ايتىس ونەرى — قازاقتىڭ قانىنا سىڭگەن بەكزات ونەر. بابالاردان قالعان وسى ونەرگە ەلەڭدەمەيتىن قازاق جوق. ەڭسە تىكتەگەن بالاسىنان ەڭكەيگەن قارياسىنا دەيىن سۋىرىپ سالما اقىنداردى تىڭداۋدان جالىققان ەمەس. توپىراعى كيەلى ارىستا قالالىق ىشكى ساياسات ءبولىمىنىڭ باستاماسىمەن كوپ جىلداردان بەرى ءداستۇرلى تۇردە وبلىستىق جاس اقىندار ايتىسى وتكىزىلىپ كەلەدى.
بۇگىن، ىشكى ساياسات ءبولىمى «جاستار ورتالىعى» مەكەمەسىنىڭ ۇيىمداستىرۋىمەن قالالىق مادەنيەت ۇيىندە «قازاق حاندىعىنا 550 جىل» تاقىرىبىندا وبلىستىق دەڭگەيدە جاس اقىندار ايتىسى ءوتتى.
قالا اكىمىنىڭ ورىنباسارى ب.دىلدابەكوۆ ايتىستى اشىپ، جاس اقىندارعا اق جول تىلەدى. ايتىسقا قالالىق ىشكى ساياسات ءبولىمىنىڭ باسشىسى ا.الىبەك، قازاقستان رەسپۋبليكاسى جۋرناليستەر وداعىنىڭ مۇشەسى، اقىن م.دارمەنوۆ، اقىن-ۇستاز ر.سۇلتاناليەۆا قازىلىق ەتتى.
ايتىسقا قاتىسقان 8 جۇپ، ايتىس سۇيەر قاۋىمنىڭ كوڭىلىنەن شىعىپ، بەلگىلەنگەن تاقىرىپ اياسىندا ءبىر-بىرىنە وتكىر سۇراقتار قويىپ، ۇتىمدى جاۋاپتار قايتارىپ، كورەرمەندەردى جالىقتىرماي جەلپىندىرىپ وتىردى.
ناتيجەسىندە باس جۇلدەنى شىمكەنتتىك اقساقالوۆ داۋرەن قانجىعاسىنا بايلاسا، ءبىرىنشى ورىندى تۇركىستاندىق تۇرار تىلەۋليەۆ، ەكىنشى ورىندى قازىعۇرتتىق قۋاندىق قالىبەكوۆ السا، ءۇشىنشى ورىندى ارىستىق نۇرسۇلتان ماحانوۆ جانە وتىرارلىق داۋرەن پولاتبەكوۆتەر ءوزارا ءبولىستى.
ارىس قالاسى اكىمىنىڭ ارنايى سىيلىعىن تولەبيلىك راحماتۋللاەۆ بەكارىس جەڭىپ الدى، ال، ورداباسىلىق باتاحاەۆا ديانا «ەڭ جاس اقىن» نوميناتسياسىمەن ماراپاتتالدى.
ايتىسقا قاتىسقان جاس اقىنداردىڭ بارلىعى ارىس قالاسىنىڭ اكىمى س.ەرتايدىڭ «العىس حاتىمەن» جانە باعالى سىيلىقتارىنا يە بولدى.