لەنيننىڭ  ەسكەرتكىشىن ورناتۋدى كوزدەگەن كوممۋنيستەر  ەندى ورتاق ۆاليۋتانى جاقتاۋدا!..

وسى قىزىل كوممۋنيستەرگە سەنىپ جۇرگەندەردە دە ەس جوق. ايتپەسە، ءتورت جىل بۇرىن  سايلاۋدا داۋىس بەرەر مە ەدى؟!. ولار ەلىمىز قىزىل كوممۋنيستەر باسقارعان قىزىل يمپەريانىڭ قاندى شەڭگەلىنەن قۇتىلىپ، تاۋەلسىزدىك العانىمىزعا  شيرەك عاسىر وتسە دە، ورمانعا قاراپ ۇلۋىن قويار ەمەس…

وتكەندە عانا قازاقستان حالىقتىق ​كوممۋنيستىك پارتياسى (قحكپ) بولشەۆيكتەر كوسەمى  لەنيننىڭ استاناداعى «گوركومحوز» مەكەمەسىندە جاتقان ەسكەرتكىشىنە استانادان ورىن بەرۋدى سۇراپ، قالا اكىمىنە جىلاپ-ەڭىرەپ حات جازدى.

قحكپ استانا قالالىق بولىمشەسىنىڭ حاتشىسى مارات اۋباكىروۆتىڭ بار قايعىسى –  «كوممۋنيستەر گۇل شوعىن قوياتىن جەر جوق» ەكەن…  اۋ، سوندا، ەلورداداعى ەل ءۇشىن ءومىرىن قيعان ەرلەرىمىزدىڭ ەسكەرتكىشتەرى ولارعا بوتەن بە؟ كەشە عانا 550 جىلدىعىن بۇكىل ەلىمىز بولىپ تويلاعان قازاق مەملەكەتىنىڭ  نەگىزىن سالۋشى كەرەي مەن جانىبەك حانداردىڭ ەسكەرتكىشى  شە؟ ەسىلدىڭ جاعاسىندا ەرلىگىن پاش ەتىپ، قىلىشى جالتىراپ  تۇرعان قاھارلى كەنەسارىنى ايتساق، شوشىپ كەتەر، ۇلى ابايىمىزدىڭ ەسكەرتكىشى شە؟ بۇلار قىزىل كوممۋنيستەرگە وگەي تۇلعالار ما؟..

ء“اندىجاندا ءبىر اپكەم بار، بۇدان دا وتكەن سوراقى”-دەگەندەي، بۇلاردىڭ قارسىلاستارى،  تاعى ءبىر كوممۋنيستەر، ءۇش اي بۇرىن جابىلىپ قالعان وپپوزيتسيالىق قازاقستاننىڭ كوممۋنيستىك پارتياسىنىڭ دا (قكپ), وڭىپ تۇرعانى شامالى ەكەن. ازاتتىق راديوسىنا بەرگەن جاۋابىندا قكپ استانا بولىمشەسىنىڭ توراعاسى نۇرلان اۋەسباەۆ تا وزدەرىنىڭ  لەنيننىڭ ەسكەرتكىشىن استاناعا ورناتۋ ءۇشىن اكىمدىككە تالاي رەت حات جازعانىن ايتادى.  بىراق  ونىڭ بارىنە تەرىس جاۋاپ العاسىن، “تەرىس قاراپ جاتىپ العانىن” ايتىپ زارلاپ وتىر.

كەڭسەسىندە لەنيننىڭ ءبىر ەمەس… ءۇش ءبيۋستىن قۇشاقتاپ، ءتاۋ ەتىپ جۇرگەن وپپوزيتسيالىق كوممۋنيست نۇرلان اۋەسباەۆ تا،  لەنينگە ەلوردادان ورىن ىزدەپ جۇرگەن “حالىقتىق” كوممۋنيست  مارات اۋباكىروۆ تە،  الاش كوسەمى ءاليحان بوكەيحان تۋرالى بىلە مە ەكەن؟!.

2012 جىلى  قازان ايىندا الاشتىڭ 95 جىلدىعىن ەلىمىز بويىنشا اتاپ وتكەن  “اق جول” پارتياسى   
پارلامەنتتە ءاليحان بوكەيحان باستاعان الاش ارىستارىنا ەسكەرتكىش ورناتۋ تۋرالى باستاما كوتەرىپ، ۇكىمەتكە دەپۋتاتتىق ساۋال جولداعان ەدى.  ال بيىلعى 14 قازاندا   ۇكىمەتكە ءاليحان بوكەيحاننىڭ 150 جىلدىعىن لايىقتى دەڭگەيدە وتكىزۋ جونىندەگى مەملەكەتتىك كوميسسيا قۇرۋ قاجەتتىگى تۋرالى دەپۋتاتتىق ساۋال جولداعانى بەلگىلى.

كەشە عانا، 18 قاراشادا  التى الاشقا  قۋانىشتى حابار – الاش كوسەمى ءاليحان بوكەيحاننىڭ 150 جىلدىعىن الەم تويلايتىنى  تۋرالى يۋنەسكو-نىڭ  شەشىمى شىقتى!

ال وسى بۇكىل قازاق قۋانىپ، ءبىر-ءبىرىن قۇتتىقتاپ جاتقان ءسۇيىنىشتى حابارعا  لەنيننەن باسقانى بىلمەيتىن ءبىزدىڭ كوممۋنيستەر  قۋانا قويدى ما ەكەن؟

قازىر  ەلدىڭ ءبارى “اقجولدىڭ” استانادا ءاليحان بوكەيحاننىڭ ەسكەرتكىشىن تۇرعىزۋ تۋرالى  باستاماسىن قولداۋدا.   لەنيننىڭ ەسكەرتكىشىن ەمەس!..

باستاۋىندا لەنين تۇرعان  قىزىل يمپەريا كەڭەس  وداعىنىڭ ء ومىر سۇرگەن 70 جىلىنداعى  قاندى قاسىرەتتەر، 30 جىلدارداعى قازاقتىڭ جارتىسىن ادەيى قاسكويلىكپەن  ۇيىمداستىرعان اشارشىلىقتا قىرعىنعا ۇشىراتۋ، 37-جىلدارداعى زۇلماتتا قازاقتىڭ بار اسىلىنىڭ اتىلۋىن تاريح  قالاي ۇمىتادى!   20-جىلدارداعى قىزىل قىرعىندا قازاقتىڭ قىناداي قىرىلۋىنداعى  لەنيننىڭ باستى ءرولىن باسى بارلار ۇمىتپايدى، كوممۋنيستەر ۇمىتقانمەن…  اتامەكەنىن تاستاپ، جان ساۋعالاپ، قىتايعا  جوسىلا كوشكەن قالىڭ قازاقتى قىزىل ارميا قىزىل قانعا بوكتىرگەنى بەلگىلى. ويتكەنى، بولشەۆيكتەر كوسەمى ۆلاديمير لەنيننىڭ  “شەكارادان وتكىزبەڭدەر… بىراق  قايتارماڭدار دا” دەگەن بۇيرىق بەرگەن حاتى كەزىندە باسپاسوزدە جاريالانعان.

سوندىقتان دا، 2011 جىلى “اق جول” پارتياسىنىڭ توراعاسى ازات پەرۋاشەۆ   وتىزىنشى جىلدارداعى زوبالاڭ اشتىق  پەن زۇلمات رەپرەسسياعا  كوممۋنيستىك پارتيا جاۋاپ بەرۋى كەرەك دەپ مالىمدەمە جاساعان بولاتىن…

 ال ەندى كەشە كوممۋنيستەردەن سايلانعان ءماجىلىس دەپۋتاتى، لەنيننىڭ ناعىز قىزىل جالاۋلى قورعاۋشىسى ايقىن ويراتۇلى قوڭىروۆ رەسەي دۋماسىنىڭ دەپۋتاتى لەونيد سلۋتسكيدىڭ “ورتاق ۆاليۋتاعا كوشۋ كەرەك” دەگەنىنە الاقايلاپ قۋانىپ،  قوس قولىن كوتەرىپ كوسىلا كەتتى.  “ەكونوميكالىق وداقتا بولعان سوڭ ورتاق ۆاليۋتانىڭ بولۋى دا جامان ەمەس”-دەپ، بىلق ەتپەي، بىلش ەتكىزدى. ءتىپتى، ارىپتەستەرى، ءماجىلىس دەپۋتاتتارى، “اق جول” پارتياسى توراعاسى ازات پەرۋاشەۆتىڭ: “تەڭگە -تاۋەلسىزدىگىمىزدىڭ باستى بەلگىسى! تەڭگەدەن ايرىلۋ – تاۋەلسىزدىككە قاتەر! ” دەپ، ءبىر-اق كەسكەنى دە، نۇروتاندىق ماۋلەن اشىمباەۆتىڭ:ء “بىزدىڭ بيلىك بۇل ماسەلەنى ەشبىر قاراستىرىپ وتىرعان جوق” – دەپ، ەسكەرتۋى دە،  كوممۋنيست قوڭىروۆتى ويلاندىرا قويعان جوق.

سوندا ماجىلىستە 4 جىل وتىرىپ،  نە ايتارىن بىلمەگەسىن “ناندى 300 تەڭگەگە كوتەرەيىك” دەپ، اتىن شىعارعان كوممۋنيست قوڭىروۆتىڭ ويى نەدە؟  بۇل بۇگىنگىدەي دۇربەلەڭى كۇشەيىپ تۇرعان كەزەڭدە كەشەگى كەڭەس وداعىن اڭساۋدان ارىلماعانداردىڭ وتىنا ماي قۇيۋ ەمەس پە؟ 8 جىل بويى استانادا وتىرىپ، ماسكەۋدىڭ گازەتىن باسىپ شىعارعان  كوممۋنيست دەپۋتاتتىڭ  ساناسى ءالى رەسەيلىك باسىلىمداردىڭ ىقپالىنان شىعا الماي ءجۇر مە؟ انە، جات ەلدىڭ ءباسپاسوزىنىڭ  جاساپ جاتقان اسەرى…

تاۋەلسىزدىكتىڭ باستى تىرەكتەرىنىڭ ءبىرى – ءتول تەڭگەمىزدى تارك ەتۋگە شاقىرىپ وتىرعان ءماجىلىس دەپۋتاتىنىڭ قاۋىپتى ارەكەتىنە قۇزىرەتتى ورىندارىمىز نە دەمەك؟

“ورتاق ۆاليۋتا  كەرەك” دەپ، ەگەمەن ەل ەركىنە قارسى شىعىپ، تەرىس ويىن  ايقىن ءبىلدىرىپ وتىرعان ايقىن قوڭىروۆتى سويلەتىپ وتىرعان  قانداي كۇش؟

قازاق تەڭگەسىنە قارسى شىققان  ايقىن قوڭىروۆ قازاقتىڭ بەتىنە قالاي قارايدى؟  تاۋەلسىز قازاقستاننىڭ پارلامەنتىندە وتىرىپ، رەسەي دۋماسى دەپۋتاتىنشا ويلايتىن ايقىن ويراتۇلىنىڭ ايقىن  ويراتتىق  ويى جاۋاپسىز قالماۋى ءتيىس!

بىزدەن باسقا ەلدە بولسا، بۇنداي قوڭىروۆ سياقتى ۇلتتىق مۇددەگە قارسى شىققان دەپۋتاتتاردى ەسەككە تەرىس مىنگىزىپ، ايداپ شىعار ەدى…

ءالى كۇنگە دەيىن تۇسىندە قىزىل الاڭدى كورىپ، كرەملدىڭ قوڭىراۋىمەن ويانىپ، مونشاعا دا قىزىل گالستۋكپەن باراتىن  قىزىل بولشەۆيكتەر ءبىزدىڭ تاۋەلسىزدىك العانىمىزعا 24 جىل بولعانىن بىلە مە ەكەن؟!.

قازىبەك يسا، “قازاق ءۇنى”  گازەتى

تۇپنۇسقاداعى تاقىرىپ: قازاق تەڭگەسىنە قارسى قوڭىروۆ قازاقتىڭ بەتىنە قالاي قارايدى.