«احمەتوۆ ءىسى» بويىنشا قاراعاندى وبلىستىق سوتىنىڭ وتىرىسىندا پروكۋرورلار ايىپتاۋداعى ەكى باپتى الىپ تاستاپ، ەكس-پرەمەردى دۇنيە-مۇلكىن كامپەسكەلەۋمەن قوسا 12 جىلعا باس بوستاندىعىنان ايىرۋدى سۇرادى. ايتا كەتەلىك، س. احمەتوۆكە «ستال-تسينك» جشس-ءى ەپيزودى بويىنشا باپتى («قىزمەت بابىن اسىرا پايدالاندى» دەگەننىڭ ورنىنا «زاڭسىز كاسىپكەرلىك قىزمەتپەن اينالىسۋ» دەپ وزگەرتىلدى) اۋىستىرعان سوڭ «پارا الدى» دەگەن ايىپ الىنىپ تاستالدى. تاراپتاردىڭ سوڭعى ەپيزود بويىنشا («مەتاللۋرگيا-مەتالل وڭدەۋ» يندۋستريالدىق پاركىندەگى كاناليزاتسيا قۇرىلىسىندا قوندىرعىنى اۋىستىرۋ) ءسوز جارىسى بارىسىندا پروكۋرورلار سوتقا س.احمەتوۆتىڭ پارا العانى جونىندەگى قىلمىستىق ىستە دالەل جوق دەپ مالىمدەدى.

«سوت وتىرىستارى ناتيجەسىندە سوتتالۋشى احمەتوۆتىڭ پارا العانى جونىندەگى كىناسى راستالمادى. قىلمىستىق ىستە سوتتالۋشى ءا.اقمولداەۆتىڭ سوتقا بەرگەن تۇسىنىكتەرىنەن باسقا س.احمەتوۆتىڭ قوسالقى مەردىگەرلىك كەلىسىم-شارتىن جاساۋعا كومەكتەسكەنى ءۇشىن پارا العانىن راستايتىن ناقتى دالەلدەر جوق»، – دەپ مالىمدەدى پروكۋرور راۋان توبىقوۆ. تاعىلعان ايىپتاردى جيناقتاي كەلە، پروكۋرورلار دۇنيە-مۇلكىن كامپەسكەلەۋمەن قوسا سەرىك احمەتوۆتى 12 جىلعا باس بوستاندىعىنان ايىرۋدا سۇرادى. سونىمەن قاتار، ول 5 جىلعا دەيىن جاۋاپتى مەملەكەتتىك قىزمەتكە تاعايىندالا المايدى.  

قىلمىستىق توپتىڭ باسقا مۇشەلەرى 3-تەن 8 جىلعا دەيىن باس بوستاندىعىنان ايىرىلۋى مۇمكىن. ايىپتاۋشى تاراپ قاراعاندى وبلىسىنىڭ بۇرىنعى اكىمى باۋىرجان ابدىشەۆتى 7 جىلعا، قاراعاندى قالاسىنىڭ بۇرىنعى اكىمى مەيرام سماعۇلوۆتى 4 جىلعا تۇرمەگە قاماۋدى تالاپ ەتتى. قاراعاندى وبلىسى اكىمىنىڭ ەكس-ورىنباسارى عابيت مۇحامبەتوۆتى 7 جىلعا باس بوستاندىعىنان ايىرۋ سۇرالدى. قالعاندارىنا سۇرالعان مەرزىم مىناداي: وبلىستىق تۇرعىن ءۇي-كوممۋنالدىق شارۋاشىلىعى، جولاۋشىلار كولىگى جانە اۆتوكولىك جولدارى ءبولىمىنىڭ بۇرىنعى باستىعى مۇحتار ادامبەكوۆكە – 3 جىل، ونىڭ ورىنىن اۋىستىرعان ايدوس جاكەنوۆكە – 3 جىل شارتتى تۇردە، جەر قاتىناستارى ءبولىمىنىڭ ەكس-باسشىسى ەرنار دارىبەكوۆكە – 4 جىل، قالا اكىمىنىڭ ەكس-ورىنباسارى ايدار تەلعارينگە – 4 جىل، قاراعاندىنىڭ بۇرىنعى باس ساۋلەتشىسى قانات مۇساەۆقا – 3 جىلعا شارتتى تۇردە، ساۋلەت جانە قالا قۇرىلىسى ءبولىمىنىڭ ەكس-قىزمەتكەرى باقتىگۇل اسقاروۆا – 2 جىل شارتتى تۇردە.

بۇعان قوسا پروكۋرورلار تۇرعىن ءۇي-كوممۋنالدىق شارۋاشىلىعى، جولاۋشىلار كولىگى جانە اۆتوكولىك جولدارى ءبولىمىنىڭ بۇرىنعى ءبولىم جەتەكشىسى مارلەن شالتاقوۆتى 3 جىلعا شارتتى تۇردە، «مەتاللۋرگيا-مەتالل وڭدەۋ» يندۋستريالدىق پاركىنىڭ ەكس-ديرەكتورى اناتولي ەسسەنى 8 جىلعا، وسى پاركتىڭ تاعى ءبىر ەكس-باسشىسى بولاتبەك يسكاكوۆتى 4 جىلعا، ونىڭ ورىنباسارى ورازالى ايمەنبەتوۆتى – 4 جىلعا سوتتاۋدى سۇرادى. «قازاگرو» ۇبح» اق-نىڭ ەكس-باسقارما باسشىسى دۋلات ايتجانوۆ ايىپتاۋشىنىڭ سۇراۋىنشا 4 جىلىن، پرەمەر-مينيستر كەڭسەسى جەتەكشىسىنىڭ بۇرىنعى ورىنباسارى عابيت ماتاەۆ – 3 جىلىن، «سارىارقا» اكك» ۇك» اق-نىڭ اكتيۆتەر دەپارتامەنتى ەكس-باسشىسى ەرلان قيسىقوۆ – 4 جىلىن تەمىر توردىڭ ارعى جاعىندا وتكىزۋى كەرەك. ال ءوز كىناسىن تولىق مويىنداۋ نەگىزىندە سوتقا دەيىنگى كەزەڭدە تەرگەۋشىلەرمەن ىنتىماقتاستىق جاساعانى ءۇشىن پروكۋرورلار «قازاقستان ونەركاسىپتىك كورپوراتسياسى» جشس-ءنىڭ ديرەكتورىنىڭ ەكس-ورىنباسارى ءالجان اقمولداەۆتى، «Sapa Project Group» جانە «Eco-treatment systems» كومپانيالارىنىڭ قوجايىنى دۋمان نۇرباەۆتى، «قازاگروقارجى» اق-نىڭ بۇرىنعى باسقارما باسشىسى عۇمار راقىمجانوۆتى قىلمىستىق جاۋاپكەرشىلىكتەن بوساتتى. يسپاندىق «Rufera Technoagro S.L» كومپانياسىندا مەنەدجەر بولىپ ىستەگەن كاميلا پىراليەۆانى ايىپتاۋشىلار 3 مىڭ ايلىق ەسەپتىك كورسەتكىش كولەمىندە ايىپپۇل تولەۋمەن جازالاۋدى سۇرادى. 2 ملرد-تان استام تەڭگە كولەمىندەگى  شىعىن بارلىق سوتتالۋشىلاردان بىردەي ءوندىرىپ الىنادى.

ءامينا باكىر

Abai.kz