قاراشا ايىنىڭ 17-19 جۇلدىزى ارالىعىندا بارسەلونا قالاسىندا جىل سايىن وتەتىن "اقىلدى قالا" حالىقارالىق كونگرەسس-كورمە ۇيىمداستىرىلدى. وندا بەدەلدى، دامۋ قارقىنى جوعارى قالالاردىڭ جاڭا جوبالارى مەن تاجىريبەسى كورسەتىلدى. شاراعا شىمكەنت قالاسىنىڭ اكىمى عابيدوللا ءابدىراحىموۆ باستاعان دەلەگاتسيا قاتىسۋدا.
ءداستۇرلى تۇردە وتەتىن "اقىلدى قالا" شاراسىنا كۇللى الەمنىڭ تۇپكىر-تۇپكىرىنەن قالا باسشىلارى، مامانداندىرىلعان عىلىمي ينستيتۋتتار مەن يننوۆاتسيالىق كاسىپورىن جەتەكشىلەرى شاقىرىلادى. بۇل جولى ۇزدىك جوبالارىمەن ەرەكشەلەنگەن قالالار اراسىندا بوستون، تورونتو، سيدنەي، حەلسينكي، لوندون، گونكونگ، تاعى باسقالار بار. ءوزىنىڭ ۇزدىك يننوۆاتسيالىق جەتىستىكتەرىمەن عالامدى مويىنداتقان 10 كاسىپورىننىڭ قاتارىنا بۇل جولى Cisco, Audi, BASF, Bombardier, تاعى باسقالار ەندى. شاراعا جيىلعان كوپشىلىك قاۋىم قالا شارۋاشىلىعىن باسقارۋ جۇيەسىن، ونداعى زياتكەرلىك، تەحنولوگيالىق جوبالاردىڭ ۇزدىك ۇلگىلەرىن، تۇرعىن ءۇي كوممۋنالدىق شارۋاشىلىعىن جاڭعىرتۋ جوباسى بويىنشا الدىڭعى قاتارلى جەتىستىكتەرىمەن تانىسۋعا مۇمكىندىك الدى.

«اقىلدى» قالا حالىقارالىق كونگرەسس-كورمەسى اياسىندا بارسەلونا مەرىنىڭ ورىنباسارى جەراردو پيسارەللو مەن شىمكەنت قالاسىنىڭ اكىمى عابيدوللا ءابدىراحىموۆ ەكىجاقتى ارىپتەستىك كەزدەسۋ ۇيىمداستىردى. كەزدەسۋ بارىسىندا قوس تاراپ ءوزارا قارىم-قاتىناستىڭ نەگىزگى باعىتتارى جونىندە پىكىر الماستى.
بۇل ورايدا، شىمكەنت قالاسى ءتۋريزمنىڭ دامۋى، كاسىپكەرلىكتى قولداۋ باعىتىندا بارسەلونادان ايتارلىقتاي تاجىريبە الۋعا مۇددەلى ەكەنىن جەتكىزدى. سونداي-اق، بارسەلونا تارابى شىمكەنتتىڭ ينفروقۇرىلىمى مەن اۋىلشارۋاشىلىعى سالاسىن وركەندەتۋ باعىتىندا ينۆەستيتسيا سالۋ مۇمكىندىگىن قاراستىراتىندىعىن مالىمدەدى. 
شىمكەنت – بۇگىندە ەلدەگى جەر اۋماعى بويىنشا ءبىرىنشى، تۇرعىندارىنىڭ سانى بويىنشا ەكىنشى ورىنعا يە. 2020 جىلعا دەيىنگى دامۋ تۇجىرىمداماسى جوباسىن تۇزگەن شىمكەنت قالاسى جەرگىلىكتى تۇرعىندارى مەن ساياحاتشىلار ءۇشىن ىڭعايلى،  زامان تالابىنا ساي وركەندەگەن قالا رەتىندە اتالادى. 

Abai.kz