قاراعاندى وبلىستىق سوتىندا ەكس-پرەمەر سەرىك احمەتوۆتىڭ جانە ودان باسقا 20 كەيىپكەردىڭ سوتى اياقتالۋعا جاقىندادى. سوتتالۋشىلارعا سوت الدىندا جاۋاپ بەرۋگە كەزەك كەلدى. ءبىرىنشى بولىپ سوتتا تۇسىنىك بەرگەن قاراعاندى وبلىسىنىڭ بۇرىنعى اكىمى باۋىرجان ابدىشەۆ ءوز كىناسىن مويىنداعان جوق.

تەرگەۋدىڭ نۇسقاسى بويىنشا 2011 جىلى قاراعاندى وبلىسىنىڭ اكىمى بولعان باۋىرجان ابدىشەۆ «ەۋروستاندارتقاراعاندى» زاۋىتىنىڭ قۇرىلىسىن جۇرگىزۋگە ءوزىنىڭ تانىسىنا جەر تەلىمىن بولگەن. كوشەگە توسەيتىن قىرلى تاس شىعاراتىن كاسىپورىن اكىمنىڭ باقىلاۋىندا بولعان كورىنەدى. 2012 جىلى قالالىق ساياباقتار مەن شاعىن باقتاردى اباتتاندىرۋعا بيۋدجەتتەن ميللياردتاعان تەڭگە بولىنگەندىكتەن مۇنداي كەلىسىم اكىمگە ءتيىمدى ەكەنى داۋسىز. وزىنە باعىنىشتى كاسىپورىنعا تاپسىرىستى قامتاماسىز ەتۋ ءۇشىن ب. ابدىشەۆ ءوزىنىڭ ورىنباسارى مۇحتار ادامبەكوۆ پەن تۇرعىن ءۇي-كوممۋنالدىق شارۋاشىلىعى ءبولىمىنىڭ باسشىسى ايدوس جاكەنوۆكە ء«بىر كوزدەن» مەملەكەتتىك ساتىپ الۋ ءراسىمىن جۇرگىزۋگە نۇسقاۋ بەرەدى. تاڭداپ الىنعان مەردىگەرلەرگە كوشەگە توسەلەتىن قىرلى تاستى «ەۋروستاندارتقاراعاندى» زاۋىتىنان عانا ساتىپ الۋعا تالاپ قويىلادى. سايىپ كەلگەندە ولار تروتۋارعا توسەلەتىن تاقتانى ادەيى كوتەرىلگەن باعامەن ساتىپ الادى. ول تاقتالار وبلىس اكىمدىگىنىڭ، «عاسىر» بازارىنىڭ، «مولودەجنىي» مادەنيەت ءۇيىنىڭ جانە «شالقىما» كونتسەرت زالىنىڭ الاڭىنا، سونداي-اق سەروۆ پەن ستالەليتەينىي كوشەلەرىنە توسەلگەن. وسىلايشا، جوعارى لاۋازىمدى تۇلعانىڭ «ىسىنەن» بيۋدجەتكە 3,6 ملرد. تەڭگە زيان كەلتىرىلگەن.

ايتارلىعى، ب. ابدىشەۆ سوتتا ءوزىنىڭ كىنالى ەكەنىن مويىنداعان جوق. ول قالانىڭ ادەمى بولعانىن قالاعاندىقتان، بارلىق ساياباقتار مەن شاعىن باقتاردى رەتكە كەلتىرگىسى كەلگەنىن ايتتى. بىراق بۇل ءىستى تولىق جۇزەگە اسىرۋعا وبلىستاعى قىرلى تاس شىعاراتىن زاۋىتتاردىڭ قۋاتى جەتپەگەن. بۇل ماسەلەنى قالاي شەشپەك بولعانىن سوتتالۋشى ب. ابدىشەۆ بىلاي اڭگىمەلەدى: «2011 جىلى تروتۋارعا توسەلەتىن قىرلى تاستىڭ تاپشىلىعى بايقالدى. ول ۋاقىتتا وبلىستاعى كاسىپورىنداردىڭ تاپسىرىستارى دا كوپ بولاتىن-دى. سول سەبەپتەن ولار بىزگە قاجەتتى ءونىمدى شىعارا المادى. سودان سوڭ تاس تاقتانى استانادان تاسىمالدادىق. مەشىتتىڭ الدىنداعى الاڭقايعا مەردىگەر ەلوردادان العىزعان قىرلى تاستاردى توسەدىك. بۇل ماسەلەنى شەشۋگە شامامىز كەلمەدى».

باۋىرجان ابدىشەۆتىڭ ايتۋىنا قاراعاندا، سول كەزەڭدە قاراعاندىدا قىرلى تاس شىعاراتىن زاۋىت سالۋ قاجەتتىلىگى تۋىندادى. بۇل ماسەلەنى شەشۋ ءۇشىن، اكىم ورىنباسارىنا نۇسقاۋ بەرىپ، بۇرىننان ىستەپ تۇرعان كاسىپورنىن جەتىلدىرۋگە كەلىسەتىن كاسىپكەر تابۋدى تاپسىرادى. «ەۋروستاندارتقاراعاندى» جشس-ءنىڭ يەسى رۋسلان سىزدىقوۆ مۇنداي مامىلەگە بىردەن كەلىسەدى. «وڭتۇستىك-شىعىس ىقشام اۋدانىندا ونىڭ قۋاتى شاعىن تسەحى بولاتىن. مەن ءوزىمنىڭ دوسىم عابيت جۇماتاەۆقا وسى جوباعا قاراجات سالۋدى ۇسىندىم. جۇماتاەۆتىڭ زاڭدى جولمەن تاپقان اقشاسى بار ەدى. سول اقشاسىن كاسىپورىنعا ينۆەستيتسيا ەسەبىندە سالىپ، جاڭا جۇمىس ورىندارىن قۇردى. سەبەبى ينۆەستيتسيا تارتۋ مەن جۇمىس ورىندارىن اشۋ – وبلىس اكىمىنىڭ ىستەگەن جۇمىسىنىڭ نەگىزگى كورسەتكىشتەرىنىڭ ءبىرى بولاتىن»،- دەپ ءتۇسىندىردى ب. ابدىشەۆ.

سوت الدىنداعى سويلەگەن سوزىندە باۋىرجان ابدىشەۆ ايىپتاۋشى تاراپتىڭ «ول پايداكۇنەمدىكتەن قىرلى تاس شىعاراتىن زاۋىت سالۋعا كومەكتەستى» دەگەن ايىبىن تەرىسكە شىعاردى. «بۇل شىندىققا مۇلدەم جاناسپايدى. زاۋىتتىڭ قۇرىلىسىنا 1 گەكتار جەر تەلىمىن ءبولۋ تۋرالى قاۋلىنى كوللەگيالىق ورگان – اكىمدىك قابىلدادى» دەپ مالىمدەدى. سونداي-اق ول مەملەكەتتىك ماڭىزى بار ىستەرمەن باس كوتەرمەي اينالىسقاندىقتان «ەۋروستاندارتقاراعاندى» تسەحىنىڭ جۇمىسىن جەكە باقىلاۋىنا الۋعا ۋاقىتى بولماعانىن حابارلادى. سوتتالۋشىلاردان جاۋاپ الۋ ودان ءارى جالعاسۋدا.

ءامينا باكىر

Aباي-اقپارات