرى جونىندەگى كوميتەتتىڭ دەپارتامەنتىنە كومەك سۇراپ بارادى.

 تالعاتتى ءدىن ىستەرى جونىندەگى دەپارتامەنتكە اپارعان كەزدە ونىمەن سويلەسكەن ماماندار تالعاتتىڭ اناسىن "الاڭداماڭىز، ۇلىڭىز دۇرىس جولدا" دەپ شىعارىپ سالادى. بىراق وبلىستىڭ باس يمامىمەن سويلەسۋگە تالعات بارماعان. ۇقك  تالعاتتى باقىلايتىنىن ايتقان. 2011 جىلدىڭ جەلتوقسانىندا تالعات وبلىستىڭ تەرەكتى اۋدانىنىڭ تۋماسى – مارياعا ۇيلەنەدى. تالعات اناسىنا بىردەن ۇيلەنۋ تويى بولمايتىنىن ايتادى. ءبىراز ۋاقىتتان سوڭ كەلىنى قىمتانىپ ورامال تاعىپ جۇرەدى. وعان قوسا سىرتقا شىققان كەزدە مەديتسينالىق بەتپەردە كيىپ الادى. ارادا جىل ءوتىپ تالعات پەن ماريانىڭ تۇڭعىشى سوفيا ومىرگە كەلەدى.  

الايدا كۇن وتكەن سايىن اناسى مەن ۇلىنىڭ اراسىندا قايشىلىق ۇلعايا بەرەدى. تالعات قوناق كەلگەندە ايەلىن كوپ الدىنا شىعارمايتىنىن ايتادى دا، ايناشتىڭ كەلىنى جابىق بولمەدە قىزىمەن جالعىز وتىراتىندى داعىدعا اينالدىرادى. ء ارتۇرلى سىلتاۋمەن ۇلى وتباسىن الىپ، بىرنەشە رەت بولەك شىعىپ، پاتەردە تۇرادى. قارجىلىق قيىندىق تۋعاندا قايتادان اناسىنا كەلەدى. 2013 جىلدىڭ شىلدەسىندە تالعات ايەلى جانە قىزىن الىپ ۇيىنەن ءبىرجولا كەتەدى. سول جىلى ۇقك ايناش تورەەۆاعا ۇلىنىڭ بالا-شاعاسىمەن سيرياعا كەتكەنىن حابارلايدى.   

تالعاتتىڭ اناسىنىڭ ايتۋىنشا، ۇلى العاشىندا بەس اي حابارسىز كەتكەن. كەيىن كەلىنى وعان WhatsApp ارقىلى تۇركيادا ەكەندەرىن جازادى. 2014 جىلى قاڭتاردىڭ 20-سىندا ماريا سيريامەن شەكارادان وتكەندەرىن، ەندى ەلگە ورالمايتىندارىن ايتىپ حات جازادى. سول جاقتا جۇمىس ىستەيمىز دەگەن. بىراق قانداي جۇمىس ەكەنىن اشىپ ايتپاعان. بيىل 12 مامىردا ماريا ەنەسىنە تالعاتتىڭ قازا تاپقانىن، كۇيەۋىنىڭ دەنەسىن كورگەنىن ايتىپ حات جازادى.

ۇلىنىڭ قيىرداعى سوعىسقا كەتۋىن اناسى تالعاتتىڭ فۋتبولداعى ساتسىزدىگىنە كۇيزەلگەندىگىمەن جانە جۇمىسقا تۇرۋ ماسەلەسىن شەشە الماي كەتكەندىگىمەن بايلانىستىردى. ول ءبىر جاعى "بالامنىڭ تاربيەسىندە قاتالداۋ بولۋىم كەرەك پە ەدى" دەپ ءوزىن-ءوزى كىنالايدى. ايناش ۇقك-گە دە ءۇمىت ارتقان.

 - ەگەر ماعان ۇقك ۇلىمنىڭ سول جاققا كەتۋى مۇمكىن ەكەنىن سەزدىرتكەندە، ونى ەلدەن شىعارماۋ ءۇشىن ايانىپ قالماس ەدىم عوي. مىسالى، شەتەلگە شىعۋعا تىيىم سالاتىن ەدىم. مەملەكەت وكىلدەرىنىڭ ەشبىرى ماعان كومەكتەسە المادى. ۇقك ول جاققا كىمدەردىڭ كەتكەلى جۇرگەنىن بىلەدى عوي. نەگە ولار وسىنداي جاعدايلاردىڭ الدىن المايدى؟ ولارعا ايىپتى بولسا، ۇلىمدى تۇرمەگە وتىرعىزىڭدار دەپ ايتتىم. تىم قۇرىعاندا، امان-ساۋ بولاتىن ەدى جانە وسى ەلدە قالاتىن ەدى، - دەيدى ايناش تورەەۆا.

ول ءبىر اي بويى ۇلىن جوقتاپ كۇيزەلگەن. بەرتىن حاتىم ءتۇسىرىپ اسىن بەرگەن. ەندى ايناشتىڭ ءوزى كەلىنىنىڭ 87 جاستاعى جالعىز قارت تۋىسىن كۇتىمگە العان. تالعاتتىڭ اناسى كۇن سايىن ەڭ قۇرىعاندا كەلىنى مەن نەمەرەسىنىڭ امان-ساۋ ەلگە ورلاۋىن تىلەپ وتىر.

ۇقك-ءنىڭ جەرگىلىكتى وكىلى ازاتتىققا تالعات تورەەۆتىڭ قازاسى تۋرالى اقپاراتتى راستاۋ نەمەسە تەرىستەۋ تۋرالى مالىمەت بەرمەپتى. كوميتەت تالعاتتىڭ جەسىرى مەن قىزىنىڭ تاعدىرى جايلى دا اقپارات بەرۋدەن باس تارتقان.

اباي-اقپارات