جۋىردا ەلەكتروندى اقپارات قۇرالدارىندا «حاليال پروستيتۋتسيا» دەگەن اتاۋمەن ماقالا جاريالاندى. بۇل قوعامدا كەڭىنەن تالقىلانىپ، مۇسىلمان جاماعاتىنىڭ نارازىلىعىن تۋدىردى.

ءدىني باسقارماعا ەلىمىزدىڭ ءار ايماعىنان مەشىت جاماعاتىنان باستاپ، قاراپايىم حالىققا دەيىن «وسىنداي دورەكە ارەكەتتەردى تىيۋدىڭ جولى بار ما؟» دەگەن مازمۇندا ءوتىنىش حاتتار مەن ۇسىنىستار كەلىپ تۇسۋدە.

دىنىمىزدەگى قاسيەتتى ۇعىم سانالاتىن «حالال» ءسوزىن جەزوكشەلىكپەن بايلانىستىرۋدىڭ ءوزى – ۇلكەن قاتەلىك. ەكەۋى مۇلدەم ەكى بولەك ۇعىم. اتى جامان ءسوزدى قاسيەتتى ۇعىممەن بايلانىستىرىپ، «حالال» دەگەن اتاۋدى جيىركەنىشتى ارەكەتپەن بىلعاۋ دۇرىس ەمەس.

بۇقارالىق اقپارات قۇرالدارىندا قىزمەت ەتەتىن باۋىرلارىمدى، اپكە-قارىنداستارىمدى ءسوز جاۋاپكەرشىلىگىن سەزىنۋىن سۇرايمىز. ءاربىر ايتىلعان سوزگە جاۋاپتى ەكەنىمىزدى ۇمىتپاساق ەكەن. بىرەۋگە قىمبات، قاستەرلى، قۇندى بولعان سەزىمدەر مەن قۇندىلىقتاردى قورلاساق، ءتۇپتىڭ تۇبىندە ءوز-ءوزىمىزدى، ءوز ءدىنىمىز بەن سەنىمىمىزدى قورلانۋىمەن بەتپە-بەت كەلەتىنىمىز اقيقات.

حالقىمىز ءسوزدى، ءسوز ونەرىن جوعارى باعالاعان. ءسوزدى كيەلى دەپ تۇسىنگەن. قاريالارىمىز: «الدەنە تۋرالى جاقسى ايتساڭ دا، جامان ايتساڭ دا، ايتقانىڭ اينالىپ كەلىپ، ءوزىڭدى تابادى»، – دەگەن. ون بالەنىڭ توعىزى تىلدەن كەلەدى دەگەن ءسوز دە بەكەر ايتىلماسا كەرەك. سول ءۇشىن دە اتا-بابالارىمىز: «تىزەمنەن سۇرىندىرسەڭ دە دە، تىلىمنەن سۇرىندىرە كورمە»، – دەپ دۇعا جاساعان.   

ەشكىم وزىنە، سەزىمىنە، سەنىمىنە، دىنىنە، اتا-اناسىنا، باۋىرلارىنا، وتباسىنا جاماندىق جاسالعانىن قالامايدى. ولاي بولسا، وزىمىزگە قالاماعان نارسەنى وزگەگە جاساۋىمىز – ادامگەرشىلىككە دە، ارىمىزعا دا جات امال. پايعامبارىمىز (اللانىڭ وعان سالاۋاتى مەن سالەمى بولسىن) وزدەرىڭە قالاعان نارسەنە وزگەگە قالامايىنشا، تولىققاندى يمان كەلتىرگەن بولا المايسىڭدار دەگەن.  

ماقالادا ءبىر مۇسىلمان قارىنداسىمىزدىڭ بىرنەشە رەت تۇرمىس قۇرعانى ايتىلادى. بۇل – ادامي فاكتور. ءبىر ادامنىڭ تاعدىرى ارقىلى بۇكىل قوعامعا نەمەسە مۇسىلمان جاماعاتىنا باعا بەرۋگە استە بولمايدى.

راس، قوعامدا مۇنداي پروبلەما جوق ەمەس، بار. ءدىندى بىلىممەن ەمەس، سەزىممەن تۇسىنگەن، ەموتسيامەن، قۇرعاق ۋاعىزبەن قابىلدايتىن جاندار بارشىلىق. عالامتوردا شىققان وسى ماقالاعا ءبىر وقىرمان: «ە-ە-ە-ح، يسلام! سەنى ۇستاناتىندار سەنىڭ ابىرويىڭدى توكپەدى مە؟» دەپ پىكىر ءبىلدىرىپتى. راس ايتىپتى. دىنگە دايىندىقسىز، تاياز بىلىممەن نەمەسە بىرەۋدىڭ قۇرعاق ۋاعىزىمەن كەلەتىن كەيبىر باۋىرلارىمىزدىڭ وسىنداي ارەكەتتەرى ءوزى ۇستاناتىن ءدىننىڭ ابىرويىنا نۇقسان كەلتىرىپ جاتىر.

ءبىزدىڭ ايتقىمىز كەلگەن نارسە: ماسەلە، دىندە ەمەس، ونى ۇستانعان پەندەدە. ادامنىڭ پەندەلىك امالدارى، كەمشىلىك-قاتەلىكتەرى نەمەسە ازعىندىققا جول بەرگەن ساناسى مەن ارەكەتى ءۇشىن يسلام استە جازىقتى ەمەس.

وتباسى جاۋاپكەرشىلىگىنە نەمقۇرايلى قارايتىن باۋىرلارىمدى «تالاق» بەرۋدىڭ شاريعاتتاعى ۇكىمدەرىن تەرەڭ تۇسىنۋگە شاقىرامىن. ومىرلىك جار ەتىپ العان قىز-كەلىنشەك ەر ادامعا امانات ەتىپ تاپسىرىلادى. اماناتقا قيانات جاساماۋىمىز كەرەك. ءوزىمىزدىڭ اپكە-قارىنداسىمىزدىڭ تۇرمىسى تۇراقتاماي، قايتا-قايتا ۇيلەنىپ، اجىراسا بەرۋىن قالايمىز با؟ ارينە، جوق. ولاي بولسا، بىرەۋدىڭ قىزىنا دا وسى كوزقاراس تۇرعىسىنان قاراۋىمىز قاجەت.

مۇحاممەد پايعامبارىمىز (اللانىڭ وعان سالاۋاتى مەن سالەمى بولسىن) سوناۋ سەگىزىنشى عاسىردا-اق: «ءجاننات – انالاردىڭ اياعىنىڭ استىندا»، – دەپ ايەل زاتىنا لايىقتى قۇرمەت كورسەتىپ، ولاردى قادىرلەۋدى وسيەت ەتىپ كەتكەن.

ءبىر حاديستە: «ەر كىسى جانۇيانىڭ تاربيەشىسى. سوندىقتان ول جانۇيانىڭ تاربيەسى ءۇشىن جاۋاپتى», – دەگەن. سوندىقتان ەر ادامعا وتباسىن ساقتاپ قالۋدا نەمەسە اجىراسۋعا جول بەرمەۋدە ۇلكەن جاۋاپكەرشىلىك جۇكتەلگەن. ال اجىراسۋ – اللاعا ۇنامسىز امال.       

ءبىر ايەلدىڭ باسىنداعى تۇرمىستىق جاعدايدى، تاعدىرىن نەگىزگە الىپ، قوعامعا «حاليال پروستيتۋتسيا» دەگەن وي، تۇسىنىك تاراتۋ – قالام ۇستاعان قاۋىمنىڭ قاتەلىگى بولدى.

حالقىمىزدا: «تاۋ مەن تاستى سۋ بۇزادى، ادامزاتتى ءسوز بۇزادى»، – دەگەن ناقىل بار. بالا كەزىمىزدە اقساقالدار: «اۋزىڭا ابايلاپ سويلە، ايتپەسە ءسوزدىڭ كيەسى ۇرادى»، – دەپ ەسكەرتىپ وتىرۋشى ەدى. «جاقسى ءسوز – جارىم ىرىس»، – دەگەن قاناتتى ءسوز دە بار. «حاليال پروستيتۋتسيا» دەگەن ماقالا مۇسىلمان جاماعاتىنىڭ اشۋ-ىزاسىن، نارازىلىعىن تۋدىردى. ەلىمىزدىڭ 70 پايىزدان استام تۇرعىنى – مۇسىلماندار. ەندەشە، يسلامدى ۇستاناتىن ءارى ەلىمىزدە سان جاعىنان باسىمدىققا يە مۇسىلمان حالقىمىزدىڭ اسىل قۇندىلىقتارىن، اسىل ءدىنىن قورلاۋعا جول بەرمەۋىمىز كەرەك. 

ومىرزاق قاجى بەكقوجا،

قمدب-نىڭ قاراعاندى وبلىسى بويىنشا وكىل يمامى

Abai.kz